کانونی دووەم 18, 2021

نوێنەر هۆگر: گۆرانی و موزیکی کوردی ئاڵۆزیەکی زۆری پێوە دیارە

‎ 

نوینەر هۆگر لە ماوەیەکی کەم توانی وەک ژەنیاری کەمان بێتە ناو گۆرەپانی هونەری و ببێتە دەنگێکی نوی و بە تواناو سەلیقەو رۆحیەتێکی پڕ هونەری و عاشقانە بۆ موزیکژەنین کاری هونەری بکات و لە چالاکیەکانی سەرئاستی کوردستان و ڤێستیڤاڵە هونەریەکان جێپەنجەی دیار بێت و کاریگەری خۆی هەبێت، بە سۆڵۆو ناسکی دەست پەنجەکانیەوە لە ئیستادا بێ رکابەرەو زۆرینەی گۆرانی بێژان دەخوازن نوێنەر سۆلیست و کەمان ژەنی ناو بەرهەمەکانیان بێت، زۆرن ئەو هونەرمەندە گۆرانی بێژانەی کە نوێنەر بە سۆڵۆیەکانی بەرهەمەکانیانی بۆ پڕچێژترو هونەری ترکردوون.

 

نوێنەر لە ساڵی 1995 لە تەق تەق لە دایک بووە .

 لەوەڵامی چەند پرسیارێکی رۆژنامەی هەولێر دەڵێ : لە ساڵی ( ٢٠٠٩) موزیك دەناسم، بەڵام كە تەواو تێكەڵی زانستی موزیك بوم ساڵی ٢٠١٠ بوو لە سەنتەری گەنجانی كۆیە لەلایەن مامۆستا ( هەژار) وانەی موزیكم وەرگرتوە و، بەشداری چەندین چالاكی قوتابخانەكانم كردوە و بە پێی ئەوەی کە سەرەتا بووم توانام باش بوو ڕۆڵی باشم لە چالاکیەکان هەبوو، سەرەتایەکی باشم دەست پیکرد.

 لە ٢٠١٢ لە پەیمانگای هونەرەجوانەكانی شەهید جعفر لە كۆیە وەرگیرام و تا قۆناغی ٣ لەوێ بەردەوام بوم، دواتر خوەێندنم گواستەوە بۆ هونەرە جوانەكانی هەولێر لەوێ لە چەندین كاری كۆنسێرت و بەرهەمی موزیكی بەشداریم كردوە ئێستاش لە كۆلێژی هونەرە جوانەكان قوتابیم، لە ماوەی ئەو چەند ساڵەدا بەشداری زۆر كاری هونەریم كردوە وەک تاکژەنین، سترینگ كلیپ هتد.. ‎

بە نزیكەیی زیاتر لە ٢٠٠ پڕۆگرامی تەلەفیزیۆنی جۆراو جۆرم بەڕێوەبردووە .

 بۆ ئێستاش ئەندامی (گروپی موزیكی ڕیكۆردەكانی ڕاگرینم) و جێگری بەڕێوەبەری كۆمپانیای ئاڕتین كڕاون پڕۆداكشنم.

نوێنەر بۆ کارو چالاکی داهاتووی ووتی : لە ئێستادا سەرقاڵی چەند بەرهەمێكم لە ئایندەیەكی نزیك بڵاویان دەكەمەوە.

سەبارەت بە ئێستای گۆرانی وو موزیکی کوردی نوێنەر بە پێی ئەو شارەزاییەی کە لەو بەرنامەو کارە هونەریانە پەیدای کردووە ووتی:

گۆرانی و موزیكی كوردی لە ئێستادا ئاڵۆزیەكی زۆری پێوە دیارە كە پێویستە هەمومان هەوڵی جوانتر كردنی بدەین نەك بە لادا ڕێبردن و شێواندنی، هەوڵی باش هەیە و گەنجی زۆر بە توانا هەیە و هێشتا پێویستمان بە هەوڵی زیاترە پێویستمان بە كەسی پسپۆرە لە بواری موزیك وەك و تاك ژەنین وئامادەكردن و تەواوی ئەو بەشانەی تر کە هونەرێک بۆ گوێگر دروست دەکەن .

 

 

 

 

ئا: بەشی هونەر

 

© 2017 Hawler