ئایار 07, 2021

لیڤه‌رپوول له‌ یه‌كه‌م بۆندی ماوه‌ی هاوینه‌ نزیك ده‌بێته‌وه‌

مامەیارە ئەحمەد - هەولێر

 

رۆژنامەی هەولێر، لە چوارچێوەی كۆهەواڵدا، رۆژانە تازەترین و گرینگترین هەواڵ و پێشهات و دەنگوباسە وەرزشییەكان بۆ گوێ و هزری خوێنەرانی دەگوازێتەوە، كە تێیدا پێشینهەواڵ بۆ گرینگترین و تازەترینیانە و بە هۆی فراوانیی بواری تۆپی پێ و فرەیی جەماوەر و هەواداری ئەو یارییەوە، پشكی شێر و زۆر بەر هەواڵەكانی ئەو یارییە دەكەون و لە كات و ئانوساتی پێشهات و هەواڵ و پاڵەوانیەتیی یارییەكانی دیكە، تیشكیان دەخرێتە سەر و پشكیان پاشگوێ ناخرێ، ئامانج لێی دانەبڕانی خوێنەرانە لە هەواڵ و ئاگەییە وەرزشییەكان و پەیبردنە بە سووچ و پەناكانی هەواڵە شاراوە و ئاشكرانەكراوەكان.

لیڤه‌رپوول له‌ یه‌كه‌م بۆندی ماوه‌ی هاوینه‌ نزیك ده‌بێته‌وه‌
ڕاپۆرته‌ مێدیاییه‌كانی ئینگلته‌را، ئاماژه‌ به‌وه‌ ده‌كه‌ن، یانه‌ی لیڤه‌رپوول نزیكه‌ له‌ یه‌كه‌م بۆندی هاوینه‌ی، كه‌ یاریزان ئیبراهیما كۆناتیی به‌رگریكاری یانه‌ی لایپزیگی ئه‌ڵمانییه‌.
ئه‌و یاریزانه‌ جێی ڕه‌زامه‌ندیی زۆر یانه‌ی به‌ناووبانگی ئه‌ورووپایه‌، به‌ڵام لیڤه‌رپوول یانه‌یه‌كی هه‌ره‌له‌پێشه‌ بۆ ده‌ستخستنی یاریزانی هێڵی به‌رگری، به‌ تایبه‌ت كه‌ ئه‌م وه‌رزه‌ به‌ ده‌ست پێكانی ریزه‌كانیان له‌ هێڵی به‌رگرییه‌وه‌ ده‌ناڵێنێ و هه‌ریه‌ك له‌ یاریزانان جۆی گۆمێز، ڤێرجێل ڤان دایك و جویل ماتی تووشی پێكان هاتوون و له‌ یارییه‌كانی یانه‌كه‌یان دابڕاون.
رۆژنامه‌نووسی ناسراوی رۆژنامه‌ی زه‌ ئه‌تله‌تیكۆ ده‌یڤید ئۆرنستین، ئه‌وه‌ی ئاشكرا كرد، كه‌ یانه‌ی لیڤه‌رپوول له‌ دانوستان بۆ ده‌ستخستنی ئه‌و یاریزانه‌ له‌ قۆناغێكی پێشكه‌وتوودایه‌.
ئاماژه‌ی به‌وه‌ش كردووه‌، كه‌ بۆنده‌كه‌ به‌ ته‌واوی نه‌گه‌یشتووه‌ته‌ خاڵی كۆتایی، به‌ڵام دانوستان قۆناغی زۆر باشی بڕیوه‌ و له‌ كۆتایی مسۆگه‌ركردنی بۆندی ئه‌و یاریزانه‌ی دڵی به‌رگریدان.
به‌ پێی ڕاپۆرته‌، به‌های مه‌رجسزای هه‌ڵوه‌شاندنه‌وه‌ی بۆندی ئه‌و یاریزانه‌ ده‌گاته‌ 40 ملیۆن یۆرۆ.
پێشتریش یانه‌كانی كیشوه‌ری ئه‌ورووپا، به‌ تایبه‌ت ریاڵ مه‌درید و به‌رشلۆنه‌ چاویان له‌سه‌ر ئه‌و یاریزانه‌ دانابوو.
كۆناتیی به‌رگریكار، ته‌مه‌نی 21 ساڵانه‌ و له‌ چه‌قی به‌رگری یاری ده‌كا، له‌ ساڵی 2017ـدا له‌ یانه‌ی سۆشوه‌ چووه‌ لاپیزیگ، له‌ ئاسته‌كانی ته‌مه‌نی هه‌ڵبژارده‌ی فه‌ره‌نسا به‌شداریی كردووه‌ و گه‌ییشتووه‌ته‌ هه‌ڵبژارده‌ی ژێر ته‌مه‌ن 21 ساڵانی ئه‌و وڵاته‌.
له‌گه‌ڵ دایۆت ئۆبامیكانۆی هاووڵاتی، ڕۆڵێكی باشیان له‌ یانه‌ی لایپزیگ بینیوه‌، كه‌ ئه‌ویش هاوینی دادێ ده‌چێته‌ بایرن میونش.

