ئایار 07, 2021

لە هێرشی میلیشیا شیعەکان تەنها داعش قازانج دەکات

خالید ئه‌حمه‌د - هەولێر

 

چەند گروپێکی ناو میلیشیا شیعەکان لە سەنتەری بەغدا و هەروەها لەڕێگای شاڵاوە موشەکیەکانیانەوە هەوڵی تێکدانی سەقامگیری عێراق دەدەن، کە ئەوەش زەمینەیەکی لەبار بۆ خۆڕێکخستنەوە و بەهێزبونەوەی داعش دەڕەخسێنێت.

لە ڕاپۆرتێکی (فۆربس) دا هاتووە، ئەگەر میلیشیا شیعەکان ئەوانەی ئێران پاڵپشتیان دەکات بەردەوام بن لە بە ئامانج گرتنی هێزەکانی پێشمەرگەی هەرێمی کوردستان ئەوا قازانج بە داعش دەگەێنن. متمانە نێوان هێزەکانی بەرگری لە عێراق کەمدەکەنەوە.
ئەو گروپانەی ژێر چەتری حەشدی شەعبی لەوەتەی ساڵی (٢٠١٩)ەوە ناوە ناوە هێزەکانی ئەمەریکاش دەگرنە ئامانج، بەو ئاڵۆزیانەیان زیاتر سەقامگیری عێراق تێکدەدەن.
وە ئەگەر ڕوونبۆوە ئەو هەوڵە شەڕانیانە لەلایەن ئەو گروپانەی ژێر چەتری حەشدی شەعبیەوە ئەنجامدرابن ئەوا بێ متمانەیی زیاتر لەنێوان هێزە چەکدارییەکانی عێراق دروست دەبێت، وە کاردەکاتە سەر ئاستی هەماهەنگی نێوان هێزەکانی پێشمەرگە و سوپای عێراق و حەشدی شەعبی بۆ ڕووبەڕووبونەوەی تیرۆر لە عێراقدا.
سەرەنجام، بەغدا لەسەریەتی کۆنتڕۆڵی هێزە چەکدارەکان بە گروپە جیاوازەکانەوە بکات و ڕێگا نەدات شەڕانی بۆ سەر هێزە شەرعیەکانی بەرگری عێراق ڕووبدەن، دەنا داعش جارێکی دیکە دەبێتەوە بە هەڕەشە لەسەر سەقامگیری عێراق.
هاوپەیمانی دژی داعش بەردەوام دەبێت:
هاوپەیمانیەتی دژی داعش بەسەرکردایەتی ئەمەریکا جەخت لەسەر بەردەوامی چالاکیەکانیان دەکەنەوە لەناو عێراق و لەناو سووریادا بۆ ڕێگرتن لە هەستانەوە و بەهێزبوونەوەی داعش.
لەو بارەیەوە لە ڕاپۆرتێکی (زە ناشناڵ) دا هاتووە، هاوپەیمانیەتی دژی داعش هۆشداریداوە کە هێشتا داعش هەڕەشەیەکی گەورەیە لەناوچەکەدا و پێویستی بە بەردەوامی هەوڵی هاوپەیمانیەتیەکە و چالاکیە بەردەوامییەکان هەیە بۆ ڕێگرتن لە هەڕەشەکانیان.
لە کۆبونەوەی وەزیرانی دەرەوەی هاوپەیمانیەتی نێودەوڵەتی دژی داعش، (ئەنتۆنی بلینکن) وەزیری دەرەوەی ئەمەریکا گوتی، لە کاتێکدا داعش کۆنتڕۆڵی بەسەر ناوچەکاندا نەماوە و نزیکەی (٨ ملیۆن) کەس لە ژێر دەستیان ڕزگاربوون لە عێراق و لە سووریا بەڵام هەڕەشەکانیان هەر ماون.
هەڵبەتە لەو ماوەیەدا داعش چالاکیەکانی لە عێراق و هەروەها لە سووریاش زیادکردونەوە، وە وەزیرانی دەرەوەی وڵاتانی نێو هاوپەیمانیەتی دژی داعش پاڵپشتی دووبارەیان نیشانداوەتەوە بۆ هێزەکانی سوپای عێراقی و هێزەکانی پێشمەرگە، هەروەها بەردەوام دەبن لە هەماهەنگی نێوانیان.
هەر لەبارەی هەماهەنگی و بەردەوامی چالاکیەکانی هێزەکانی هاوپەیمانان، (جۆن گۆدفری) نێردەی تایبەتی بۆ هاوپەیمانیەتی دژی داعش گوتی، ئێمە بەردەوام دەبین و لەنزیکەوە چاودێری چالاکیەکانی داعش لە سووریا و ناوچەکە دەکەین، وە هەڵسەنگاندن دەکەین لەبارەی تواناییەکانی داعش بۆ خۆ ڕێکخستنەوەیان و ئەنجامدانی شاڵاوی تیرۆریستی.
لە ماوەی ڕابردوودا ناتۆ بڕیاریدا هاوکارییەکانی لە عێراق بەرفراوان بکات لە تیمی ڕاوێژکار و ڕاهێنەرەکانی لەناو عێراقدا، ئەوەش پاڵپشتیەکی باش دەبێت بۆ سەرجەم هێزە عێراقیەکان و یارمەتیدەر دەبێت بۆ بەرزکردنەوەی توانا سەربازییەکانیان.
شیاوی گوتنە، لە کۆبونەوەی وەزیرانی دەرەوەی وڵاتانی هاوپەیمانیەتی دژی داعش جەخت لە بەردەوامی هەماهەنگی و چالاکیەکانی وڵاتانی نێو هاوپەیمانیەتیەکە کرایەوە لەدژی چالاکی و جموجۆڵەکانی داعش لەناوچەکەدا.
هاوکات (ئەنتۆنی بلینکن) و هاوتا وەزیرەکانی سەرکۆنەی هێرشە بەردەوامەکانی هێزەکانی ژێر چەتری حەشدی شەعبیان کرد بۆ سەر پێگەکانی ئەمەریکا و هەروەها بۆ سەر هێزەکانی پێشمەرگە، (بلینکن) گوتی ئەو شاڵاوانە قبوڵکراونین.

© 2017 Hawler