کانونی دووەم 25, 2020

زاهیر عه‌بدوڵڵا.....سه‌لامه‌تییه‌!

هه‌ندێ که‌س و هه‌ندێ شت و هه‌ندێ قسه‌وباس ده‌بنه‌ نه‌خشی سه‌ر دیوار و شووره‌ی یادگاریی شارێک و سڕینه‌وه‌ و لادانیان ده‌چێته‌ خانه‌ی مه‌حاڵ.
سه‌رده‌مێک، که‌ هونه‌ر په‌یامێکی کاریگه‌ری کوردایه‌تی بوو، که‌ کوڕوکاڵی گه‌ڕه‌ک دیالۆگه‌کانی ته‌مسیل و شانۆگه‌رییه‌کانیان له‌به‌رده‌کرد و وه‌ک نواندنێک ده‌یانگوته‌وه‌، ئه‌وده‌مای شانۆ په‌یامی ڕاسته‌قینه‌ی خۆی ده‌گه‌یاند و قوتابخانه‌ی گه‌ل بوو. خه‌ڵک دانه‌دانه‌ ناوی هونه‌رمه‌ندانی شاریان ده‌زانی، سه‌ره‌ڕای ئه‌وه‌ش، کاراکته‌ری شانۆگه‌رییه‌ک یان ته‌مسیلییه‌ک ده‌بووه‌ نازناوی هونه‌رمه‌ندێک و به‌و ناوه‌ ده‌ناسرایه‌وه‌.
کێ هه‌یه‌ هه‌بوونه‌بووی نه‌دیبێ و نه‌زانێ ئۆمه‌ره‌گه‌ده‌ی چاوچنۆک کێیه‌! هه‌ندێ جار خه‌ریکبوو ناوه‌ڕاسته‌قینه‌که‌ی زاهیر عه‌بدوڵڵای ده‌سڕییه‌وه‌ و خۆی ده‌چووه‌ جێی ناوه‌که‌ی.
زاهیر عه‌بدوڵڵا، هونه‌رمه‌ندی شانۆکار و درامای شاری هه‌ولێر، وه‌ک ئه‌و هونه‌رمه‌ندانه‌ی ئه‌وان ساڵان خزمه‌تی هونه‌ریان ده‌کرد، جێ په‌نجه‌ی دیاره‌. به‌داخه‌وه‌ ئه‌و هونه‌رمه‌نده ئێستا نه‌خۆشه‌ و ئه‌مڕۆ نه‌شته‌رگه‌رییه‌کی قورسی بۆ ده‌کرێ. ئێمه‌ش، وه‌ک ستافی ڕۆژنامه‌ی هه‌ولێر، وێڕای ڕێز و خۆشه‌ویستیمان بۆ ئه‌و هونه‌رمه‌نده‌، هیوای خێرا چابوونه‌وه‌ و ساغ و سه‌لامه‌تیی بۆ ده‌خوازین و هیوادارین خێرا بکه‌وێته‌وه‌ سه‌رپێ و له‌ خزمه‌ت و به‌خشش به‌رده‌وامبێ.

© 2017 Hawler