ناوبژیوانی یارییه‌كه‌ی سڕبیا و پورتوگال داوای لێبوردنی كرد
دانی ماكیلی، ناوبژیوانی یاریی نێوان سڕبیا و پورتوگال، كه‌ گۆڵێكی دروستی بۆ كریستیانۆ ڕۆناڵدۆ نه‌ژمارد، داوای لێبوردنی كرد.
ئه‌و ناوبژیوانه‌ هۆڵه‌ندییه‌، له‌ لێدوانێكدا بۆ رۆژنامه‌ی ئه‌بۆلای پورتوگالی، داوای لێبوردنی له‌ پای ئه‌و هه‌ڵه‌یه‌ كرد، كه‌ له‌و یارییه‌دا كردی و بووه‌ هۆی ئه‌وه‌ی دوو خاڵ له‌ كیسی هه‌ڵبژارده‌ی پورتوگال بچێ، له‌و یارییه‌ی له‌ چوارچێوه‌ی پاڵاوتنه‌كانی كیشوه‌ری ئه‌ورووپا بۆ گه‌یشتن به‌ مۆندیالی 2022 ئه‌نجام درا.
ئه‌و ناوبژیوانه‌ گوتی: داوای لێبوردن له‌ راهێنه‌ر فێرناندۆ سانتۆس و هه‌ڵبژارده‌ی پورتوگال ده‌كه‌م له‌ پای ئه‌وه‌ی رووی دا، وه‌كوو تیمی ناوبژیوان به‌رده‌وام ئامانجمانه‌ بڕیاری ڕاست و دروست و ئامانجپێك بده‌ین.

له‌ یاریی نێوان سڕبیا و پورتوگال، له‌ چوارچێوه‌ی كێبه‌ركێكانی پاڵاوتنی مۆندیالی 2022، كه‌ به‌ ئه‌نجامی 2-2 گۆڵ یه‌كسان بوو. كریستیانۆ ڕۆناڵدۆ، دوای ئه‌وه‌ی له‌ دواساته‌كاندا گۆڵێكی مسۆگه‌ری لێ ڕه‌ت كرایه‌وه‌ و تووڕه‌یی خۆی بۆ ڕه‌تكردنه‌وه‌ی گۆڵه‌ دروسته‌كه‌ی نه‌شارده‌وه‌، هه‌ر له‌ كاتی یارییه‌كه‌ و چه‌ند چركه‌یه‌ك پێش كۆتایی یارییه‌كه‌، نیشانه‌ی كاپتنی فڕی دا و یاریگه‌ی جێهێشت، دواتریش له‌ دووباره‌كردنه‌وه‌ی ڤیدیۆی یارییه‌كه‌دا، به‌ روونی ده‌ركه‌وت كه‌ ستیڤان میترۆڤیچی به‌رگریكاری سڕبی، تۆپه‌كه‌ی كاتێك گه‌ڕانده‌وه‌، هێڵی گۆڵی تێپه‌ڕاندبوو و ناوبژیوانی هۆڵه‌ندی دانی ماكیلی داوای كرد یارییه‌كه‌ به‌رده‌وام بێ، له‌ كاتێكدا سیسته‌می دووباره‌كردنه‌وه‌ی ڤیدیۆ نه‌بوو و ئه‌و سیسته‌مه‌ له‌ پاڵاوتنه‌كانی مۆندیالی 2022 په‌یڕه‌و ناكرێ، به‌ هۆی كه‌میی توانای ته‌كنیكیی هه‌ندێ وڵات بۆ دابینكردنی ئه‌و سیسته‌مه‌ و كارپێكردنی.

© 2017 Hawler