تەمموز 12, 2020

جگە لە كاری هونەری خەریكی بەخێوكردنی پەلەوەر و ڕەز و باخم

محەمەد سەعید كوردە - هه‌ولێر

 

یەكێك لەوانە ئەكتەری بەتەمەن و خاوەن بەهرەی گەشی هونەری مام (تۆفیق سەلیم) ە، ئەو هونەرمەندە لە ساڵی 1955 لە دەڤەری مەخمور لە دایكبووە، بەڵام ئەوەی جێی سەرنجی هەموانە ئەو بە درەنگە وەختەوە تێكەڵ بە كاری هونەری بوە و ئەو چەند ساڵە لەسەر شاشە دەركەوتوە، بۆ ئەوەشیان گوتی: من هەر لە منداڵیەوە حەزم بە كاری هونەری نواندن كردوە و لەگەڵیدا ژیاوم، بەڵام لەبەر داب و نەریتی نێو كۆمەڵگە و گوشاری خزم و كەسە نزیكەكانم نەمتوانی بە ئاشكرا نواندن بكەم و وەك ئەكتەر دەربكەوم، كاتێ پیاوە گەورەكانمان ئەمری خوایان بەجێ گەیاند و كۆچی دواییان كرد و لە ژیان نەمان ئیدی من بواری ئەوەم بۆ ڕەخسا بە شێوەیەكی كارا و بە ئازادیەوە دەست بە تەمسیل و نواندن بكەم، ئەگەرچی پێشتریش بۆ دامركاندنەوەی حەز و ئارەزووە هونەرییەكانم لە پشت كامیرا كاری خۆم دەكرد و ڕۆڵی هونەری خۆم دەبینی.
یەكەم كاری هونەری
مام تۆفیق سەبارەت بە یەكەم كاری هونەری خۆی دەڵێ: من لە دەڤەری مەخمور لەگەڵ تیپی هونەری خەندە یەكەمین جار لەگەڵ كۆمەڵێك لە ئەكتەرە بەڕێزەكانی دیكە بەشداریم لە شانۆگەری (ڕەبەنەكان) كرد و توانیمان ڕۆڵی خۆمان بەسەركەوتوویی ببینین و جەماوەرەكە لە خۆمان ڕازی بكەین.

هەواڵی مردنی مام تۆفیق
ماوەیەك لەمەوبەر لە سوشیال میدیا و تۆڕە كۆمەڵایەتیەكان هەواڵی مەرگی مام تۆفیق بەشێوەیەكی بەرچاو بڵاوبەوە و هەموو لایەكی تووشی شۆك كرد، لەمبایەرەوەش مام تۆفیق زۆر بە ڕاشكاوییەوە گوتی: بەڕاستی ئەو هەواڵە منیشی تۆشی شۆك كرد و زۆر پێم ناخۆش بوو، چونكە بەو هەواڵە درۆیە، خۆشكی گەورەم تووشی سووكە جەڵتەیەك بوو لە مردنێكی مسۆگەر گەڕایەوە، بۆیە جێی داخە كەسانێكی نەخۆش و نەفەس نزم بەو كارە خراپانە دەڵدەستن و پڕوپاگەندەی ژەهراوی بڵاودەكەنەوە.

دیاترین كاری هونەری
مام تۆفیق سەبارەت بە دیاترین كاری هونەری گوتی: دیارترین كاری هونەری كە من زۆر شانازی پێوە دەكەم شانۆگەری (كراسی پیاوی بەختەوەری) بوو كە من بە گەواهی هەموو لایەك ئەو ڕۆڵەم بەسەركەوتوویی بینی و لەو ساوە تا ئێستا لە بیرو هزرم بە نەمری ماوەتەوە.

مام تۆفیق و بەرهەمەكانی خۆی
هەركە پرسیاری ئەوەمان ئاراستەی مام تۆفیق كرد هەست بە چیدەكەی كاتێ بەرهەمێكی خۆت لەسەر شاشە دەبینی، ئەویش بۆ وەڵامی ئەو پرسیارە گوتی: هەر كاتێ سەیری بەرهەمەكانی خۆم دەكەم لەسەر شاشەی تەلەفزیۆن ئەگەر ڕۆڵەكەم بە جوانی بینی بێ زۆر پێی دڵخۆش دەبم، بەڵام ئەگەر بە پێچەوانە بێ ئەوا زۆر دڵتەنگ دەبم.

مام تۆفیق و جەماوەر
كاتێ ڕووی پرسیارم لە مام تۆفیق كرد جەماوەری هونەری چۆن لەگەڵ ئێوەدا هەڵسوكەوت دەكەن؟، بۆ ئەوەشیان گوتی: بەڕاستی زۆر سوپاسی جەماوەری هونەری دەكەم كە ئەوپەڕی ڕێز لە من دەگرن كاتێ لە دەرەوە دەمبینن، ئەوەشیان گەورەترین سەروەرییە بۆ من كە من ئەو هەڵوێستە هەرگیز لە یاد ناكەم.

جگە لە نواندن و كاری هونەری
دوا جار مام تۆفیق دوور لە كاری هونەری گوتی: جگە لە كاری هونەری من لە دەڤەری مەخمور خەریكی بەخێوكردنی پەلەوەر و ڕەز و باخم و خۆم بەوانەوە خەریك كردووە.

© 2017 Hawler