تشرینی یەکەم 15, 2021

(رۆژ كەریم): جاران گۆرانیی کوردی، هونەرێكی داماو و بێكەس بوو، بەڵام ئاستبەرز و بێوێنە بوو!

هونەرمەندی گۆرانیبێژ (رۆژ كەریم) لەمیانەی دیدارێكی دا بۆ خوێنەرانی "هەولێر" ئاماژە بۆ چەند لایەنێك لەكارە هونەرییەكانی دەكات، لەوانە هەبوونی كۆمەڵێك بەرهەمی گۆرانی تازەی خۆی، وەك خۆی ئاماژەی بۆ دەكات نایەوێ بەشێوەی ئەلبوم و سیدی بڵاوییان بكاتەوە، هەروەها ئاماژە بۆ ئەوەش دەكات لە ئێستادا رەوشی گۆرانیی كوردی تووشی بێسەرو بەرییەكی خراپ هاتووە، بە جۆرێكە پەروەردەبوونی ئەو نەوەی ئێستا گۆرانی دەڵێن بەو شێوەیە دەبێتە كارەساتێك گۆرانیی كوردی بەرەو ئاقارێكی خراپ دەبات!

لە سەرەتای قسەكانیدا هونەرمەند (رۆژ كەریم) لەبارەی بەرهەمی تازەی رایگەیاند: "پار، لە سەرەتای هاتنی شەپۆلی ڤایرۆسی كۆرۆنا گۆرانییەكم بۆ شاری سلێمانی بە تایبەتی و كوردستان بەگشتی بڵاو كردەوە؛ لە گۆرانییەكەدا نزای ئەوەم كردووە خوای گەورە وڵات بپارێزە لەم ڤایرۆسە، بەرهەمێكی سادەو ساكار بوو لە رووی میوزیك و تۆماركردنەوە، مەبەستم بوو پەیامێكی مرۆڤانە بگەیێنم؛ ئەگەرچی بەداخەوە ڤایرۆسی كۆرۆناش بەشی خۆی گورزی خۆی لە رەوشی هونەری كوردستانیش وەشاند."
لەبەشێكی دیكەی قسەكانیدا هونەرمەند ئەوەشی گوت: "جگە لەو بەرهەمە چەند گۆرانییەكی دیكەیشم ئامادەیە، بەڵام نامەوێ بە شێوەی سیدی یا ئەلبوم بڵاویان بكەمەوە، چونكە ناكرێ بەو شێوەیە و بە درێژایی زیاتر لە (30) ساڵ لە كاری هونەری هەر لەسەر گیرفانی خۆمان گۆرانی بەخێو بكەین، لە هیچ میلەتێكی ئەو سەرزەمینە نەبووە و ناشبێت هونەرمەند خۆی كاری هونەری بکات و هەر خۆشی هونەرەكەی لەسەر گیرفان و قووتی ماڵومناڵی، گۆرانی و ڤیدیۆكلیپ بەرهەم بهێنێت، بۆیە وا باشترە لەومەدوا گۆرانییەكانم بە شێوەی تاک بڵاو بكەمەوە!"
لەبارەی ئاستی هونەری گۆرانیی كوردی، بە تایبەتی ئەو یەكێكە لەو هونەرمەندانەی دەمێكە خەریكی هونەری گۆرانیگوتنە، ئایا بەبەراورد لەگەڵ گۆرانیچڕینی جاران پێشكەوتنی پێوە دیارە؟ لە وەڵامدا (رۆژ) گوتی: "جاران هونەری گۆرانیی كوردی هونەرێكی داماو بێكەس بوو، لەنێو چەندین دژواری نەهەماتی و لەسەر گیرفانی هونەرمەند خۆی، كاری بۆ دەكرا و دەهاتە بوون، بەڵام هونەرێكی ئاستبەرز بوو، ناسنامەیەكی هەڵگرتبوو تا ئێستاكەش گوێگر شانازی بەو سەردەمەوە دەكات؛ هەروەها جاران گۆرانی لەبەر ئەوە نەدەهاتە بوون بۆ ئەوەی تەنها بەرهەمێكت هەبێت و لەسەر شاشە بیت، نەخێر بەڵكو هونەر لە پێناوی هونەر دەكرا و هیچی تر، ئێمە لە سەرەتای ساڵانی (2001 و 2002) بەتایبەتی لە وڵاتی سوید كاتێكی گۆرانییەكمان لە ستۆدیۆ تۆمار دەكرد، بۆچوونی چەندین هونەرمەندی لە خۆمان بەئەزموونتر و شارەزاتر وەردەگرت، ئینجا لە روومان دەهات بڵاوی بكەینەوە، زۆر كەس هەبووە دەنگیشی خۆش بووە و خاوەنی بەهرەیەكی زۆر چاک بووە، بەڵام ترساوە لەوەی بێتە نێو گۆڕەپانەكە و گۆرانییەك تۆمار بكات، كەچی ئێستاكە زۆر سەیرە هەموو رۆژێك لە خەو هەڵدەستی بەر لەوەی هەواڵێكی تازەی دنیا یاخود وڵاتەكەی خۆت بزانیتەوە، كەچی سەیر دەكەی چەند ڤیدیۆكلیپێک بە دوای یەكدیدا ریز كراون و لە كەناڵێکەوە پەخش دەكرێنەوە! نازانم كەسێك نیە پێیان بڵێت ئەرێ بێزەحمەت ئێوە گۆرانی بۆ كێ دەڵێن؟!"
هەر لەمبارەیەوە (رۆژ كەریم) روونتر گوتی: "بەداخەوە لەنێو ئەو هەموو شەپۆلە دەنگبێژ و گۆرانیبێژەی پەیدا بووە، كارێكی وایان كردووە، سەریان لە گوێگریش شێواندووە، ئەگەرچی من پێم وایە گوێگری ئێستا وشیار و بەئاگایە، بەڵام پێوستە ئەوەش بڵێم دەزگا راگەیاندنەكان بەتایبەتی تیڤیەكان رۆڵێكی زۆریان هەیە، لە شێواندنی ئەو رەوشەی ئێستا لەئارادایە، چونكە هەر كاتێك فلتەر نەبوو بۆ هەر شتێک یا بۆ هەر كارێك ئیدی ئەو كارە شێوەیەكی باو وەردەگرێت و دەبێتە دیاردە، بۆیە هیوادارم دەزگا راگەیاندنەكان فلتەرێک سانسۆرێكی هونەری دابنێن، چونكە پەروەردەبوونی ئەو نەوەی ئێستا گۆرانی دەڵێن بەو شێوەیە دەبێتە كارەساتێک، گۆرانیی كوردی بەرەو ئاقارێكی خراپ دەبات؛ ئومێدم وایە گۆرانیی كوردی چیتر بەو ئاستە نەبینم و، زۆر بەڕاشكاوانە دەڵێم گۆرانیی كوردی لەرووی ناوەرۆكەوە، بەتایبەتی لە ئاواز و تێكست ئەوەندە لاوازە جێگەی دڵپێسووتانە!"

 

عەبدولغەفار عەبدوڵڵا - هەولێر

 

© 2017 Hawler