حوزەیران 21, 2021

مێسی و گریزمان هه‌ڕه‌شه‌ی ڕاگرتیان له‌سه‌ره‌

رۆژنامەی هەولێر، لە چوارچێوەی كۆهەواڵدا، رۆژانە تازەترین و گرینگترین هەواڵ و پێشهات و دەنگوباسە وەرزشییەكان بۆ گوێ و هزری خوێنەرانی دەگوازێتەوە، كە تێیدا پێشینهەواڵ بۆ گرینگترین و تازەترینیانە و بە هۆی فراوانیی بواری تۆپی پێ و فرەیی جەماوەر و هەواداری ئەو یارییەوە، پشكی شێر و زۆر بەر هەواڵەكانی ئەو یارییە دەكەون و لە كات و ئانوساتی پێشهات و هەواڵ و پاڵەوانیەتیی یارییەكانی دیكە، تیشكیان دەخرێتە سەر و پشكیان پاشگوێ ناخرێ، ئامانج لێی دانەبڕانی خوێنەرانە لە هەواڵ و ئاگەییە وەرزشییەكان و پەیبردنە بە سووچ و پەناكانی هەواڵە شاراوە و ئاشكرانەكراوەكان.

لایپزیگ بۆ ده‌ستبه‌رداربوون له‌ ناگلسمان داوای بۆندێكی مێژوویی ده‌كا
یانه‌ی بایرن میونشنی ئه‌ڵمانی، ناوی یولیان ناجلسمانی راهێنه‌ری یانه‌ی لایپزیگی جێگیر كردووه‌ تا وه‌كوو شوێنگره‌وه‌یه‌كی هانزی فلیك، بیكات به‌ راهێنه‌ری یانه‌كه‌ی و وه‌رزی دادێ له‌ یاریگه‌ی ئه‌لیانز ئه‌رینا بێ.
فلیك پێشتر رای گه‌یاندبوو، كه‌ له‌ كۆتایی ئه‌م وه‌رزه‌دا یانه‌ی بایرن جێ ده‌هێڵێ، ئه‌وه‌ش به‌ هۆی ناكۆكیی نێوان خۆی و حه‌سه‌ن ساڵح حه‌میدیچی به‌ڕێوه‌به‌ری وه‌رزشیی یانه‌ باڤارییه‌كه‌.
له‌ نێو چه‌ند ناوێكدا، یانه‌ی بایرن، دواجار ناجلسمانی وه‌كوو شوێنگره‌وه‌ی هانزی جێگیر كرد، له‌ كاتێكدا بۆندی ئه‌و راهێنه‌ره‌ تا ساڵی 2023ـیه‌.
له‌سه‌ر ئه‌و بنه‌مایه‌، یانه‌ی بایرن گفتوگۆ و دانوستان له‌گه‌ڵ لایپزیگ ده‌كا، هه‌رچه‌نده‌ لایپزیگ لاری نییه‌ له‌ ده‌ستبه‌رداربوون له‌و راهێنه‌ره‌ی، به‌ڵام داوای بڕه‌پاره‌یه‌كی زۆر بۆ ده‌ستبه‌رداربوون لێی و هه‌ڵوه‌شاندنه‌وه‌ی بۆنده‌كه‌ی ده‌كا.
به‌ پێی زانیاریی سایتی گۆڵ، بڕی ئه‌و پاره‌یه‌ ده‌گاته‌ 30 ملیۆن یۆرۆ، ئه‌گه‌ر ئه‌وه‌ش سه‌ر بگرێ، بۆندی ناجلسمان ده‌بێته‌ گرانترین بۆندی مێژوویی راهێنه‌ران.
له‌م سه‌روه‌خته‌دا كه‌ ڕه‌وشی كۆرۆنا باری دارایی یانه‌كانی سه‌خت كردووه‌ و خه‌زێنه‌ی كه‌م كردوونه‌وه‌، ته‌نانه‌ت بۆندی یاریزانانیش به‌و بڕه‌ پارانه‌ كه‌م بوونه‌ته‌وه‌ یان نابنیرێن، بۆیه‌ به‌ هۆی نه‌بوونی بڕه‌پاره‌ی پێویست، ئه‌سته‌مه‌ بایرن بتوانێ له‌و بۆنده‌دا سه‌ركه‌وتوو بێ، مه‌گه‌ر یانه‌ی به‌رامبه‌ر بڕی پاره‌كه‌ بۆ ئاستێكی گونجاو كه‌م بكاته‌وه‌.
له‌ سه‌روه‌ختی سیر ئه‌لێكس فێرگسۆنی راهێنه‌ری پێشووتری مانچسته‌ر یونایتد، گرانترین بۆندی یانه‌كه‌، دیمیتار بێرباتۆف بوو كه‌ به‌هاكه‌ی 26 ملیۆن یۆرۆ بوو، بۆندی تۆنی كروس كه‌ پێی چووه‌ ریاڵ مه‌درید 25 ملیۆن یۆرۆ بوو.
ڕوون نییه‌ كه‌ بایرن به‌و بڕه‌پاره‌یه‌ رازی ده‌بێ و ئه‌و راهێنه‌ره‌ ده‌باته‌ ریزه‌كانیه‌وه‌، یان یانه‌ی پله‌ی دووه‌می بۆندس لیگا رازی ده‌بێ به‌ دانوستان بۆ كه‌مكردنه‌وه‌ی ئه‌و بڕه‌ی بۆ هه‌ڵوه‌شاندنه‌وه‌ی بۆندی راهێنه‌ره‌كه‌ی داوای كردووه‌ یان نا.
بۆ بیرهێنانه‌وه‌، ناجلسمانی ته‌مه‌ن 33 ساڵان، به‌ شێوه‌یه‌كی ناڕاسته‌وخۆ پێشتر ئه‌وه‌ی دركاندووه‌ كه‌ گرینگی به‌وه‌ ده‌دا له‌ یانه‌ی بایرن میونشن كار بكا.

