تەمموز 24, 2021

بارسێلۆنا ده‌یه‌وێت به‌هره‌مه‌ندێكی یۆرۆی 2020 بگوازێته‌وه‌

به‌ گوێره‌ی راپۆرته‌ هه‌واڵێكی ئیسپانیا، كارگێری یانه‌ی بارسێلۆنا له‌سه‌ر داخوازی رۆناڵد كومانی راهێنه‌ری هۆڵه‌ندی داوای به‌هره‌مه‌ندێكی پورتوگالی كردووه‌ كه‌ له‌ یۆرۆی 2020 ئاستێكی به‌رزی پێشكه‌ش كردووه‌.

رۆژنامه‌ی موندۆ دیپۆرتیڤۆی كه‌ته‌لۆنیا نووسیویه‌تی: كارگێری بارسێلۆنا پلانی داناوه‌ ئه‌گه‌ر هاوسه‌نگی دارایی رێگه‌ی پێبدات ڕیناتۆ سانچێزی ناوه‌راستكاری پورتوگالی ده‌گوازێته‌وه.
ریناتۆ سانچێزی ته‌مه‌ن 23 ساڵ وه‌رزی رابردوو له‌گه‌ڵ یانه‌ی لیلی فه‌ره‌نسا ناسناوی خولی فه‌ره‌نسا به‌ده‌ستهێنا، له‌گه‌ڵ ئه‌و یانه‌یه‌ له‌ كۆی 59 یاری 5 گۆڵ و 5 ئاسیتی كردووه‌، پێشتریش 53 یاری به‌ درێسی بایرن میونشن ئه‌نجام داوه‌.
له‌ لایه‌كی دیكه‌یشه‌وه‌، رۆژنامه‌ی ئاماژه‌ی به‌ پلانێكی دیكه‌ی بارسێلۆنا كردووه‌ كه‌ تێیدا نووسیویه‌تی: چاره‌نووسی لیۆنێل مێسی له‌ بارسێلۆنا ده‌بێته‌ خاڵی یه‌كلاكه‌ره‌وه‌ بۆ گۆڕینه‌وه‌ی یاریزانێك له‌ نێوان بارسێلۆنا و ئاتڵێتیكۆ مه‌درید.
پێگه‌ی موندۆ دیپۆرتیڤۆی ئیسپانیا ئاشكرای كردووه‌ كه‌ دیێگۆ سیمیۆنی و رۆناڵد كومان ئاماده‌ییان ده‌ربڕیوه‌ بۆ ئه‌وه‌ی ئانتوان گریزمان و ساوڵ نیگوێز ئاڵوگۆڕ بكه‌ن.
دیێگۆ سیمیۆنی ده‌یه‌وێت له‌م هاوینه‌ هێرشبه‌رێك بگوازێته‌وه‌ بۆ ئه‌وه‌ی قه‌ربووی له‌ده‌ستدانی دیێگۆ كۆستا و مووسی دێمبلی پێ بكاته‌وه‌، له‌م پێناوه‌یشدا لاوتارۆ مارتینێزی هێرشبه‌ری ئینته‌ر میلانی كردووه‌ته‌ ئامانج، به‌ڵام ئانتوان گریزمانیش یه‌كێكه‌ له‌ بژارده‌كانی.
به‌ گوێره‌ی هه‌مان سه‌رچاوه‌، كارگێری بارسێلۆنا چاوه‌ڕوانی یه‌كلاییكردنه‌وه‌ی بڕیاری مێسی ده‌كات، له‌ ئه‌گه‌ری رۆیشتنی مێسی، بارسێلۆنا ئانتوان گریزمان ده‌هێڵێته‌وه‌، له‌ ئه‌گه‌ری مانه‌وه‌ی لیۆ، بارسا گریزمان ده‌فرۆشێت و له‌ لایه‌ن هه‌ردوو یانه‌ی ئاتڵێتیكۆ و مان سیتی داوا كراوه‌.

 

ئەسعەد ئیسماعیل - هەولێر

© 2017 Hawler