شوبات 19, 2018

عێراق بەتەمای ئۆپەراسیۆنی سەربازییە لەو ناوچانەی ڕێڕەوی بەڕێکردنی نەوتی کەرکوکیان بەسەرەوەیە

هێزەکانی عێراقی بەتەمای ئەنجامدانی پلانی سەربازین لەناوچەکانی چیای حەمرین و دەوروبەری، کە ئەو ناوچانە چەند گروپێک چالاکی چەکداری تێدا ئەنجامدەدەن هێشتا لەژێر کۆنتڕۆڵی عێراقدا نین.

بەگوێرەی ڕاپۆرتێکی (ڕۆیتەرز) لەو نزیکانە عێراق پلانێکی سەربازی لەناوچەکانی حەمرین، لەنێوان کێڵگە نەوتیەکانی کەرکوک بەرەو خانەقین و بەرەو سنوری ئێران ئەنجامدەدات تاوەکو ئاسایشی ئەو ڕێگایە دابینبکات کە لەپلانیدایە نەوتی کەرکوکی پێدا بنێرێت بۆ ئێران

.
بەپێی ڕاپۆرتەکە هێزە عێراقیەکان هێشتا ئامادەکاری بۆ ئەو پلانە سەرباییە دەکەن، ڕۆژی دووشەممە بەرپرسانی عێراقی لەو بارەیەوە ئاماژەیان بەوەداوە ئەو ناوچە شاخاییانەی دەوروبەری حەمرین هێشتا لەژێر کۆنتڕۆڵی عێراقدا نین، وە مەترسین لەبەردەم ناردنی نەوتی ئەو ناوچانە بۆ ئێران.
ئەو بەرپرسانەی عێراقی بە (ڕۆیتەرز) یان ڕاگەیاندوە، ئۆپەراسیۆنەکە لەوانەیە لەو حەفتەیەدا دەستپێبکات، وە ئامانجی ئەو ئۆپەراسیۆنەکە گێڕانەوەی ئاسایشە بۆ ناوچەکانی چیای حەمرین، ئەو ناوچانەی کە دەکەونە نێوان کێڵگە نەوتیەکانی کەرکوک و، شارۆچکەی خانەقین لەسەر سنوری ئێران.

گروپەکانی چیای حەمرین:
بەگوێرەی ڕاپۆرتەکە دوو گروپ لەچیای حەمرین بونیان هەیە و چالاکی چەکداری ئەنجامدەدەن، بەرپرسانی عێراقیش ئاگاداری شێوەی ئەو گروپانەن کە لەناوچەکەدان.
بەرپرسانی عێراقی زانیاریان داوەتە ڕاپۆرتەکە لەسەر ئەو دوو گروپانە کە یەکێکیان چەکدارە سونیەکانی نێو ڕێکخراوی داعشن و ماوەیەکی درێژە لەوێ بونیان هەیە و چالاکی چەکداری و تیرۆریستی ئەنجامدەدەن، وە گروپەکەی دیکەی چیای حەمرین ناویان (لافیتە سپیەکان) ە و پێدەچێ کوردەکانی ناوچەکانی کەرکوک و توزخورماتووبن.
(لافیتە سپیەکان) باوەڕدەکرێ ئەو چەکدارانە بن کە لە خەڵکی کوردی ئاوارەبووی کەرکوک و توزخورماتون وە خۆیان پێک هێنابێ لەدوای ئەوەی هێزەکانی سوپای عێراقی و میلیشیاکانی حەشدی شەعبی بەپاڵپشتی ئێران شاڵاوی سەر کەرکوک و ناوچەکانی توزخورماتوویان ئەنجامدا لەمانگی تشرینی یەکەمی ساڵی ڕابردوودا، خەڵکی ئەو ناوچانەیان توشی ئازار و ئاوارەیی کرد.
(‌هیشام ئەلهاشمی) شیکەرەوەی بواری ئاسایش لە بەغدا بەڕاپۆرتەکەی ڕاگەیاندوە ئەو گروپەی (لافیتە سپیەکان) هیچ پەیوەستیەکیان نیە بە داعشەوە، هەروەها بەشێکیش نین لەهێزەکانی حکومەتی هەرێمی کوردستان

.
هەر لەبارەی شێوە و سەرکردایەتیکردنی ئەو گروپانەوە، بەرپرسێکی هەرێمی کوردستان بۆ ڕاپۆرتەکە ئاماژەی بەوەداوە، بەرپرسانی سوپای عێراقی زانیاریان لەسەر بوونی ئەو گروپانە لەو ناوچانەدا هەیە، بەڵام هیچ زانیارییەکی لەسەر شێوەی پێکهاتن و سەرکردایەتیکردنی ئەوانەوە نەدا، هەروەها ئەوەیشی ڕاگەیاندوە کە ئەو گروپەی (لافیتە سپیەکان) بەهیچ شێوەیەک پەیوەندییان نیە بە حکومەتی هەرێمی کوردستانەوە.
شیاوی باسکردنە، لەدوای هاتنی داعش بۆ عێراق لەساڵی (٢٠١٤) ەدا بەهۆی پێگەی ستراتیژی ناوچەکانی حەمرین و نزیکی لەو ناوچانەی کە داعش داگیریکردن، چالاکی تیرۆریستیان لەو ناوچانە ئەنجامدەدا

.
لەدوای ئەوەی هێزەکانی عێراقی لەژێر تەوژمی شاڵاوەکانی داعش لەناوچەکانی کەرکوک ڕایانکرد، هێزەکانی پێشمەرگە ئەو ناوچانەیان کۆنتڕۆڵکردەوە و، لەمەترسی و شاڵاوەکانی داعش پاراستیانن، خەڵکی ناوچەکان و کێڵگە نەوتیەکانیش لەژێر دەسەڵاتی حکومەتی هەرێمدا پارێزراوبون.
سوپای عێراق و میلیشیاکانی حەشدی شەعبی بەپاڵپشتی ئێران لەمانگی (تشرینی یەکەمی ساڵی ٢٠١٧) ەدا شاڵاوی سەربازیانبۆ ئەو ناوچانە ئەنجامدا و خستیانەوە ژێر کۆنتڕۆڵی خۆیان، لەوەتەی ئەو کاتەوە فرۆشتنی نەوتی ئەو کێڵگانە ڕاگیراوە.
هەروەها لەمانگی (کانونی یەکەمی ٢٠١٧) ەدا بەرپرسانی عێراقی پلانی ناردنی نەوتی کەرکوکیان بۆ پاڵاوگەکانی کرماشانی ئێران لەڕێگای تانکەرەوە ڕاگەیاند وەکو ڕێکەوتنێکی فەرمی نێوان عێراق و ئێران، بەپێی ڕێکەوتنەکەی نێوان عێراق و ئێران دەبوایە گواستنەوەی نەوت لەڕێگای ئەو تانکەرانەوە لەحەفتەی ڕابردوەوە دەستی پێکردبایە بەڵام بەرپرسانی کێڵگە نەوتیەکان ڕایانگەیاندوە لەبەر گرفتی تەکنیکی ئەو پلانە لەوادەی خۆی دواکەوتوە.

 

خالید ئه‌حمه‌د - هەولێر

Trending Now

ئه‌رشیف رۆژنامه‌كان

ک دووەم 07, 2018 Rate: 0.00

جۆلانەکەی عێراق

جۆلانەکەی عێراق

ک دووەم 08, 2018 Rate: 0.00

© 2017 Hawler

Please publish modules in offcanvas position.