حوزەیران 21, 2021

هاتنە پێشەوەی ستایلی تازە بەبێ بوونی شارەزایی تووشی هەڵەمان دەکات!

عەبدولغەفار عەبدوڵڵا - هەولێر

 

هونەرمەندی گۆرانیبێژ (سالار محمود) یەكێكە لەو هونەرمەندە گۆرانیبێژانەی ساڵانێکی زۆرە لەنێو کۆڕی هونەری گۆرانی كوردیی دا كار دەكات و ئامادەیی هەیە، لێدوانێکی دا بۆ خوێنەرانی "هەولێر" ئاماژەی بۆ چەند لایەنێك لە كارە هونەرییەكانی خۆی كرد، بەتایبەتی ئەو چەند بەرهەمەی بە نیازە لە ساڵی 2021 بڵاوی بکاتەوە، کە هەندێکیان دەبوایە زووتر بڵاو بکرێتەوە، بەڵام لەبەر هاتنی ڤایرۆسی کۆرۆنا ئەم بەرهەمانە دواکەوتن!.

لەدەستپێكی قسەكانی دا هونەرمەند (سالار مەحمود) لەبارەی هۆکاری نەبوونی بەرهەمی تازەی گوتی : بەرهەمی تازە بۆ هەموو هونەرمەندێکی گۆرانیبێژ ڕەنگە سەخت و دژوار نەبێ!، بەڵام تاکە هۆکار لەبەردەم پەکخستنی کارە هونەرییەکانی زۆرینەی هونەرمەندانی کورد نەبوونی لایەنی مادیە!، کە پێم وایە هیچ کار و بەرهەمێکی هونەریی بەبێ بوونی بودجەو خەرجی نایەتە بوون، چونکە ئەمە ساڵانی حەفتاکان و هەشتاکان نیە چەند ژەنیارێک کۆبکەیتەوەو لە ژوورێکدا چەند گۆرانییەک تۆمار بکەیت!، گۆرانی ئێستا سۆڵۆی یەک کەمان و عود بە بەلاش لەلایەن هیچ هونەرمەندێکەوە ناژەندرێ بەبێ بوونی پارە!، کە دیارە ئەوانیش مافی خۆیانە چونکە لە هیچ شوێنێکی دونیا کاری هونەری بەبێ بەرامبەر ئەنجام نادرێ!. خۆپاراستنە
هونەرمەند (سالار مەحمود) لە بارەی رەوشی ئێستای گۆرانی کوردیی و هاتنە پێشەوەی چەندیین ستایل و دەنگی تازە دێنە پیشەوە دەڵێت: بوونی ستایلی تازە کارێکی پێویست و گرنگە، بەڵام بەو مەرجەی بزانین ئەو ستایلە چۆنەو هەروەها بە چ شێوەیەک کاری لەسەر بکەین!، نەوەک بەبێ بوونی شارەزایی و تەنانەت پرسیار کردن لەو بارەیەوە کار لەسەر ئەو ستایلانە بکەین، بۆ هاتنە پێشەوەی دەنگی تازە هەندێکیان دەنگی باش و جوانن بەڵام پێویستە وریاتر بن لە هەنگاو نان بۆ چۆنیەتی بەرهەم هێنانی گۆرانی و بڵاوکردنەوەیان!.
 
هونەرمەند سالار مەحمود لەبارەی سوود وەرگرتن لە ئاوازی بیانی لەلایەن بەشیک لە گۆرانیبیژانی ئیستا، ئایا ئەوە شیوازە کارکردنە بۆ بەرهەم هینانی گۆرانی گرنگە یان خۆشی بەشداربووە لەو شێوەیە سوودی وەرگرتووە ؟ لەوەڵامدا گوتی : دیارە سوود وەرگرتنی لە هونەری هەموو دونیا بۆ دەوڵەمەندکردنی جۆر و شێوازی گۆرانی پێویستە بەڵام کۆپی نەبێت، وەک چۆن ئێمە سوود لە زۆر کتیبی جیهانی وەردەگرین کاتیک وەریدەگیرن بۆ سەر زمانی کوردی، بەڵام ئەگەر هاتوو وەرگێڕەکە بە شێوەیەک وەریگێڕا، کورداندنی بۆ کردبێ، ئەو کاتە جوانتر دەبێ کتێبەکە، بەڕای من دیارە ئەوەشیان بۆ ئاوازیکی بیانی هەمان شتە، بۆیە هیوادارم هونەرمەندان بەو شێوەیە سوود وەربگرن لە هەر ئاوازیک یاخوود هەر شێواز و ئاوازێک، منیش لەو شێوەیە سوودم وەرگرتووە، بەڵام بەشێوەیەک کارم نەکردووە کۆپی پەیستم کردبی!.

لە كۆتاییدا هونەرمەند (سالار مەحمود) لەبارەی هەڵبژاردنی ژیانی لە نێوان هەندەران و کوردستان روونی کردەوەو گوتی : من ساڵانێکی زۆر لە وڵاتی سوید ژیانم بەسەر بردووە هاوڕێ لەگەڵ پۆلێک لە هونەرمەندانی کورد کاریان جوانمان پێشکەشکردووە، بەڵام لە دوای ئەوەی بڕیاری گەڕانەوەمداوە بۆ کوردستان دیارە ژیان لە کوردستان بۆ من خۆشتر و باشترە!، چونکە لە هەندەران ئەو ژیاندۆستی و بردەرایەتی و دۆستایەتییە بوونی نیە!.

© 2017 Hawler