کانونی یەکەم 07, 2019

ڕەوا جەمال، لە كۆتایی هەفتەی داهاتوودا یەكەمین كۆنسێرتی جەماوەری لە سلێمانی ساز دەكات

هونەرمەندی گۆرانیبێژ رەوا جەمال زنجیرە كۆنسێرتێك ساز دەكات، كە بەنیازە لە كۆتایی هەفتەی داهاتوو رۆژی پێنچ شەممە 12-12-2019 یەكەمین كۆنسێرتی لە سلێمانی بەڕێوە ببات، وەك خۆی باسی دەكات، بەشێكی زۆری بلیتەكان فرۆشراون، بەنیازن كۆنسێرتەكە درێژ بكەنەوە بۆ 2 رۆژ و، دەستبكەن بە فرۆشتنی بلیتەكانی رۆژی دووەم، ئەو كۆنسێرتانە لە ژێر ناوی "شنەی با" ئەنجامی دەدات، هەروەها بە نیازە لە دوای سەری ساڵی تازە لە هەولێری پایتەخت درێژە بە كۆنسێرتەكانی بدات، هونەرمەند رەوا جەمال لە میانەی لێدوانێكیدا بۆ خوێنەرانی "هەولێر" تیشكدەخاتە سەر چەند لایەنێك لە ئامادەكارییەكانی بۆ ئەو كۆنسێرتەكانی.
لە دەستپێكی قسەكانی دا هونەرمەند رەوا جەمال لە بارەی ئەنجامدان و رێكخستنی كۆنسێرتەكانی بەم شێوەیە روونی دەكاتەوەو دەڵێت: "ئەو كۆنسێرتانە دەمێكە پلانم بۆی داناوە، بەڵام بە هۆی ئەو بارودۆخە نەخوازراوانەی رووی لە رۆژئاوای كوردستان كرد، بۆ ماوەیەك بڕیارمدا كۆنسێرتەكان دوا بخەم، ئێستاش دەستمان كردووە بە ئامادەكارییەكان هیوادارم بتوانین كارێكی باش پێشكەشی جەماوەری هونەردۆستی كوردستان بكەین".
لە بەشێكی دیكەی قسەكانیدا لەبارەی كۆنسێرتەكەی بۆ ماوەی دوو رۆژ لە سلێمانی رەوا دەڵێت: "پلانی كۆنسێتەكەی سلێمانی بەو شێوەیە بۆ ئەوەی جەماوەری ئامادە بوو، ڕەنگە هەموویان لە هۆڵێكدا جێگەیان نەبێتەوە، چونكە گەورەترین هۆڵ لە سلێمانی هۆڵی تەلاری هونەرە تەنها جێگەی 1600 كەس دەبێتەوە، ئێستا زۆربەی بلیتەكان فرۆشراون بۆیە پلانمان وایە بۆ ماوەی دوو رۆژ لە رێكەوتەكانی 12 و 13/ مانگی 12/ 2019 كۆنسێرتەكان درێژ بكەینەوە لە شاری سلێمانی بەڕێوە ببەین".
لەبارەی پلانی كۆنسێرتەكەی بۆ شاری هەولێر هونەرمەند رەوا جەمال روونی دەكاتەوەو دەڵێت: "من وا بەنیاز بووم، یەكەمین جار كۆنسێرتەكەم لە هەولێری پایتەخت بێت، ئەو مەبەستەش هەوڵی زۆرمان دا لە هۆڵی سەعد عەبدوڵڵا كۆنسێرتەكە بەڕێوە ببەین، بەڵام وا دیار بوو ئەو رێكەوتەی ئێمە مەبەستمان بوو، بەهۆی هەبوونی بۆنەو كۆڕی دیكە نەدەكرا ئێمەش لەو كات و رێكەوتە كۆنسێرت ساز بكەین، لەو رێكەوتەدا كۆنسێرتەكە ساز بكەین، بۆیە بڕیارمان دا هەر لەو ماوەیەدا بە گفتوگۆ كردنمان لەگەڵ بەرپرسانی هۆڵەكە هەوڵی تەواو دەدەین لە دوای سەری ساڵی 2020 كۆنسێرتێكی جەماوەری لە شاری هەولێری ئازیز بكەم، چونكە مەبەستمە لەو شارە ئازیزە كۆنسێرتێكی جەماوەری ساز بكەم".
لە كۆتاییدا هونەرمەندی گۆرانیبێژ رەوا جەمال ئەوەشی گوت: "كۆنسێرتەكەم بە سپۆنسەری میدیای كەناڵەكانی كورد ماكس بەڕێوەدەچێت، سوپاسیان دەكەم، لە سەرەتای ئەم هەفتەیەوە لە شاری سلێمانی دەست كراوە بە فرۆشتنی بلیتەكان و لە زۆربەی كافتریاكانی شاری سلێمانی بلیتەكان دەست دەكەوێت".

 

عەبدولغەفار عەبدوڵڵا - هەولێر

© 2017 Hawler