شوبات 19, 2018

كەسایەتی دیاری شاری دهۆك و خەباتكار و پێشمەرگەی هەر دوو شۆڕشی ئەیلوول و گوڵان (نەجمەدین سەعید علی یوسفی) كۆچی دوایی كرد

لە رێككەوتی 12/2/ 2018 كەسایەتی دیاری شاری دهۆك و كوردستان و تێكۆشەر و پێشمەرگەی هەر دوو شۆڕشی ئەیلوول و گوڵان (نەجمەدین سەعید علی یوسفی) ماڵئاوایی یەكجارەكی لە ئازیزان و دۆستان و رێگای ئازادیخوازی كوردستان كرد.

خوالێخۆشبوو بێجگە لەوەی كەسایەتییەكی دیاری شاری دهۆك و خاوەن خەبات و شۆڕش بوو، كەسێكی خۆنەویست و خۆشەویستی خەڵكی هەژار و لێقەوماو بووە و لە هەموو وێستگەكانی ژیانی خۆی لە كاتی هەبوونی و نەبوونی هەموو كات لە خزمەت خەڵكدا بووە و بە دەنگ لێقەوماوانەوە چووە و لەو رۆژەی تیرۆرستانی داعش هاتنە مووسڵ هەر شەهیدێكی شەڕی داعش ماڵی لە سنووری پارێزگای دهۆك بێت، جا لە هەر نەتەوە و ئاین و لایەنێك بێت، تەنیا مەرج لە پێشەوەی شەڕ شەهید كرابێت بۆ خێزانی هەر شەهیدێك سێ ملیۆن دیناری سەرف كردووە و 500 تا 600 ملیۆن دیناریشی بۆ كڕینی خواردن و خواردنەوە و گاز و بەنزین و یارمەتی جۆراوجۆر بۆ پێشمەرگەكانی بەرەكانی پێشەوەی شەڕ لە میحوەری شنگال بگرە تا زوممار و تلسقۆف هاوكاری گەیاندە ئەو میحوەرانە و یارمەتی ئەو پێشمەرگانەی داوە.

رۆڵی وەك پێشمەرگەی هەر دوو شۆڕشی ئەیلوول و گوڵان و خەمخۆری بۆ هەژاران
قادر قاچاغ، بەرپرسی لقی 17ی پارتی لە شنگال، سەبارەت بە گرنگی و پێگەی خوالێخۆش بوو بۆ "هەولێر" دەڵێت، كەسایەتی نەجمەدین سەعید علی یوسفی، كە یەكێك بووە لە كەسە گرنگەكان و متمانە پێكراوەكان لای سەركردایەتی كورد و بارزانی نەمر و زۆر نزیكی سەرۆك بارزانی بووە، بە درێژایی شۆڕشی ئەیلوول كادیر و بەرپرسی ناوچەی پارتی لە ئامێدی و كارگێڕی لقی یەك بووە، وەكو كادیرێك و سەركردەیەك لە شۆڕشی گوڵان و لە كۆنگرەی 9 لە ساڵی 1979 ئەندامی كۆمیتەی ناوەندی بووە، هەموو كاتێك كەسێك بووە كە جێگەی باوەڕی بووە، بە كەسێكی دلۆڤان و ڕەحم دەناسرا، لە چەند ساڵی رابردووش خزمەتی كەسوكاری شەهیدان و هەژارانی دەكرد، هەر ئەوەش وای كردبوو كە لەناو كۆمەڵگەی كوردی ڕێزی لێ بگیرێت و ڕێزێكی تایبەتی خۆی هەبێت، لە شنگال تا مەندەڵی كەسێكی ناسراو بووە و هەموو ژیانی خۆشی بۆ ڕزگاركردنی كوردستان تەرخان كردبوو، بۆیە هەتا كۆچی دوایی كرد هەر خزمەتی كۆمەڵگەی دەكرد و سەرۆكی كۆمەڵەیەك بووە و خزمەتی شەهیدانی كردووە، بۆیە لە دەستدانی كەسێكی وەكو نەجمەدین سەعید علی یوسفی، كە كادیرێكی دێرین و سەركردەیەكی بە ئەزموون بوو هەر وا بە ئاسانی دروست نابنەوە، كەسی وەكو نەجمەدین یوسفی لە قوتابخانەی بارزانی نەمر پەروەردە كراون، ئەوانیش هەندێك كەسی دیكەیان پەروەردە كردووە، بۆیە كەسانی وەكو یوسفی هێما و ڕەمزن بۆ گەلی كورد، بۆیە لە دەستدانی كەسانی وەكو ئەو بۆشایەك دروست دەبێت و ئەو بۆشاییە وا بە ئاسانی پڕ ناكرێتەوە، بەڵام هیوادارین ئەو كەسانەی كە لەبەر دەستی ئەو پەروەردە بوونە، هەتا منداڵەكانی بەردەوامی بەو خەباتە بدەن بۆ ئەوەی ئەو بۆشاییە پڕ بكەنەوە، هەروەها ئەگەر ئێمە وەفادار بین بۆ كەسانی وەكو ئەوان دەبێت لەسەر خەبات و ڕێبازی ئەوان بەردەوام بین، تا دەگەینە ئارمانجی دوور و نزیك.

