ئازار 22, 2019

ژینگەی كوردستان لە وەرزی بەهاردا

ماوەیەكی دیكە و ڕێك لە ڕۆژی نەورۆزدا پێ دەنێینە وەرزی بەهار ئیدی گەشت و سەیرانی هاووڵاتیان بەرەو سەیرانگا و دەشت و درەكان دەست پێدەكەن بۆ ئەوەی چەند چركەساتێكی خۆش بەسەر ببەن و هەوایەكی پاك هەڵمژن، خۆشبەختانە ئەمساڵ بارانێكی زۆر باش باری و ئەمساڵ بەهارەكەی خۆشە و هەموو بستە خاكێك چەشنی مافوورێكی سەوز و ئاڵا و واڵا بە چەندین گوڵی ڕەنگا و ڕەنگ نەخشاون، بۆیە بەڕاستی هی ئەوەیە كە ڕێز لەو سروشتە جوان و ڕەنگینە بگرین بە پاشماوەی خۆراك و فڕێدانی كەلوپەلی ماوە پیسی نەكەین، چونكە ئەو شوێنە دڵگیرانە موڵكی هەموو كەسێكە و دەبێ هەموومان وەكو یەك سوودی لێ ببینین، وەك هەموو ساڵان لایلۆنی زبڵ و پاشماوەی خۆراك لەگەڵ خۆمان ببەین كە هەڵساین هەموو پاشماوەی خۆمانی تێ بكەین و نەهێڵین پیس ببێت، لەلایەكی دیكەوە دەبێ بە هەموو لایەكمان هەوڵی ئەوە بدەین دار و درەختەكان نەشكێنین كە وەك ئەركێكی نیشتمانی بۆ جوانی ئەو سروشتە ڕەنگینە چێنراون، چونكە پاراستنی هەموو ئەوانە بۆ سوود و قازانجی هەموو لایەكمانە.

 

محەمەد سەعید كوردە - هه‌ولێر

© 2017 Hawler