ئەیلول 27, 2021

(حەمەڕەئوف کەرکووکی): "ئێستا تەنها ئەو رێگەیە دروستە كاری كلیپ بۆ بەرهەمەكەت بكەیت و بەشێوەی تاک بڵاوی بكەیتەوە."

هونەرمەندی بەئەزموون، گۆرانیبێژ (حەمەڕەئوف کەرکووکی) لە میانەی لێدوانێكی دا بۆ خوێنەرانی "هەولێر" تیشك دەخاتە سەر چەند لایەنێك لە كارە هونەرییە تازەكانی، لەوانە پرۆژەی بەرهەم هێنانی (4) گۆرانی، ئێستا كاری (2) گۆرانی تەواو بووە، یەكێك لە گۆرانییەكان كاری میوزیكی لەگەڵ هونەرمەندی بە ئەزموونی میوزیكژەن (سەید ئەحمەد رەواندوزی) ئەنجامداوە.

لە سەرەتای قسەكانی دا هونەرمەند (حەمەڕەئوف کەرکووکی) رایگەیاند: "ئەگەرچی بەرهەمهێنانی كاری هونەری لە كوردستان چۆتە قۆناغێكی زۆر سەخت و دژوارەوە، بەڵام لەبەر ئەو خۆشەویستییەی چەندین ساڵە هەمانە بۆ كاری هونەری، ئیدی تازە ناتوانین دەستبەرداری بین؛ ئەگەرنا بەرهەمهێنانی گۆرانی لەسەر ئەرك و گیرفانی خۆمان زەحمەتییەكی زۆری هێناوەتە رێگامان."
لەبارەی هەبوونی چەند بەرهەمێكی تازەی (کەرکووکی) ئاشكرای كرد: "سەرقاڵی بەرهەمهێنانی چوار گۆرانییم، دوو لەو گۆرانیانە فۆلكۆرن، ئەوانی دیكە گۆرانی تازەن، بەتایبەتی یەكێك لەو گۆرانیانە بەرهەمێكی زۆر تایبەتە لە ژێر ناوی (شكۆفە) هۆنراوەی (شوان مەندی)ـیە، ئاوازەكەی خۆم دامناوە، لەلایەن هونەرمەندی بە ئەزموون مامۆستا (سەید ئەحمەد رواندوزی) كاری دابەشكردنی میوزیكی بۆ كراوە، ئێستا دوو لەو گۆرانیانە كارەكانی تەواو بووە، دوو گۆرانییەكەی دیكە كاری تۆماركردنی ماوە".
هونەرمەند (حەمەڕەئوف کەرکووکی) لەبارەی شێوازی بڵاوكردنەوەی ئەو چەند گۆرانییە بە شێوەی ئەلبوم دەبێت، یاخوود بە شێوەی (سینگڵ) بڵاوی دەكاتەوە؟ لە وەڵامدا دەڵێت: "دیارە بەرهەم هێنانی ئەلبوم و بڵاوكردنەوەی كارێكی ئەستەمە، چونكە تۆڕە كۆمەڵایەتیەكان بڵاو بوونەوەی بەرهەمی گۆرانی بە شێوەیەكی بەرچاو زۆر بەر بڵاوەو، خەڵك وەكو جاران ناچێت لە تۆمارگایەك سیدی و ئەلبومی هونەرمەندان بكڕێت، لەبەر ئەوەیە شێوازی بڵاوكردنەوە بۆ كاری هونەری گۆرانی گۆرانكاری بەسەرداهاتووە، هەر لەبەر ئەوەیە لە ئێستادا تەنها ئەو رێگەیە راستە كاری كلیپ بۆ بەرهەمەكەت بكەیت و بەشێوەی سینگل بڵاوی بكەیتەوە!".
لە كۆتایی دا هونەرمەندی گۆرانیبێژ (حەمەڕەئوف کەرکووکی) : "لە دوای تەواو بوونی كاری تۆماركردنی ئەو (4) گۆرانییە هەوڵ دەدەم كاری ڤیدیۆكلیپیان بۆ بەئەنجام بگەینم، چونكە لە ئێستدا ڤیدیۆ كلیپ كاریگەری زۆری هەیە بۆ گەیاندنی بە جەماوەر و گویگرانی گۆرانی كوردی، هەروەها تەلەفزیۆنەكانیش دەمێكە ئەو نەریتەیان پەیڕەو كردووە، دەبێ هونەرمەند بە شێوەیەكی ئامادەكراو گۆرانییەكە بگەینێتە دەستیان ئینجا دەبێ بڵاوی بكەینەوە، كە بەداخەوە دیسان دەبێ ئەوە بڵێمەوە هونەرمەندی گۆرانیبێژ دەبێ سەرجەم پرۆسەی بەرهەم هێنانی گۆرانی لە ئەستۆی خۆی بگرێت، ئینجا دەتوانێت بەردەوام بێت لە كارە هونەرییەكانی."

 

عەبدولغەفار عەبدوڵڵا - هەولێر

 

© 2017 Hawler