ژیاننامەی نەجمەدین سەعید علی یوسفی
نەجمەدین سەعید علی یوسفی، لە ساڵی 1941 لە دایك بووە و لە ساڵی 1957 لە بەغدا پەیوەندی بە پارتی دیموكراتی كوردستانەوە كردووە و لە ساڵی 1958 هەر لە بەغدا پەیمانگای تەواو كردووە و لە ساڵی 1961 پەیوەندی بە شۆڕشی ئەیلوولەوە دەكات و لە ساڵی 1962 دەبێتە كادیری پارتی و ساڵێك دوای ئەوە لە ساڵی 1963 دەبێتە ئەندامی لیژنەی ناوچەی ئامێدی و لە ساڵی 1964 دەبێتە بەرپرسی هەمان لیژنە و لە ساڵی 1965 دەبێتە قایمقامی شارۆچكەی ئامێدی و لە ساڵی 1970 دەبێتە كارگێڕی لقی یەكی پارتی لە دهۆك، لە ساڵی 1979 بووە ئەندامی لیژنەی ناوەندی پارتی، لە ساڵی 1983 تا 1984 بەرپرسی لقی یەك بووە و لە ساڵی 1985 تا 1986 بەرپرسایەتی زۆر شوێنی وەرگرتووە، بەتایبەتی خرێنە و لۆلان و شنۆ، لە ساڵی 1987 لە بالیسان بووە و بەشداری و سەرپەرشتی زۆر چالاكی و شەڕی كردووە، بەتایبەتی لە هەر دوو شۆڕشی ئەیلوول و گوڵاندا، لە كۆنگرەی پارتی لە ساڵانی 1964، 1966، 1970 لە دەرچوونی خولی یەكەمی كادیرانی پارتی و لە ساڵی 1969 چووە خزمەت بارزانی نەمر، لە ساڵی 1981 پەرتووكێكی لەسەر شۆڕشی ئەیلوول و گوڵانی بڵاوكردەوە و، هیوا و ئۆمێدی سەرەكی یەكڕیزی و یەكگرتنی گەلی كورد و سەربەخۆیی كوردستان و تەمەنێكی درێژ بۆ سەرۆك بارزانی بووە.
لە ساڵی 2000 كۆمەڵەی نیشتەجێكردنی خێزانی شەهیدان دامەزراند و هەڵبژێردرا وەكو بەرپرسی ئەو كۆمەڵەیە، كە ئەو كۆمەڵەیە توانی چەندین كار ئەنجام بدات، وەكو دروستكردنی 2150 خانوو بۆ خێزانی شەهید و پێشمەرگە پەككەوتووەكان لە پارێزگای دهۆك، هەروەها یارمەتی خێزانی شەهیدان و پێشمەرگەكانی پەككەوتوو و پێشمەرگە هەژارەكانی داوە و 10 پێشمەرگەی پەككەوتوو ڕەوانەی توركیا و هندستانی كردووە بۆ چارەسەر وەرگرتن".

دواترین دەستکاریکردن لەسەر چوار شەممە, 14 شوبات 2018 06:16

Trending Now

ئه‌رشیف رۆژنامه‌كان

ک دووەم 07, 2018 Rate: 0.00

جۆلانەکەی عێراق

جۆلانەکەی عێراق

ک دووەم 08, 2018 Rate: 0.00

© 2017 Hawler

Please publish modules in offcanvas position.