تشرینی دووەم 12, 2019

بۆچی زبڵ و پیسایی لە نێو ئۆتۆمبیل فڕێدەدەیە سەر شەقام؟

مایەی نیگەرانی و داخێكی زۆرە هەندێك لە خەڵكی وەك پێویست پاك و خاوێنی شار و وڵات لەبەرچاو ناگرن تەنانەت كەسانێك هەن بە ڕۆژ ڕووناك و بە بەرچاوی خەڵكانی دیكە لە نێو ئۆتۆمبیلەكانیانەوە پاشماوەی زبڵ و پیسایی خۆیان فڕێدەدەنە سەر جادە و شەقامەكان، بەو كارەش شارەكە پیس دەكەن و دیمەنێكی ناشیرین و ناشارستانیش پێشان دەدەن.

بۆیە ئەو باسەمان خستە بەردەم كۆمەڵێك كەس تا باری سەرنجی خۆیان لەسەر بدەن و بزانین ئەو كارە تا چ ئەندازەیەك قیزەونە و كۆمەڵگای مرۆڤایەتی تاسەر ئێسقان ڕقی لێیەتی و بە كارێكی ناڕەوای لەقەڵەم دەدات، سەرەتا (سەید شوان) دەربارەی ئەو دیارەدە ناشارستانیە دەڵێ: بەڕای من ئەوانەی ئەو جۆرە كارانە دەكەن كەسانی بێ هۆش و نەخۆشن، وەك پێویست بایەخ و گرنگی بە ژینگە نادەن، ئەو كەسانە بەر لەوەی ئەو كارە چەوتە بكەن دەبێ بیر لەوە بكەنەوە كە ئەوەی ئەوانە دەیكەن ئەوا كەسێكی دیكە هەڵیدەگرێتەوە و جادەكە خاوێن دەكاتەوە، جا ئەوانە باوكی منە یان برایەكی تۆیە، لە هەمووشی بەرچاوتر ئەوەی ئەو زبڵ و پیساییانە پاك دەكاتەوە مرۆڤە مرۆڤ، دواتر ( هێرش محەمەد) بۆ ئەو پرسە دەڵێ: هەڵگرتنەوەی بوتڵێك ئاو بۆ ئێمە یەك چركە دەخایەنێت، بەڵام بر جوانی سروشت كاتێكی زۆر دەخایەنێت، بۆیە دەبێ هەموومان بەیەكەوە ژینگە بپارێزین و كارەكە بەهی خۆمان بزانین، چونكە بە فڕێدانی پاشماوەی پیساییەك ئەوا پشتی مرۆڤێكی ماندوو دەچەمێتەوە، بۆیە دەبێ هەموومان بەبێ جیاوازی ڕێز لە سروشت بگرین، هەروەها (سروود بەكر) یش دەڵێ: خۆزگە تاك بە تاكی ئەو كۆمەڵگەیە فێردەبوون چۆن مامەڵە و هەڵسووكەوت لەگەڵ پاك و خاوێنی ژینگە بكەن، بۆیە بەداخەوە دەڵێین هەموومان دڵگرانین بەوەی كە دەبینین كەسانێك زبڵ و پیسایی خۆیان لە جامی ئۆتۆمبیلەكانیان فڕێدەدەنە سەر جادە و شەقامەكان و وەك پێویست هەست بە لێپرسینەوە ناكەن، ڕاستە ئێمە لە ڕووی پۆشین و كۆشك و تەلار و ئۆتۆمبیلی بەرزەوە بەرەو پێشەوە چووین، بەڵام لە ڕووی بیركردنەوە لە دواوەین، هەورەها (فریاد سیان) چەند وشەیەكی جوان ڕیز دەكات و دەڵێ: ئەنجامدانی ئەو جۆرە كارانە دەوەستێتە سەر ڕۆشنبیری تاك، چونكە هەندێك مرۆڤ هەن نەخۆشن و لە سوود و زیانەكانی ژینگە ناگەن ئەوەش زیاتر لە كۆمەڵگەی ئێمەدا زۆر بڵاوە، دوا جار (پشتیوان ساڵح خدر ) دەڵێ: تەواوی كۆمەڵگە بدوێنە دەڵێ كارێكی كارێكی ناشیرن و ناشارستانیە كەچی ئەنجامیشی دەدەین، ئەوەش بۆ ئەوە دەگەڕێتەوە كە بە باشی پەروەردە نەكراوین، ئەوەشی ئامۆژگاریمان دەكات خۆی كارەكە ئەنجام دەدات، بۆیە دەبێ هەموو لایەكمان بە شێوەیەكی ڕاست و دروست مامەڵە لەگەڵ ئەو پرسە گرنگ و چارەنووسسازە بكەین.

© 2017 Hawler