تشرینی دووەم 16, 2018

دەرباز شێرزاد: پێویست ناكات من ساڵ بژمێرم و كێبڕكێ بكەم لەگەڵ مێژوو بۆ ئەوەی بەشێوەیەكی خێرا ئەلبوومی گۆرانی بەرهەم بهێنم!

هونەرمەندی گۆرانیبێژی لاو (دەرباز شێرزاد) یەكێكە لەو هونەرمەندە لاوانەی خاوەنی دەنگ و سەدایەكی هونەریی جوانە، ئەو هونەرمەندە خەڵكی دەڤەرە جوانەكەی رەواندوزی شاری هەولێرە، لە ساڵی (2005) یەك ئەلبوومی گۆرانیی بڵاو كردۆتەوە، لەدوای ئەو ئەلبوومە هیچ بەرهەمێكی بەشێوەی ئەلبووم بەرهەم نەهێناوە، بەڵام چەند گۆرانییەكی بەشێوەی "سینگل" تاك بەرهەم هێناوە و كلیپی كردووەو لە رێگەی تیڤیەكان بڵاوی كردۆتەوە، لەمیانەی دیدارێكدا بۆ خوێنەرانی "هەولێر" تیشك دەخاتە سەر چەند لایەنێك لە كارە هونەرییەكانی بەتایبەتی بەرهەمهێنانی (2) گۆرانیی تازەی، كە بەنیازە یەكێكیان بەو نزیكانە كلیپی بۆ بكات.
لە دەستپێكی قسەكانیدا (دەرباز شێرزاد) لە بارەی هۆكاری نەبوونی بەرهەمی تازەی بەتایبەتی ماوەی نزیكەی (13) ساڵە سیدی تازەی نەبووە گوتی : "ڕاستە ماوەی (13) ساڵە ئەلبوومی گۆرانییم نەبووە، لە ساڵی (2005) لەو ساتەوەی ئەو سیدیەشم بەرهەم هێنا، لەو كاتەوە ئەوەم لە مێشكم دانا، كە پێویست ناكات من ساڵ بژمێرم و كێبەركێ بكەم لەگەڵ مێژوو بۆ ئەوەی بە شێوەیەكی خێرا ئەلبوومێكی گۆرانی بەرهەم بهێنم، چونكە هونەرمەندبوون پەیوەست نیە بە هەبوونی بەرهەمی زۆر، ئێمەی كورد ئەگەر سەیری مێژووی گۆرانیمان بكەین، دەبینین هونەرمەندمان هەبووە بەرهەمەكانیان نەگەیشتۆتە (20) گۆرانی كەچی بوون بە ئەستێرەو ناوی زۆر دیار لەوانەش هەریەك لە هونەرمەندانی گەورە (كەریم كابان و شەماڵ سائیب)ـو چەندیین هونەرمەندی دیكە، بە پێچەوانەوە ئێستا دەبینین هونەرمەندمان هەیە لە ساڵێكدا (2) سیدی و مانگی (2) كلیپ بڵاو دەكاتەوە بەڵام تەنها سێ بۆ چوار گۆرانییان چۆتە ناو خەڵك و هیچی دیكە، بۆیە هونەرمەند بوون بە بەرهەمی زۆر و رێزكردنی كلیپ نیە!".
لەبارەی ئەو ڕەوشەی ئێستا گۆرانیی كوردیی پێدا تێپەڕ دەبێت، ئایا ئاستی گۆرانیی كوردی بەرەو پێشەوە رۆیشتووە؟ لەمبارەیەوەش (دەرباز) گوتی : "هونەری گۆرانیی كوردی لە رووی تەكنیكی تۆماركردن و ستۆدیۆ میوزیك زۆر هەنگاوی باش و گەورەی ناوە، خاوەنی میوزیكژەنی زۆر دیارو پەنجە زێرینین، لەرووی وێنەگرتنی ڤیدیۆ كلیپیشەوە بێگومان پێشكەوتنی باش هەیە، بەڵام لە رووی ناوەرۆكی گۆرانییەوە بەداخەوە لە (10) گۆرانی بە سوتفە گۆرانییەكی باش نابیستی، كە خاوەنی تێكستێكی باش و ئاوازێكی خۆماڵی بین، من وای دەبینم هونەری گۆرانی كوردی رۆژ لەدوای رۆژ بەرەو دواوە هەنگاو دەنێت، بەشێكی ئەو هۆكارەش ئەوەیە ئێمە كۆمەڵێك هونەرمەندی زۆر باشمان بێدەنگیان هەڵبژاردووە بۆیە ئەو كاریگەریەی دروست كردووە!".
هونەرمەند (دەرباز شێرزاد) لەبارەی هەبوونی بەرهەمی تازەی گوتی : "من ئەگەرچی (13) ساڵە بەرهەمی تازەم نەبووە، بەڵام گۆرانیم بەشێوەی "سینگل" تاك هەبووە، ناوە ناوە گۆرانییەكی تازە بەشێوەی دەنگ و ڤیدیۆ كلیپ بڵاو كردۆتەوە، ئێستاش (2) گۆرانی تازەم لەبەردەستە، یەكێكیان لە ژێر ناوی (تا دڵی منت بەدەست هێنا) كاری دەنگ و میوزیكی لەلایەن هونەرمەندی میوزیكژەن (نیهاد سابیر) تەواو بووە، تەنها ماوە كلیپی بكەم، هەروەها گۆرانیی (فاتمۆكێ) كە گۆرانییەكی كرمانجیەو لەباوكی ئازیزم گوێم لێ بووەو، وەرم گرتووە، لە ئێستادا ئامادەكاری بۆ ئەو بەرهەمەش دەكەم و لە ئێستادا كاری دەنگی تەواو بووە تەنها ماوە كلیپی بۆ بكەم، هەروەها خەریكی ئەوەشم لاوكی (ئەرێ گوڵێ) كە یەكێكە لەبەرهەمە نایابەكانی هونەرمەندی بە ئەزموون (هاوتا ئەسعەد) پێشتر بە دەنگی ئەو تۆمار كراوە بەنیازم تۆماری بكەمەوە، ئەویش یەكێك دەبێت لە بەرهەمە تازەكانم، ئومێدم وایە لە ئایندەیەكی نزیكدا كارەكانیان تەواو بێت و بڵاوی بكەمەوە".
لە كۆتایی دا هونەرمەند (دەرباز) لەبارەی بەشداریكردنی لەشەوە ئاهەنگەكان، كە بە (لایڤ میوزیك) ناسراوە گوتی : "ماوەیەكی باش بەشدارییكردنم هەبوو، بەتایبەتی لەشاری سلێمانی، جار جارەش لەهەولێری پایتەخت ئامادەیم دەبوو، بەڵام ماوەیەكە بەیەكجاری دوور كەوتومەتەوەو، بەشداری هیچ شەوە ئاهەنگێك ناكەم، دیارە ئەوەش مانای ئەوە نیە بەكارێكی باشی نازانم بەڵكو ئێستا خەریكی ئیشكی دیكەی باشترم، واتە بەشداریكردنی من بۆ دەستكەوتێكی مادی بووە، جگە لەوەش بۆ هونەرمەند بەشداریكردنی لە (لایڤ میوزیك) كارێكی باش و گونجاوە!".

 

© 2017 Hawler