نیسان 24, 2018

هه‌ژان ھێرش: خەریكی فیلمێكی ئەنیمەیشنی كوردین بەشێوەی سێ ڕەهەندی

هەژان هێرش ناوێكی دیاری نێو هونەری دراما و فیلمی كوردییە.  لەنێو خەڵكیدا خۆشەویستە و بۆ هەر شوێنێك بڕوات هەوادارانی لێی كۆدەبنەوە و وێنەی لەگەڵ دەگرن. هەژان ماوەیەكە سەرقاڵی پڕۆژەیەكی گرنگ و نوێی سینەماییە، بۆ یەكەمجار كار لە دروستكردنی فیلمێكی ئەنیمەیشنی كوردی بەشێوازی سێ رەهەندی دەكات، لە چەندین درامادا دەركەوتووە و چەند جارێك پێشكەشكاری بەرنامەی تایبەت بووە و پێشتر وەک ئەکتەر و پێشکەشکار دەرکەوتووە و لە ساڵی 2006 یەکەم کاری نواندنی ئەنجام دا، کە بریتی بوو لە بەشداریکردن لە درامای «گەڕان بەدوای سێبەرەکان». لە میانەی بەشداری كردنی لە فیستیڤاڵی نا بۆ توندوتیژی دژ بە ئافرەتان ئەم دیمانەیەمان لەگەڵی سازدا، ئەویش بەم شێوەیە وەڵامی داینەوە.