مێسی و گریزمان هه‌ڕه‌شه‌ی ڕاگرتیان له‌سه‌ره‌
له‌ چوارچێوه‌ی گه‌ڕی 33ـی یارییه‌كانی خولی پله‌یه‌كی تۆپی پێی ئیسپانیا، سبه‌ی چوارشه‌ممه‌ یانه‌ی به‌رشلۆنه‌ رووبه‌رووی یانه‌ی گرانادا ده‌بێته‌وه‌ و یه‌كشه‌ممه‌ی دادێش رووبه‌رووی یانه‌ی ڤاڵێنسیا ده‌بێته‌وه‌، له‌و یارییه‌ی له‌ یاریگه‌ی مێستایا ئه‌نجام ده‌درێت.
رۆژنامه‌ی مۆندۆ دیپۆرتیڤۆ بڵاوی كردووه‌ته‌وه‌، كه‌ به‌رشلۆنه‌ چوار یاریزانی سه‌ره‌كی، خاوه‌نی چوار كارتی زه‌ردن و ئه‌گه‌ر هه‌یه‌ به‌ وه‌رگرتنی كارتێكی زه‌رد له‌ یارییه‌كه‌یان به‌رانبه‌ر ڤاڵێنسیا داببڕێن.
رۆژنامه‌كه‌ ئاماژه‌ی به‌وه‌ كردووه‌، یاریزانانی به‌رشلۆنه‌ كه‌ چوار كارتی زه‌ردیان هه‌یه‌، بریتین له‌ لیۆنێل مێسی، ئه‌نتوان گریزمان، ئۆسكار مینگوێزا و فرینكی دی یۆنگ.
مێدیاكه‌ بڵاویشی كردووه‌ته‌وه‌، ئه‌و هه‌ڕه‌شه‌ی ڕاگرتن و مه‌ترسییه‌ بۆ یاریی به‌رشلۆنه‌ و ئه‌تله‌تیكۆ مه‌دردیش به‌رده‌وام ده‌بێ، ئه‌گه‌ر هه‌ركام له‌و یاریزانانه‌ له‌ یارییه‌كه‌یان به‌رانبه‌ر ڤاڵێسنیا كارتی زه‌رد وه‌ربگرن.
به‌رشلۆنه‌ ئێسته‌ به‌ 71 خاڵ له‌ خانه‌ی سێیه‌می خولی ئیسپانیادایه‌ و پێویستی به‌وه‌یه‌ یاریی دادێ سه‌ركه‌وتن به‌ ده‌ست بهێنێ بۆ به‌رده‌وامبوون له‌سه‌ر ڕكه‌به‌ریی بۆ بردنه‌وه‌ی لا لیگا و دوای شكستی ئه‌تله‌تیكۆ به‌رانبه‌ر بلباو، چاره‌نووسی خۆی له‌ ده‌ستی خۆیدایه‌.

سیمیۆنی: جڵه‌وه‌كه‌ له‌ ده‌ست خۆماندایه‌
دیێگۆ سیمیۆنی، راهێنه‌ری یانه‌ی ئه‌تله‌تیكۆ مه‌درید، دوای شكستی یانه‌كه‌ی به‌رانبه‌ر یانه‌ی ئه‌تله‌تیك بلباو، پێی وایه‌ جڵه‌وی خولی ئیسپانیا هێشتا له‌ ده‌ست خۆیاندایه‌.
دیێگۆ سیمیۆنی، باوه‌ڕی به‌ تیپه‌كه‌ی هه‌یه‌، كه‌ بیركردنه‌وه‌ و هێزی هزرین و تێهزرین و پلان، ناسناوی لا لیگا له‌ نێوان یانه‌ ركه‌به‌ره‌كاندا یه‌كلایی ده‌كاته‌وه‌.
هه‌رچه‌نده‌ یانه‌كه‌ی له‌ یاریی گه‌ڕی ڕابردووی لا لیگادا به‌ ئه‌نجامی 1-2 گۆڵ به‌ بلباو دۆڕا و هه‌لی ئه‌وه‌ هه‌یه‌ به‌رشلۆنه‌ بچێته‌ پێشه‌نگ، به‌ تایبه‌ت كه‌ یارییه‌كی دواخراوی هه‌یه‌، به‌ڵام سیمیۆنی پێی وایه‌ ڕاسته‌ ڕكه‌به‌رییه‌كه‌ له‌ نێوان خۆیان و ریاڵ مه‌درید و به‌رشلۆنه‌ و سیڤیلیه‌دایه‌، به‌ڵام دووپاتی ده‌كاته‌وه‌ جڵه‌وه‌كه‌ له‌ ده‌ست خۆیاندایه‌، به‌ تایبه‌ت كه‌ پێنج گه‌ڕ له‌ یارییه‌كانی خوله‌كه‌دا ماوه‌.
بۆ زانین، دوای دوو گه‌ڕی دیكه‌، ئه‌تله‌تیكۆ مه‌درید له‌ یاریگه‌ی كامپ نۆ ڕووبه‌رووی به‌رشلۆنه‌ ده‌بێته‌وه‌، بۆیه‌ سیمیۆنی دووپاتی ده‌كاته‌وه‌ كاره‌كه‌ له‌ ده‌ست خۆیاندایه‌.

 

مامەیارە ئەحمەد - هەولێر

© 2017 Hawler