ئەیلول 27, 2021

قه‌ڵادزێ فیستیفاڵێك بۆ ئاوه‌دانكردنه‌وه‌ ئه‌وان وێرانیان كرد ئێمه‌ ئاوه‌دانی ده‌كه‌ینه‌وه‌

له‌ ژیردروشمی (ئه‌وان وێرانیان كرد، ئیمه‌ ئاوه‌دانی ده‌كه‌ینه‌وه‌) دوانیوەڕۆی ڕۆژی ٢٦/٦ بۆ بەرزڕاگرتنی یادی(32) ساڵه‌ی ڕاگواستنی قەڵادزێ و ناوچەی پشدەر،ماڵی كه‌له‌پوری و ڕۆشنبیری قه‌لادزێ به‌ هاوكاری چه‌ند كه‌سایه‌تییه‌كی هونه‌ری فیستیفاڵی هونه‌ری و كه‌لتوری ئه‌نجامدا.

چالاكیه‌كانی فیستیفاڵی قه‌ڵادزێ لەناوەڕاستی بازاڕی قەڵادزێدا، بەئامادەبونی جەماوەرێکی زۆری ناوچەکە لەبەردەم پاڕکی ناوشاردا ده‌ستی پێكرد، به‌ خوێندنه‌وه‌ی ووتاری باڵای فیستیفاڵ له‌ لایه‌ن هونه‌رمه‌ند و نووسه‌رو ڕۆژنامه‌نووس (به‌كر مه‌حمود)، له‌و ووتاره‌دا خه‌مخۆری خۆیان بۆ ئاوه‌دانكردنه‌وه‌ی قه‌ڵادزێ دووپاتكرده‌وه‌ كه‌ تا ئێستاش شوینه‌واری كاولكاری به‌سه‌ر ئه‌و شاره‌دا ماوه‌، له‌ ووته‌ی فیستیفاڵدا هه‌موو پیكه‌وه‌ گووتیان: ئه‌وان ویرانیان كرد، ئێمه‌ ئاوه‌دانی ده‌كه‌ینه‌وه‌.
(به‌كر مه‌حمود) به‌ناوی لیژنه‌ی باڵای فیستیفاڵ به‌و جۆره‌ بۆ رۆژنامه‌ی (هه‌ولێر) زانیاری پیداین و پرۆگرامی چالاكیه‌كانی فیستیفاڵی خسته‌ روو:
بەدەم ڕوحی کوردانەی میوزیکەوە، وەك دوازدە سوارەی مەریوان، لاوانی ئەسپ سوار، بوك و زاوایان لە ئارایشگای ( بوکێ ) وە، بەجلوبەرکی کوردانەی بوك و زاواوە، بەبڕنەوی درێژی لەشان کراوەوە، بەباولی و سندوقی کلو کلچێوی بارو بنەی سەر پشتی ئەسپی کەحێلەوە، بەنوقڵۆکەو شەکرۆکەی هەڵدراوی دەستی منداڵانەوە، بە ئاوازو گۆرانی بوکانە بوکێی کوردەواریەوە، لەگەڵ ڕمبازی و چوار ناڵی ئەسپەکانەوە، بەناو بازاڕی قەڵادزێدا هاتنە ژێر ڕەشماڵ و ئەستوندەگی کوردەواری و لەژێر سەکۆی فێستیڤاڵدا بنەو بارگەیان هەڵدا، بوو بەهەڵپەڕکێی کوڕان و کیژان بەدەم دۆی ساردو قەزوانی کوێستان و ناو کوپەو گۆزەی بنارەوە.
1
دواتر پارچەیەک میوزیک لەلایەن مامۆستا هەژارو هاوڕێکانیەوە پێشکەش کرا،، دواتر هەریەک لەشاعیران کاک ڕێبوار بەکرەجۆیی و کاک سدیق علی دوو شیعریان خوێندەوە،خاتو ئاودەنگ و کاک سامان بەرزە کەبەسامانی دەف ناسراوەو پێشکەشکارێکی بەتوانایە ناوە بەدەنگ و شیعری پڕجۆش فیستیڤاڵەکەی جوانتر دەکرد، لەژێر ڕەشماڵدا کچان و ژنان سەرقاڵی نمایشی مەشکە ژەنین و کلتوری جوانی ناوچەکەو کوردەواری بوون، پاشان چەند دیمەنێکی نمایشی ئەسپ سواری پێشکەش کرا، لەکۆتاییدا ڕێزلێنان بۆ پانزە کەسایەتی کرا کە لەسەرەتای ڕاپەڕینەوە، دوای گەڕانەوەی خەڵکی ناوچەکە لەئۆردوگا زۆرەملێکانەوە ڕۆڵیان لە هێنانەوەی ئاوو کارەباو بنیاتنانەوەی شارەکەدا هەبووە،دواتر هەر لەناو پارکەکەدا بەسەرپەرشتی مامۆستا هادی هونەر پێشانگایەکی فۆتۆگرافی کەلە سی وێنەی دەگمەنی وێرانی و ئاوەدانکردنەوەو مێژوی شارەکەیان دەگێڕایەوە نمایش کران.
بۆ شەوی دواتر ماڵی کەلەپوری و ڕۆشنبیری قەڵادزێ بەئامادەبونی هونەرمەندانی میللی فەتاح سەوزەواری و مام وەتمان و گروپی میوزیک و خەڵکێکی زۆر، شەوەئاهەنگێکی خۆش بەڕێوەچوو، بڕیارە ساڵانی داهاتوو بەشێوازێکی فراوانتر ئەو یادە بکرێتەوە.

 

سەرکەوت بورهان

 

© 2017 Hawler