سەرەتا سەبارەت بە چوونی بۆ ئەوروپا و مانەوەی لەوێ وەک لە چەند ماڵپەڕێک بڵاوکرایەوە گوتی: من نەچوومەتە ئەوروپا بۆ ئەوەی لەوێ بژیم و ئەو هەواڵەش راست نییە، من چوومە ئەوروپا، بەڵام بۆ مانەوە نەبوو، بەڵكو ئێمە لە زانكۆی سلێمانی وەك خوێندكاری ماستەر بانگهێشت كراین، چووین بۆ زانكۆی برێمەنی ئەڵمانی وەك هەر كەسێكی دیكە لەوێ چەند وێنەیەكم لە تۆڕە كۆمەڵایەتییەكان بڵاوكردەوە، بەداخەوە چەند كەسێك بۆ ئەوەی پەیج و ئەكاوەنتەكانیان سەردانیكەریان زیاد بێت و لایكەكانیان پێ بەرز ببێتەوە، ئەو وێنانەی منیان بڵاوكردەوە، بەوەش نەوەستان، بەڵكو رایانگەیاند كە من كوردستانم بە یەكجاری جێهێشتووە. ئەمەش راست نییە، چونك من ئێستا لەگەڵ كۆمپانیایەكی دروستكردنی فیلمی ئەنیمەیشن، وەك بەڕێوەبەر و سەرپەرشتیاری پرۆژەیەك كار دەكەم. خەریكی فیلمێكی ئەنیمەیشنی كوردین بەشێوەی سێ رەهەندی، فیلمەكە بە زمانی كوردی و عەرەبییە و بۆ یەكەمجار بۆ منداڵان ئەم كارە لە كوردستان دەكرێت. لەگەڵ ئەوەشدا لە زانكۆ سەرقاڵی خوێندنی ماستەرم لە بواری راگەیاندن، بەڵام هێشتا دەستم بەنووسینی نامەی ماستەرەكەم نەكردووە، دوای ئەوەی لە یەكەمەكانی بەشەكەم بووم، لە ماستەر وەرگیرام و ئێستا كاری لەسەر دەكەم.
سەبارەت بەوەی ئایا زیاتر ئارەزووی لە راگەیاندنە یان هونەر وتی: من لە پۆلی شەشی ئامادەیی نمرەكەم زۆر بەرز بوو لە شوێنی بەرزتر وەردەگیرام، بەڵام لەبەر خۆشەویستیم بۆ هونەر رووم لە بەشی راگەیاندن كرد، ئەمەش وەك خۆ ئامادەكردنێك و بۆ ئەوەی سوودی لێ ببینم هاتمە نێو بواری راگەیاندنەوە زیاتر خۆم لە كاری نواندن دەبینمەوە، پێشتر جگە لەكاری نواندن، پێشكەشكاریش بووم. ئێستاش پرۆژەم، پرۆژەكەم زۆر گەورەیە و یەكەمجارە لە كوردستان دەكرێت، هەڵبەتە تاوەكو ئێستا چەند كەناڵێك داوایان لێكردووم، بەڵام من هێشتا رەزامەندیم لەسەر نەداوە لەگەڵ كامە كەناڵ كار بكەم، چونكە دەمەوێت بەشێوەیەكی تازە و جیاواز لەو كارانەی ئێستا پێشكەش دەكرێن دەربكەوم.
لە ئێستادا دراما بیانییەكان بەتایبەتی دراما توركییەكان كەناڵەكانی كوردستانیان داگیر كردووە و بەشێك لە هونەرمەند و نووسەر و رۆژنامەنووسان هەڵمەتێكیان دەستپێكرد لە تۆڕە كۆمەڵایەتییەكان دژی نمایشكردنی ئەم درامایانە لە كەناڵە كوردییەكان، هەژان هێرش دەڵێ: ئێمەی كورد هەمیشە بەرهەمی هونەریمان هەبووە، بەڵام كەناڵە كوردییەكان بەرهەمە هونەرییە كوردییەكان ناكڕن هەرچەندە ماوە و ژمارەشی كەم بێت، بەڵام ئامادەن درامایەكی بیانی دەكڕن بێ ئەوەی گوێ بدەنە نرخەكەی، خۆیان تەنیا بەرهەمی بیانی نمایش دەكەن بینەریش ناچارە سەیریان بكات، ئەگەر بەرهەمەكانمان لەرووی چەندایەتییەوە زۆریش كەم بن، بەڵام من پێم باشترە لە بوونی بەرهەمی بیانی كە لە هیچ روویەكەوە لەگەڵ كەلتوور و دابونەریتی كۆمەڵگای ئێمە ناگونجێت بە پێچەوانەوە كاریگەریی زۆر نەرێنیی هەیە لەسەر كۆمەڵگای ئێمە بەتایبەتی منداڵان.
سەبارەت بەوەی كە بینەری كوردی خۆی ئێستا سەیری ئەم زنجیرە دراما بیانیانە دەكات هەژان دەڵێ: ئەگەر فیلمێكی باشی كوردی هەبێت خەڵك دەچێتە سینەما، بەڵام ئێمە دوو كێشەمان هەیە، یەكەم لەڕووی مادییەوە خەڵك زۆر كێشەی هەیە. دووەم لەڕووی پەروەردەوە، دەبێت وەزارەتی پەروەردە و خوێندنی باڵا لەگەڵ سینەماكانی كوردستان هەماهەنگی بكەن بۆ ئەوەی قوتابی پەیوەست بكەن بە سینەما، بەلایەنی كەم دەبێت هەفتەی جارێك بچنە سینەما، بەم هۆیەشەوە كولتووری سینەما بڵاودەبێتەوە.
سەبارەت بە بەكارهێنانی تۆڕە كۆمەڵایەتییەكان و سوود وەرگرتن لێیان دەڵێ: من زۆربەی كارەكانم بۆ تۆڕە كۆمەڵایەتییەكان تەرخان ناكەم، بەڵام بەپێی كات وتوانا چالاكییەكانم بڵاودەكەمەوە، زیاتریش لە ئینستاگرام زیاتر دەردەكەوم، چونكە ئینستاگرامەكەم بۆ گشتییە كە بەناوی هەژان بارانەوەیە، بەناوی كوڕەكەمەوەیە، لەبەر ئەوەی بەداخەوە پەیج و ئەكاونت بەناوی هەژان هێرشەوە زۆر دانراوە، بۆیە من ئەو ناوەم بۆ هەڵبژاردووە.
سەبارەت بە نەشتەرگەرییەكانی جوانكاری كە بەشێكی زۆری ئافرەتان رووی تێدەكەن، هەژان هێرش دەڵێ: لەگەڵ هەر شتێكم دڵی مرۆڤ خۆش بكات. كەسێك دەچێتە بەر ئاوێنە شوێنێكی خۆی بەدڵ نییە بۆ نەیگۆڕێت؟ من هەرگیز دژی نیم، بەڵام لەگەڵ ئەوە نیم روخساری خۆت بگۆڕی، یان بە تەواوەتی شێوەی خۆت بگۆڕیت، ئێستا بەهۆی نەشتەرگەریی جوانكاری وای لێهاتووە، خەڵك زۆر لەیەك دەچن.

 

شیڤان شێرزاد - خەلیل بلەیی

© 2017 Hawler

Please publish modules in offcanvas position.