کانونی یەکەم 11, 2018

كورتە هەواڵەكانی ژینگە لە كوردستان و جیهان

•بەهۆی بەرزبوونەوەی نرخی بەنزین، چەند ڕۆژێكە لە زۆربەی شارەكانی فەرەنسا خۆپیشاندانە بۆ ئەوەی حكومەت بەخۆیدا بچێتەوە و داشكاندن لەو نرخە بكات كە بارێكی قوورسە بەسەر هاوونیشتمانیانەوە، بەو كارەش شارەكانی فەرەنسا تووشی جۆرێك لە پەشێوی و نا ئارامی هاتووە، بەرپرسان و لایەنگرانی ژینگە و ژینگە پارێزی دوور لە هەموو كەشە سیاسیەكان ڕاست و ڕەوان دەڵێن بەرزبوونەوەی نرخی بەنزین وا دەكات كە خەڵكی كەمتر ئۆتۆمبیل بەكار بهێنن و لەو ئامیرانەش دوور بكەونەوە كە بە سووتەمەنی كار دەكەن، بەو هۆیەوەش ژینگە تا ئەندازەیەكی زۆر سەلامەت دەبێ و لە دووكەڵی ژەهراوی بە دوور دەبێ و كاریگەری تەواویشی دەبێ لەسەر گەمبوونی زەوی كە لەو ساڵانەی ڕابردوو زەرەر و زیانێكی زۆری بە هەموو لایەك گەیاندووە.
•زستانی ئەمساڵ بەگشتی بە زستانێكی تەڕ و تووشی و باراناوی ئەژمار دەكرێ، بۆیە دەبینین لێرە و لەوێ بارانی بەخووڕ دەبارێ و لە ئەنجامدا لە زۆربەی شوێنەكان لافاوی زۆر هەڵساوە كە زیانی ماددی و گیانی زۆری لێ كەوتۆتەوە ئەوەش جۆرە نیگەرانیەكی زۆری لای خەڵكی پەیدا كردوە، هەندێكی دیكە لە هاووڵاتیان بەهۆی ئەو لافاوەوە گیریان خواردوە، بۆیە پێویستە بەر لە هاتنی لافاو و ئەو كارەساتە سروشتیانە تیمەكانی بەرگری شارستانی لە هەموو لایەكەوە لە ئامادەباشی تەواودابن بۆ كەمكردنەوەی زەرەر و زیانەكان.
• هەندێ جار بە درێژایی مێژوو لە حاڵەتی هەورە برووسكەوە كارەساتی جەرگبڕ ڕوویانداوە و قوربانی گیانی زۆری لێ كەوتۆتەوە، بۆیە بەداخەوە دەڵێین هەر لەو ڕۆژانەدا بەهۆی هەورە برووسكەوە پێشمەرگەیەكی فەرماندەی بارزان لە میحوەری مەخمور بەناوی (حوسێن حەسەن مزوری ) گیانی لەدەستدا و كۆچی دوایی كرد، لە كاتێكدا چەندین جار بەڕێوەبەرایەتی كەشناسی و بوومەلەرزە چەندین ڕێنمایی بۆ خۆپاراستن لەو دیاردەیە خستۆتە ڕوو كە لە كاتی هەورە برووسكەوە دەبێ یەكسەر مۆبایلەكانمان دابخەین و لە شوێنە مەترسیدارەكان دوور بین كە ئەستوون و تاوێرەكانی پەیوەندیی و گەیاندنی لێیە و لەو شوێنانە خۆمان بە دوور بگرین و چەندین ڕێنمایی بەسوودی دیكە كە لەو مەترسییە ڕزگارمان دەكەن، بەڵام داخەم ئێمە هێندە گوێی پێ نادەین، بۆیە بە زوویی ڕوو بە ڕووی زەرەر و زیان دەبینەوە.
•هۆشیاركردنەوەی هاووڵاتیان بۆ پارێزگاریكردن لە ژینگە كارێكی گرنگ و بەرچاوە تا هەموو لایەك لە بایەخ و گرنگی ئەو ژینگەیە بگەن و سنوورەكان نەبەزێنن، ئەگەرچی لە كوردستان چەندین ڕێكخراوی ژینگەیمان هەیە و بەو ئەركە هەڵدەستن، بەڵام پێویستە تاكەكانی نێو كۆمەڵیش بەو ئەركە نیشتمانی و ژیارییە هەڵسن و خۆیان لێ بێ بەری نەكەن، چونكە پاك و خاوێنی ژینگە سوود و قازانجی هەموو لایەكی تێدایە و ئەو كارە بە تەنیا ڕێكخرا و لایەنێكی دیاریكراو ناكرێ و دەبێ هەموو لایەك قۆڵ و باسكی مەردانەی لێ هەڵماڵین.

 

© 2017 Hawler