ئازار 06, 2021

میدیا حوسێن: "هونەری میللی هونەرێكی بەرزە لەپێشەوەی زۆربەی هونەرەكانی دیكەوەیە"

هونەرمەندی بە ئەزموونی گۆرانیبێژ (میدیا حوسێن) لە میانەی دیدارێكی دا خوێنەرانی "هەولێر" ئاماژە بۆ بەرهەمهێنانی چەند گۆرانییەكی تازە دەكات، لەوانە گۆرانییەك لەژێر ناوی (هەیاران و مەیاران)، كە ئەو گۆرانییە جیاوازییەكی باش دروست دەكات، بە بەراورد لەگەڵ بەرهەمەكانی پێشووی، هەروەها ئاماژە بۆئەوەشدەكات هونەری گۆرانی میلی لە ئێستادا تێكەڵیی و بێسەرو بەرەی تێكەوتووە، ئەویش هۆكارەكەی تەنها بۆ گۆرانیبێژەكان دەگەڕێتەوە نەك هونەرەكە!.

 

لەدەستپێكی قسەكانی دا هونەرمەند (میدیا حوسێن) لەبارەی هەبوونی بەرهەمی تازەی ئاماژەی بۆ ئەوەكرد : "دیارە هەبوونی بەرهەمی تازەی هەر هونەرمەندێك پەیوەستە بەلایەنی مادییەوە، چونكە سەرجەم سێكتەرەكانی بەرهەمهێنان هونەر لەئێستادا ئەوەندە سەخت بووە، زۆر ئەستەمە بەبێ بوونی پارە بتوانی گۆرانییەك بە دڵی خۆت كاری میوزیك و تۆماركردن و ڤیدیۆ كلیپی بۆ بكەی، ئێمەش چەندیین ساڵە لەسەر ئەرك و گیرفانی خۆمان گۆرانی دەڵێین، ناشكرێت هەر بەو شێوەیە بەردەوام بین!، دیارە بە هۆی هاتنی ئەو شەپۆلی كۆرۆنایە، كە ماوەی نزیكەی ساڵێكە بە تەواوی كارگەریەكی دیكەی دروستكردووە .“لەسەر سەرجەم دۆخەكە بە گشتی و كاری هونەریش بە تایبەتی!

 

هونەرمەند (میدیا حوسێن) لەبارەی ئەو ڕەوشەی لە ئێستادا گۆرانی میللی پێیدا تێپەڕ دەبێت و لەمبارەیەوە گوتی : "هونەری میللی لە هەموو دونیادا هونەرێكی ئاست بەرزەو، دەتوانم بڵێم لەپێشەوەی زۆربەی هونەرەكانی دیكەوەیە، چونكە هونەری میللی هونەرێكە لەنێو هەموو چین و توێژێك جێگەی خۆی دەكاتەوە، هەروەها دەكرێ بڵێین هونەری میللی دەبێتە ناسنامەی هەموو گەلێك، بۆ ئەوەی بەباشی كەللتور و فەرهەنگیان بناسیت، سەیر بكەن هونەرمەندێكی وەك (چارلی چاپڵن) و هونەرمەندێكی میللی بوو، تائێستاكەش هاوتای ئەو لەنێو دونیا كۆمێدی دا بوونی نیە، میوزیكژەنێكی وەك (مۆزارت)، كە میوزیكژەنێكی میللی بوو، تا ئێستاكەش بووە بە ناسنامەیەكی دیاری نێو گۆڕەپانی میوزیك، لە كوردستانی خۆشمان كەسانی وەك (حەسەن زیرەك، محەمەدی ماملێ، ئەحمەد شەماڵ، جەلال سەعید)ـو دەیان هونەرمەندی میللیمان هەبووە جێگەو پێگەیان ئەوەندە بەرز بووە تا هەتایە بیر ناچنەوە!، بەڵام بەداخەوە هەندێك بەناو هونەرمەند هونەریی میللیان شێواندووە، كە پێویستە هەڵوەستە لەسەر كاری ئەوان بكەین و بڵێین هونەری میللی هونەرێكی بەرزە، بەڵام هەموو كەس ناتوانێ ئەو بەرز و جوانییە بپارێزێت، بەداخەوە كەناڵەكانیش وایان كردووە، بەشێك لەو بەناو گۆرانیبێژانە بكەن بەماڵ بەسەر گۆرانی .“كوردی!

لەبارەی بەرهەم هێنانی گۆرانییە تازەكەی (میدیا حوسێن) ـی هونەرمەند گوتی : "ئەو گۆرانییە ئاواز و تێكستەكەی خۆم دامناوە، لە ژێر ناوی (هەیاران و مەیاران) كارم بۆ كردووە، ناوەرۆكی هۆنراوەی گۆرانییەكە، فۆرمێكی تازەم بەكار هێناوە، هەوڵمداوە ئەو گۆرانییە ببێتە كارێكی تازە لە مێژووی كارە هونەرییەكانم، هەروەها هەوڵمداوە شێوازی گوتن و كاری میوزیكی بەرهەمەكەش، كارێكی باش بێت، هیوادارم لە ئایندەیەكی نزیكدا سەرجەم كارەكانی تەواو بێت، بۆ ئەوەی بتوانین لە رێگەی كەناڵەكان بینەرە بەڕێزەكان بیبینن، جگە لەو بەرهەمەش چەند بەرهەمێكی دیكەم ئامادەیە، بەڵام نازانم و كەی دێتە .“بەرهەم!

 

عەبدولغەفار عەبدوڵڵا - هەولێر

 

© 2017 Hawler