تشرینی یەکەم 16, 2018

سیمپولیزمی ڕەنگەكانی كوردستان لە پۆڵەندا گەشایەوە

 لە شاری كراكۆڤی وڵاتی پۆڵەندا پێشانگایەك بەناونیشانی "سیمبولیزمی ڕەنگەكانی كوردستان" بۆ حەوت لە هونەرمەندانی كوردستان كرایەوە، كە لەلایەن ڕۆتاری كلوبی نێودەوڵەتی، فۆت- پیێنكنا فۆتۆگرافیا، و دۆمپۆلۆنی ڕێكخرابوو، سەرەتای كردنەوەی پێشانگاکە بەئامادەبوونی مێوانێكی زۆر و پێشکەشكردنی چەند وتارێك لەلایەن بەرپرسانی ئەو وڵاتەو ڕێكخەرانی ئەم پێشانگایە دەستیپێكرد، دواتر دیاری وەزارەتی ڕۆشنبیری و لاوانی هەرێمی كوردستان و پەیمانگەی هونەرەجوانەكانی هەولێر لەلایەن (د.زیاد حسین گەردی) پێشکەش بە بەرپرس و ڕێكخەرانی ئەم چالاكیە هونەریە كرا، پاشان چەند پارچە مۆسیقایەكی کوردی میوزیكژەنانی کوردستان پێشكەشکرا، لە بەشێكی پێشانگاكەدا خواردن و شیرنەمەنی کوردەواری سازكرابوو بۆ ئامادەبووان بەمچەشنە سەرجەم تابلۆو ڕەنگ و كارەكان جێی ڕەزامەندی و سەرسامی ئامادەبووان بوو، كە دەستخۆشیان لە نیگاركێشانی کوردستان دەكرد. لە لێدونێكیدا زیاد گەردی سەرپەرشتیاری ئەم پێشانگایە بە (ھەولێر)ـی ڕاگەیاند: دەمانەوێ لەڕێگەی نەخشاندنی ئەم رەنگانە ئەوە پیشانی جیهان بدەین، کە كوردستان شوێنی فرەڕەنگی و پێكەوە ژیان و ئارامیە ڕەنگەكانی كوردستان پەیامی ئاشتی و جوانی كوردستانی هەڵگرتووە، ئەوەی لە تواناشماندابێت لەم جۆرە کارانە بەردەوام دەبین بۆ گەشەپێدانی فەرهەنگ و ڕەوتی هونەری كوردی، هیواداریشم كارەكانمان جێی ڕەزامەندی هەموولایەك بوو بێت و دەستخۆشیش لەنیگاركێشەکانمان دەکەم، هەروەها سوپاسی تایبەتیشمان بۆ کۆنسوڵگەری پۆڵەندی لەهەولێر دەگەیەنین لە هاوكاریكردنیان بۆ سەرخستنی ئەم كارە هونەریە.
دەربارەی پەیامی پێشانگاكە گەردی گوتی: پەیام لەکردنەوەی ئەم پێشانگایەدا زیاتر ناساندن و پیشاندانی ئاستی ڕەنگ و هونەری كوردی بەئەورووپیەكان و پۆڵەندیەكان بوو، کە کوردیش خاوەن هونەرێکی ڕەسەن ودێرینە و نەخشاندنی تابلۆ ڕەنگیەكانی هیچ لەئاستی هونەری كۆمەڵگا پێشكەوتووەکان نزمتر نیە، بەڵکو زۆر لە پێشیشە، هەروەها هەر لە ڕێگەی ئەم پێشانگایەدا ویستمان بەكێشانی تابلۆ ڕەنگینەکان ئەم پەیامەش نیشان بدەین، كە کوردستان شوێنی فرە ڕەنگی و پێكەوەژیانی ئاشتیانەیە و هەروا بەفرەرەنگیش دەمێنێتەوە، ڕەنگەكانیش پێکەوە ئارامی و ئاشتی و جوانیەكی لە ڕادەبەدەر بە مرۆڤ دەبەخشێ، هەربۆیەش ناونیشانی پێشانگاکەمان ناونابوو "سیمبولیزمی ڕەنگەكانی كوردستان' كە هەر ڕەنگەو هێمای بەشێکی ژیانی كوردستانی هەڵگرتبوو.لەبارە ڕۆڵی ڕاگەیاندن لە نیشاندانی ئەم پێشانگایەش دەڵێت: پێموایە زۆرێك لە ڕاگەیاندنەكان کەمتر بایەخ بەم جۆرە كارو چالاكیانە دەدەن وەك ئەوبایەخەی بە چالاكیەكی سیاسی دەدرێ، هەرچەندە زۆربەی چالاكیە هونەریەكانی كوردستان بەشێوەیەكی نارستەوخۆشبێ پەیامی سیاسیش دەگەیەنێ بەوەی کە میللەتێك بەناوی خەڵكی کوردستان بوونی هەیە و خاوەنی کەلتوور و زمان و خاك و نەریتی خۆیەتی، بۆ ئەمكارەش چەندین دەزگای راگەیندنی کوردستان پێوەندیان پێوەكردم و زانیاریان وەرگرت، بەڵام داوای لێبوردنیان کرد و گوتیان ناتوانین پەخشی بکەین، چونکە ئێمە تەنها كارو چالاکی سیاسی بڵاودەکەینەوە.
