ئایار 07, 2021

زۆرترین هەواڵ بە کەمترین وشە

ئەسعەد ئیسماعیل - هەولێر

 

* ئه‌مڕۆ سێشه‌ممه‌ له‌ یاریی گه‌ڕانه‌وه‌ی قۆناخی هه‌شتی چامپیۆنزلیگ دوو یاریی ده‌كرێن: (چێڵسی ئینگلاند ـ پۆرتۆ پورتوگال) كات 10:00ـی شه‌و، (پاریس سانجێرمان فه‌ره‌نسا ـ بایرن میونشن ئه‌ڵمانیا) كاتژمێر 10:00ـی شه‌و.
* ماوریزیۆ پۆچیتینیۆ راهێنه‌ری یانه‌ی پاریس سانجێرمان: به‌ڵێ هێشتا هه‌ردوو یانه‌ ده‌رفه‌تی گه‌یشتنیان بۆ قۆناخی داهاتوو له‌پێشه‌، رێزی زۆرم بۆ بایرن میونشن هه‌یه‌، ئه‌وان باشترین یانه‌ی ئه‌ورووپان، به‌ڵام متمانه‌م به‌خۆمان هه‌یه‌ ده‌توانین لێیان ببه‌ینه‌وه‌ و بگه‌ینه‌ قۆناخی داهاتوو، هه‌رچه‌نده‌ ماورۆ ئیكاردی ئاماده‌ نابێت و له‌ ئاماده‌بوونی ماركینۆسی به‌رازیلیش دڵنیا نیم.
* پێپ گواردیۆلا راهێنه‌ری یانه‌ی مان سیتی: ره‌نگه‌ به‌رامبه‌ر دۆرتمۆند به‌هه‌مان ئه‌و پێكهاته‌یه‌ یاری بكه‌م كه‌ به‌رامبه‌ر یانه‌ی لیدز یونایتد یاریم پێكردن و دۆڕاین.
* دیێگۆ سیمیۆنی راهێنه‌ری یانه‌ی ئاتڵێتیكۆ مه‌درید: من حه‌زم له‌و كێبڕكێ و سه‌ركێشیانه‌یه‌ و ئێستاش ئێمه‌ به‌ربژێری سه‌ره‌كی بردنه‌وه‌ی ناسناوی ئه‌م وه‌رزه‌ی لالیگاین.
* رۆژنامه‌ی بیڵدی ئه‌ڵمانیا: رۆبێرت لیڤاندۆڤسكی هێرشبه‌ری پۆڵه‌ندی یانه‌ی بایرن میونشن ناتوانێت له‌ یاریی گه‌ڕانه‌وه‌ به‌رامبه‌ر پاریس سانجێرمان ئاماده‌ بێت.
* له‌وكاته‌ی سۆڵشایه‌ر بووه‌ته‌ راهێنه‌ری یانه‌ی مانچێسته‌ر یونایتد هیچ یانه‌یه‌ك نه‌یتوانیوه‌ له‌ یاریی چوون و گه‌ڕانه‌وه‌دا له‌ پرێمه‌رلیگ شكست به‌ مان یونایتد بهێنێت، ئه‌مه‌ش كارگێری یانه‌ی شه‌یتانه‌ سووره‌كانی ناچار كردووه‌ كه‌ گرێبه‌سته‌كه‌ی له‌گه‌ڵ درێژ بكه‌نه‌وه‌ و مووچه‌كه‌شی زیاد بكه‌ن.
* یانەی ریال مەدریدی ئیسپانیا بەیاننامەیەکی فەرمی لەسەر پێکانی لوکاس ڤازکێز یاریزانی یانەکەیان بڵاوکردووە و لە بەیاننامەکەدا هاتووە، دوای ئەنجامدانی پشکنینە پزیشکیەکان، دەرکەوتووە ئەو یاریزانە لە ئەژنۆیدا تووشی پێکان بووە، بۆیە ماوەیەک لە یاریگاکان دوور دەکەوێتەوە.
* رۆژنامه‌ی ماركا: وادەی دوورکەوتنەوەی ڤاسكێز دیاری نییه‌ به‌ڵام پێشبینی كراوه‌ تاوەکو کۆتایی ئەم وەرزە نه‌گەڕێتەوە یاریگاکان.
* لوكاس ڤاسكێز یاریزانی یانه‌ی ریال مه‌درید له‌ یه‌كه‌مین لێدوانی دا دوای پێكانه‌كه‌ی له‌ هه‌ژماری خۆی له‌ تویته‌ر نووسیویه‌تی: سووپاسی هه‌موو ئه‌و كه‌سانه‌ ده‌كه‌م كه‌ په‌یوه‌ندییان پێوه‌كردم و له‌ ته‌ندروستیان پرسیم، هه‌موو هه‌وڵێك ده‌ده‌م بۆ ئه‌وه‌ی به‌هێزه‌وه‌ بگه‌ڕێمه‌وه‌، چونكه‌ ریال مه‌درید فێری كردووم كه‌ هه‌رگیز خۆم به‌ده‌سته‌وه‌ نه‌ده‌م.
* تۆماس موله‌ر هێرشبه‌ری یانه‌ی بایرن میونشن یه‌كه‌مین یاریزانه‌ له‌سه‌ر ئاستی پێنج خوله‌ به‌هێزه‌كه‌ی ئه‌ورووپا 16 ئاسیست بكات.
* رۆژنامه‌ی موندۆ دیپۆرتیڤۆ: بارسێلۆنا ده‌یه‌وێت گرێبه‌ست له‌گه‌ڵ جیرۆم بواتینگی به‌رگریكاری یانه‌ی بایرن میونشن واژۆ بكات.
* یانه‌ی به‌حری شاری به‌سرا به‌ بردنه‌وه‌ی له‌ یانه‌ی عازی باشوور به‌ فه‌رمی بووه‌ پاڵه‌وانی خولی تۆپی باله‌ی نایابی عێراق.

© 2017 Hawler