تەمموز 12, 2020

ئەیوب عەلی: ئەم ساڵ ئەلبوومێكی تازە بڵاو دەكەمەوە!

سایتی هه‌ولێر_عەبدولغەفار عەبدوڵڵه‌

 

ئەیوب عەلی، لە لێدوانێكدا بۆ خوێنەرانی "هەولێر" تیشك دەخاتە سەر چەند لایەنێك لەكارە هونەرییەكانی، بەتایبەتی ئاماژە بۆ ئەوە دەكات، خەریكە خۆی بۆ بەرهەمێكی گۆرانی ئامادە دەكات و هەوڵ دەدات لە ئەم ساڵدا بڵاوی بكاتەوە.

لەدەستپێكی قسەكانیدا هونەرمەند ئەیوب عەلی لەبارەی هەبوونی ئەلبوومێكی تازەی گۆرانی رایگەیاند: "بەر لە نزیكەی مانگێك گۆرانییەكی تازەم بە شێوەی دەنگ و ڕەنگ بڵاو كردنەوە، ئێستاش جگە لەو گۆرانییە، خەریكی ئامادەكارییم بۆ بەرهەم هێنانی ئەلبوومێكی تازەی گۆرانی، ئەو ئەلبوومە لەدوای چەند ساڵێك لە نەبوونی بەرهەمی تازەم بەشێوەی سیدی، ئێستا دەمەوێ دوای ئەو چەند ساڵە ئەلبوومێكی تازەی گۆرانی بڵاو بكەمەوە، كە لەوانەیە خۆی لە 8 بۆ 10 ببینێتەوە، ئەو ئەلبوومە لە رووی ناوەرۆك و فۆرمی گۆرانییەكانەوە، هەوڵێكی باشم داوە كارێكی تازەتر لەوانەی پێشووتر پێشكەشی گوێگرانم بكەم".
لە بارەی كاتی بڵاوكردنەوەی ئەو ئەلبوومە تازەیە، هونەرمەند ئەیوب ئەوەشی راگەیاند: "لە بەر ئەوەی كاری بەرهەم هێنانی ئەلبوومێكی گۆرانی ئەوەندە ئاسان نیە، پێویستی بە كاتە، هەروەها منیش لە كاری ئامادەكارییم بۆ دروستكردنی گۆرانی، هەر لەرووی میلۆدی و تێكستەوە، تادەگاتە قۆناغی میوزیك و تۆماركردنی زۆر هیلاك دەبم لەگەڵی، بۆیە دانانی كات بۆ ئەو كارە تاڕادەیەك ئەستەمە، بەڵام هەوڵ دەدەم تا كۆتایی ئەم ساڵی 2020 سەرجەم كارەكانی تەواو بكەم، بۆ ئەوەی بەشێوەیەكی باش كاری چاپ و بڵاوكردنەوەی بۆ بكرێت و بڵاو ببێتەوە".
لە كۆتاییدا هونەرمەند ئەیوب عەلی لەبارەی هەبوونی پاڵپشتی بۆ كاری بەرهەمهێنانی سیدیە تازەكەی رایگەیاند: "پاڵپشتی تەنها ئەگەر هەبێت لەرێگەی سپۆنسەری كۆمپانیاكانە، ئەوەشیان شتێكە وەك كوردەواری دەڵێت "بەری دڵ ناگرێت" چونكە ئەلبوومێكی چەند تراكی گۆرانی پێویستی بە خەرجی زۆرە، دیارە منیش لەوەتەی گۆرانی دەڵێم، دووجار قوربانییم بۆ هونەر و بەرهەمهێنانی گۆرانییەكانم داوە، جارێكیان بە بەخشینی تەمەنی خۆم، ئەوەی دووەمیشان گیرفان و داهاتی ژیانی رۆژانەی خۆم بووە!، كە پێم وایە هەردووكیان هەر لەمن رۆیشتووە، بەتایبەتی تەمەنی خۆم، كە بایەخ و بەهای خۆی هەیە بۆ هەموو مرۆڤێك، بۆیە من ئەو ئەلبوومەشم ئێستاكە خەریكم كاری بۆ دەكەم، لەگەڵ سەرجەم ئەلبوومەكانی پێشووم، بە پلەی یەكەم لەگیرفانی خۆم خەرجیم بۆ دابین كردووە، ئینجا بەشەكەی دیكەی هاوكاری و پاڵپشتی بووە لەلایەن كۆمپانیاكان، كە سپۆنسەری هەندێك لە بەرهەمەكانیان لەئەستۆ گرتووە!".

دواترین دەستکاریکردن لەسەر دوو شەممە, 27 کانونی دووەم 2020 11:42
© 2017 Hawler