ئاب 12, 2020

یانزەهەمین خولی فێستیڤاڵی فیلمی كوردی لە (لەندەن) لەڕێگای ئۆنلاین بەڕێوە دەچێت

سەرهەنگ غەریب - هەولێر

 

بەڕێوەبەرایەتیی فێستیڤاڵی فیلمی كوردی لە (لەندەن) ڕایدەگەینێت: یانزەهەمین خولی فێستیڤاڵی فیلمی كوردی لە (لەندەن) بەڕێوە دەچێت، وا بڕیارە چاڵاكیەكانی فێستیڤاڵەكە لە ڕۆژانی 15 تا 24/8/2020، بۆ ماوەی (10) ڕۆژ بە ئۆنلاینەوە بەردەوام بێت.

لە دەقی ڕاگەیاندراوەكەدا هاتووە كە وێنەیەكی دەست ڕۆژنامەی (هەولێر) كەوتووە: ئێمە بەوپەڕی خۆشحاڵییەوە یانزە هەمین خولی فێستیڤاڵی فیلمی كوردی لە (لەندەن) ڕادەگەیەنین لە ڕێگای ئۆنلاینەوە دەبینە میوانی ماڵەكانتان، لەهەر كونجێكی ئەم جیهانەبن دەتوانن ئەو كورتە فیلمانەی كە بڵاوی دەكەینەوە بێ بەرانبەر تەماشای بكەن.
ئاماژە بەوەش كراوە: بەهۆی ڕەوشی نالەباری ئەمساڵ كە هەموو جیهانی گرتەوە و ئەو كۆسپانەی هاتە ڕێگای مرۆڤ و مرۆڤایەتی كە ئێمەشی گرتەوە، وەك دەستەی بەڕێوەبەری فێستیڤاڵی فیلمی كوردی لە (لەندەن) ناچار بووین كە ئەمساڵ بە بەرنامەیەكی تایبەت بێینەوە خزمەتتان، بەڵام تەنها بە فیلمی (فیكشن، دیكومێنتەری، ئەنیمەیشن) لە خزمەتی بینەرانماندا بین، كە ناوەڕۆكی كورتە فیلمەكانی ئەمساڵمان بریتییە لە (لەودیوی سنوورەوە، خەبات بەردەوامە، ژن لە فیلمدا، جەنگ لە شاشەوە، چیرۆكە ناوازەكانی كوردەواری، منداڵ و فیلم).
ڕاشیانگەیاندووە: بەهەوڵدان و تێڕوانینێكی نوێوە یانزەهەمین فێستیڤاڵی فیلمی كوردی لە (لەندەن) لە ڕێگای ئۆنلاینەوە (50) كورتە فیلم پەخش دەكەین، هەر فیلمێك ڕاستەوخۆ نیشان دەدرێت، دوای نیشاندانی فیلمەكە گفتوگۆ لەسەر فیلمەكە دەكەین لەڕێگای (پانێڵ)وە بەشێوەیەكی زانستی بۆچوون و ڕەخنەكانی ئێوەی خۆشەویست خۆشحاڵ و دەوڵەمەندمان دەكات، بەشانازییەوە دەڵێین كە فێستیڤاڵی ئەمساڵمان دەكەین بە هاوكاریی (ئینستتوتی فیلمی بەریتانی BFI) و (تەماشاكەرانی فیلم Film Audience Network) وە هەروەها (فیلم گرێ دراوە بە هەستەوەFFC ) كە بە باوەڕییەكی زۆرەوە پشتیوانیمان لێدەكەن.
ئەوەی ماوەتەوە بڵێین: فێستیڤاڵی فیلمی كوردی لە (لەندەن) بەخۆشحاڵییەوە پەخشی كورتە فیلمەكانی دەستپێدەكات بۆ ماوەی (10) ڕۆژ دەتوانن چێژ لە تەماشاكردنی فیلمەكان ببینن، هەروەها بەچەند بەرنامەیەكی هەمەڕەنگ (جۆراوجۆر) لە خزمەتی ئێوەدا دەبین.

© 2017 Hawler