حوزەیران 17, 2019

سووتانی دەغڵ و دانی جووتیاران و زیانەكانی بۆ سەر ژینگە

ماوەیەكە بەهۆی هۆكاری جیا جیاوە لێرە و لەوێ دەغڵ و دانی برا جووتیارەكان دەسووتێ و دەبێـە سووتماك، هەر بۆیە بەو كارە خراپە لە چەندین ڕووی ماددی و مەعنەوی زەرەر و زیانێك زۆر بە برا جووتیارەكان گەیشت، هەر بۆیە سەرچاوەكانی هەواڵ لە تەواوی میدیاكانەوە هێما بۆ ئەوە دەكەن كە لە ماوەی مانگێدا لە تەواوی عێراق و كوردستان 272 حاڵەتی ئاگركەوتنەوە لە زەوییە كشتوكاڵیەكان تۆماركراوە بەو هۆیەوە 37 هەزار دۆنم زەوی سووتاوە، بۆیە ئێمە بە نیگەرانیەوە باس لەو ڕووداوە جەرگبڕانە دەكەین و زیاتر زەرەر و زیانەكان بۆ سەر ژینگە باس دەكەین كە جگە لە زەرەر و زیانە ماددیەكان چ حاڵەتێكی دەروونی لای خەڵك دروست كردوە، تەنانەت ئاژەڵە كێوییەكانیش ئەوانەی كاتی زاوەزێیانە لەو گرفتە ناخۆشە بێبەش نەبوون، بۆیە بە سووتانی ئەو زەوییە كشتوكاڵیانە زیانێكی یەكجار زۆر بە ژینگە گەیشت، بۆیە هەموو ئەوانەی لە بواری ژینگە كار دەكەن یان دۆستی ژینگەن هێما بۆ ئەوە دەكەن كە سووتاندنی دەغڵ و دان و پاوان گەورەترین تاوانە بەرامبەر بە ژینگە و سروشتی كوردستان دەكرێ، هەروەها جێگای داخە بۆ كەسانێكی ویژدان مردوو كە ئەو كارە قێزونە دەكەن و ستەم لە خودی خۆیان و هەموو مرۆڤایەتی دەكەن، چونكە ژینگە بە تەنیا مولكی تاكە كەسێك نیە، بەڵكو ژینگە موڵكی هەمووانە، بۆیە بكەرانی شایانی ئەوەن توونترین سزایان بەسەردا جێبەجێ بكرێ بۆ ئەوەی ببێتە پەند بۆ هەموو ئەوانەی كە دیانەوێ ئەو جۆرە تاوانە ئەنجام بدەن.

 

محەمەد سەعید كوردە - هه‌ولێر

© 2017 Hawler