(زیاد گەردی) هەڵبژاردنی وڵاتی پۆڵەندای بۆ ئەم پێشانگایە بە گرنگیزانی و گوتی: پۆلەندامان هەڵبژارد چونكە هونەر لەلای خەڵکی ئەم وڵاتە نرخ و بەهایێکی زۆر بەرزی هەیە هەروەها زۆر رێز لەكلتور و هونەری گەلانی تر دەگرن، پۆلەندا وڵاتێکە دامەزراوەی هونەری زۆری هەیەو هونەری كوردیش بەهەموو بەشەکانیەوە لای ئەوان بایەخی خۆی هەیە، لەگەڵ ئەوەشدا تاڕادەیەك كەلتووری پۆلەندی جیا لە وڵاتانی دیکەی ئەورووپی نزیکە لە کەلتووری كوردی، لە ڕووی سیاسیشەوە لێكوەچوونێكی مێژوویی پۆڵەندا و کوردستان هەیە لە دابەشكردنی وڵات و جینۆساید و بەرەنگاربوونەوە و ڕاپەڕین.
ئێمەیش پۆلەندامان هەڵبژارد بۆئەوەی پردێکی پێوەندی كلتوری وهونەری لەنیوان هەرێمی كوردستان و پۆلەندا دروست بكەین. گوتیشی: هەرچەندە ڕەزامەندیمان وەرگرتووە، کە هەموو ساڵێك لەهەمان وادەدا پێشانگایەکی لەم جۆرە پێشکەش بکەین بەهەمانچەشن لەگەڵ چەندین دەزگاو دامەزراوەی پۆلەندی رێككەوتووین کە وەرزیانەو ساڵانە چەند چالاكییەكی هونەری کوردستانی نمایش بکەین، بەڵام لە ئێستاوە وا كار لەسەر كردنەوەی سێ پیشانگای شێوەكاری دەكەین دوانیان بۆ کۆتیایەکانی ئەمساڵ لە پاریس و شارێكیدیکەی پۆڵەندی، ئەویتریشیان کارمان لەسەر کردووە کە لەبەرلین ئەنجامی بدەین بەڵام دەکەوێتە ساڵی نوێ. لە كۆتاییدا زیاد گەردی دەربارەی پێشوازی خەڵك لەو پێشانگایە گوتی: پێشوازی خەڵك لەو چالاكیە هونەریەماندا زۆر لە خواستی ئێمە زیاتریش بوو، هەرچەندە پێشبینی ئەوەمان دەكرد، چونکە پێشتر چەندین کارو چالاکیی هونەریمان بە جوانی و سەرکەوتوویی ئەنجامداوە کەجێی رەزامەندی بووە، ئەم كارەشمان تەنها لە كردنەوەی پێشانگایەكی شێوەکاری خۆی نەبینیبووە بەڵکو لەتەك ئەوەدا چەند شتیترمان پیشکەشكرد وەك پێشكەشكردنی چەندین پارچە میوزیكی کوردی، پێشکەشكردنی خواردن و شیرنەمەنی ڕەسەنی كوردەواری، هەروەها سەرەتای كردنەوەی پێشانگاکە بەچەندین وتار و وەسفكردنی مێژوو و کەلتووری كوردی بۆئامدەبووان و ڕێزلێنان و پێشكەشكردنی دیاری وەزارەتی رۆشنبیری ولاوانی هەرێمی كوردستان و پەیمانگەی هونەرە جوانەكانی كوردستان بۆ ڕێكخەران و بەرپرسانی پۆلەندی، کە زۆرێک لەهونەرمەندان و ڕۆشنبیرانی پۆڵەندی ئامادەیی خۆیان نیشاندا کە لەئایندەدا ئەوانیش بەشداربن لەپیشكەشكردنی چالاکی هونەری لەهەرێمی کوردسان و كردنەوەی پردی پێوەندی كلتووری لە نێوان هەرێمی كوردستان و پۆڵەندا.
لەلایەن خۆیەوە بەڕێز ئەمیر دالی وەكو نوێنەری پەیمانگای هونەرە جوانەكان بەشداربوو گوتی: ئێمە وەكو گروپێكی شێوەكاری لە هەولێر و سلیمانی ئامانجمان ئەوە بووە كە بتوانین پێشانگایەكی هاوبەشی بكەینەوە لە شاری كراكۆڤی پۆلەندا بە مەبەستی ئاڵوگۆڕكردنی كەلتوری كوردی لەگەل كەلتوری پۆلەندا و ڕۆڵ و ئەركی ئێمە لەم پێشانگایە ئەوەبوو كەبە 20 تابلۆی جیاواز نیشانماندا، كە شێوەكاری كوردیش شتێكی وای كەمتر نیە لەگەڵ شیوەكاری بیانی و ئەوانیش زۆر بە سەلیقەوە لە تابلۆكانیان دەروانی و لە كۆتا نمایشەكەماندا پۆڵەندییەكان چەند تابلۆیەكیان گێرایەوە بۆ ئەوەی وەك سیمبولێكی نەتەوەكەمان لەلایەن خۆیان پارێزراو بێت.
شایەنی باسە هونەرمەندە بەشداربووەكانیش بریتی بوون لە: ئەمیر دالی، فەرهاد بیبۆ، تاڤگە حوسێن عەبدولقادر، پەیمان عەباس، هەڵمەت بابەكر ئاغا، کوێستان محمد، سەفەر عەباس ئاغا، دلشاد حوسێن، دێرین فەرهاد.

 

شیڤان شێرزاد - خەلیل بلەیی

© 2017 Hawler

Please publish modules in offcanvas position.