تشرینی دووەم 16, 2018

لە ساڵیادی كۆچی دوایی هونەرمەند (شەماڵ سائیب)دا دەنگێک کە لەبیر ناچێتەوە

زۆر لە هونەرمەندە كوردە كۆچكردوەكان هێندە بەرهەمیان زۆرە بە نووسینێك و دوان تەواو نابن، بۆیە ئێمە تەنیا وەك ڕێز و وەفایەكی بچووك بە پێویستی دەزانین لە ساڵیادی كۆچی دواییان چەند وشەیەكیان دەربارە بنووسین كە لە ئاست گەورەیی ئەواندا بێت، دیارە ماوەی 32 ساڵ لەمەوبەر ڕۆژێكی ناخۆش و حەزین بوو لە مێژووی هونەر و موزیكی كوردیدا، ئا لەو كات و ساتەدا شار خرۆشا و تێكرا تارای ڕەشی پۆشی، چونكە لەو چركە ساتەدا دڵی هونەرمەندی دەنگخۆش (شەماڵ سائیب) لە لێدان كەوت و بەو كۆچەی درزێكی گەورەی بۆ هەموو لایەك دروست كرد، بەو كۆچە خەڵكی بە جارێك كەوتە ماتەم و تازیە باریەوە، شەماڵ سائیب خاوەنی چەندین گۆرانی بە جۆش و خرۆش بوو وەك ئەرێ لەیلێ، شوانە هەی شوانە، هاتی بۆ هاتی، هەی بەردە بەردە، هاوار هاوار، ئازیز بەهارە، خۆزیە دنیام هەبوایە، دەمەكەت بێنە و چەندین گۆرانیی دیكە، ئەو گۆرانیە هەمیشە لە گوێچكەی هەموو لایەكمان دەزرنگێتەوە، شەماڵی هونەرمەند گەلێك خاوەن كەسایەتیەكی بەرز بوو بەهۆی خراپی باری گوزەرانیەوە چەندین جار عوودەكەی خۆی فرۆشتوە تەنیا بۆ ئەوەی بە سەربەرزی بژی و سەر بۆ هیچ كەسێك دانەنوێنێ، شەماڵ سائیب ناوی تەواوی شەماڵ جەلال ئەحمەدە و لە 12 ی كانونی یەكەمی ساڵی 1930 لە شاری سلێمانی لەدایك بووە و بەهۆی حەز و ئارەزووی زۆری بۆ دنیای هونەر و گۆرانی گوتن لە ساڵی 1947 بەشی موسیقای پەیمانگەی هونەرە جوانەكانی بەغدای تەواو كرد، دواتر لە ساڵی 1955 بڕوانامەی بەكالۆریۆسی لە كۆلیژی ئادابی زانكۆی بەغدا بەدەستهێنا، ئەو هونەرمەندە بەرزە جگە لە گۆرانی گوتن و ئاواز دانان هەر لەو ساڵەدا توانی لەگەڵ هەریەك لە هونەرمەندانی دیكەی وەك قادر دیلان و ولیەم یوحەننا و بەهجەت ڕەشید و حاتەم سەعید و نەجات عەبدە و هادی عەنبەر و چەند هونەرمەندێكی دیكە تیپی موسیقای (مەولەوی) دابمەزرێنێ كە ئەوسا تیپێكی پڕ بەرهەم بوو، پاشان ساڵی 1968 بۆ درێژەدان بە خوێندن چوە وڵاتە یەكگرتووەكانی ئەمریكا و توانی بڕوانامەی ماستەر لە بەشی مێژوو بەدەست بێنێ، دواتر بەهۆی زیرەكی و لێهاتوویی خۆیەوە بڕوانامەی دكتۆراشی بەدەستهێنا و بووە مامۆستا زانكۆ، بەڵام بە داخێكی زۆرەوە ئەو هونەرمەندە بەرزە ڕۆژی 8 ی مانگی تشرینی دووەمی ساڵی 1986 بەهۆی نەخۆشیی دلاەوە كە ماوەیەكی زۆر پێوەی ناڵاند لە ئەنجامدا دڵە گەورەكەی لە لێدان كەوت و بۆ دوا جار چاوە پڕ لە خۆزگەكەی لێك نا و ماڵئاوایی لێكردین و تەرمەكەشی لە نێو ئاپۆرای جەماوەردا لە گۆڕستانی گردی سەیوان بە خاك سپێردرا، بەو كۆچەش كەلێنێكی گەورە كەوتە نێو دنیای گۆرانی و موزیكی كوردی كە هەرگیزا و هەرگیز ئەو كەلێنە پڕ نابێتەوە. 

© 2017 Hawler