ئاب 26, 2019

ئایا كاركردنی زۆر مرۆڤ تووشی نەخۆشی دەكات؟

كاركردن بەشێكی ژیانی هەموو مرۆڤێك داگیر دەكات و پێویستە هەر مرۆڤێك بەرهەمی هەبێت و جیا لە دابینكردنی بژێوی رۆژانەی خۆی و خێزانەكەی، پێویستە لەو رێگەوە خۆی و كارامەیی و پسپۆڕی خۆی لەو بوارەی كاری تیادا دەكات بسەلمێنێت، بەڵام تێبینی ئەوە دەكرێت بەتایبەتی لە شارە گەورە و جەنجاڵەكان و وەك پێویستییەكی سەردەم و جیا لە ژیانی سادە و گوند، مرۆڤ پێویستی بە سعاتی زیاتری كاركردن هەیە و ناچارە دوو شەفت كاركردن یان شەوانە كار بكات، ئەوانەش هەمووی كار دەكەنە سەر جۆری ژیان و چالاكییە كۆمەڵایەتی و تەندروستییەكەیەوە.

كۆمەڵەی دڵی ئەمەریكایی رای گەیاند كە كاركردن بۆ ماوەیەكی دوورودرێژ و بەردەوامبوون بەو شێوەیە بۆ زیاتر لە 10 ساڵی بەردەوام و لەسەریەك، مەترسی تووشبوون بە سەكتەی مێشك و چەندان نەخۆشی تر زیاد دەكات، وەك ماڵەپەڕی "ساینس دەیڵی"، بڵاوی كردەوە.
توێژەران دەستیان كرد بە شیكردنەوەی داتاكانی نزیكەی 143 هەزار فەرمانبەری فڕەنسایی تەمەنیان لە نێوان 18-69 ساڵ بوو و گەیشتنە ئەو ئەنجامەی كە ئەوانەی بۆ چەند سەعاتێكی دوورودرێژ كاریان كردووە بە بەردەوام و بۆ ماوەی 10 ساڵ زیاتر، مەترسیی زیاتری تووشبوونیان بە سەكتەی مێشك بە رێژەی 45% لەسەرە زیاتر لەچاو ئەوانەی كەمتر كار دەكەن.
كۆمەڵەكە ئاشكرای كرد كە كاركردن بۆ سەعاتی دوورودرێژ، واتە مانەوە لە نووسینگەی كار بۆ ماوەی زیاتر لە 10 سەعاتی رۆژانە و ماوەی 50 رۆژ بەلایەنی كەم لە هەفتەیەكدا. ئەوان بەتێپەڕبوونی كات كاریگەریی نەرێنی ئەوەیان بەتایبەتی بۆ سەر تەندروستیی جەستەیی و مێشك و لایەنی دەروونییەوە بۆ دروست دەبێت.
زانایان دەڵێن پێویستیان بە توێژینەوەی زیاتر لەو بارەوە هەیە بۆ دووپاتكردنەوەی ئەو ئەنجامانە، لەوكاتەی ئەوان هۆكارەكەی هەروەها دەخەنە ئەستۆی كاركردنی نارێكخراو و كاری شەوانە و سترێسی كار كە بە شێوەیەكی نەرێنی كار دەكاتە سەر تەندروستیی فەرمانبەران. بۆیە دەركەوتووە كە كاركردن بۆ سەعاتی زیاتر و بەردەوام سوودی بۆ خاوەن كار و كۆمپانیا و كەسەكە بە بەراورد بە كاریگەری نەرێنی بۆ سەر تەندروستیان ئەوەندە نییە.
توێژینەوەكانی پێشوو ئاماژەیان كردووە كە ئەو كەسانەی هەفتانە 80 سەعات كار دەكەن، بەرهەمیان كەمترە لەوانەی دوای دەوامێك روو لە ماڵەوە دەكەن، سارە گرین كارمیشێل، توێژەر و رۆژنامەوان ئاماژەی كردووە، كاركردنی فەرمانبەر و كارمەند بۆ سەعاتی زیاتر ئاستی رارایی و مەترسی تووشبوونیان بە چەندان نەخۆشی زیاتر دەكات وەك شەكرە و نەخۆشیی دڵ و سەكتەی مێشك، جیا لەوەی زیاتر هەست بە ماندووبوون دەكات و بەوەش وا دەكات ئەنجامدانی ئەركە ئاساییەكانی رۆژانەی لا زەحمەت بێت و لە كاركردنیشدا زیاتر هەڵە بكات.پێشتریش لە 2018 توێژینەوەیەكی تر ئاشكرای كرد كە ئەو كەسانەی زیاتر لە 45 سەعات لە هەفتەیەكدا كار دەكەن، زیاتر ئەگەری تووشبوونیان بە نەخۆشیی شەكرە هەیە.

 

ماكوان عيززه‌‌ت-هەولێر

© 2017 Hawler