تشرینی یەکەم 01, 2020

شیرین عەزیز: پەیكەرەكانم باسی واقیعی كۆمەڵگەی كوردی دەكەن

پەیکەرساز شیرین عەزیز تەمەنی ٢٧ ساڵە و خەڵكی دهۆكە، دەرچووی پەیمانگەی هونەرە جوانەكانی دهۆكە و بەشی شێوەكاریی تەواو كردووە. ناوبراو لەو دیمانەیەیدا بۆ ڕۆژنامەی "هەولێر" دەڵێ: " پەیكەرەكانم باس لە واقیعی كۆمەڵگەی كوردی دەكەن و دەمەوێ لەو ڕێگەیەوە پەیامی ئاشتی بڵاو بکەمەوە.

شیرین گوتی: ساڵی ٢٠١٢ دەستم بە پەیكەرسازی كردووە و تا ئێستە بەردەوامم. چالاكییە هونەرییەكانم لەگەڵ ناوەندی لاوان بەردەوامە و چەندان كاری خۆبەخشم بۆ منداڵە ئاوارەكان ئەنجام داوە. چەندین خولی شێوەكاریشم بۆ فێرخوازان و ئارەزوومەندانی بواری شێوەكاری لە دهۆك كردووەتەوە.
شیرین پێی وایە دروستكردنی پەیكەر ئاسان نییە و زۆر قورسە، هەموو كەسێك ناتوانێ بە ماوەیەكی كەم فێری ئەم هونەرە ببێ. حەز و ئارەزوو لە هونەردا زۆر گرنگە و وا دەكات بە ماوەیەكی كەم ڕێچكەیەكی باشی هونەر ببڕیت، چونكە دروستكردنی پەیكەر كاتێكی زۆری دەوێت و دەبێ تا ئەو پەیكەرە تەواو دەكەیت، بەردەوام بیری لێ بكەیتەوە تا بتوانی باشترین پەیكەر دروست بكەیت.
شیرین ئاماژەی پێدا کە تا ئێستا بەشداریی لە ١٢ پێشانگەی هاوبەش كردووە، بەڵام تا ئێستە نەیتوانیوە پێشانگەیەكی تایبەت بكاتەوە، بەنیازە لە داهاتوو پێشانگەی تایبەت بكاتەوە و هەموو پەیكەرەكانی نمایش بكات، دەیەوێ خەڵك لە ڕێی پەیكەرەكانیەوە واقیعیانە بیر بكەنەوە.
شیرین دەڵێت،"هونەر بۆ من حەزێكە و هەرگیز بۆ پارە كارم نەكردووە، تەنیا بیرم لە سەركەوتنی كارەكە كردووە تا پەیامێك بە مرۆڤایەتی بگەیەنم، چونكە هەموو بەرهەمێكی هونەری پەیامێكی تایبەت بە خۆی هەیە.
شیرین لەکۆتایی قسەکانیدا گوتی: "ئامانجم ئەوەیە زیاتر هونەرەكەم بەرەوپێش ببەم و لە كاری پەیكەرسازی و دانەبڕێم، چونكە هونەرەكەم خۆش دەوێت و لە رێی پەیكەرەكانمەوە پەیامی ئاشتی بڵاو دەكەمەوە."

 

گەرمیان گلی - هه‌‌ولێر

© 2017 Hawler