کانونی یەکەم 07, 2019

لە دیدارێکی ئەدەبیدا کۆ دەبینەوە

لایەنێکی کارنامەی وەزارەتی ڕۆشنبیری و لاوان، بە تایبەتیش کارنامەی بەڕێوەبەرایەتیی گشتی ڕۆشنبیری و هونەری لە هەولێر، پێشخستن و گرنگیدانە بە بواری هونەری و رۆشنبیری لە کوردستان و پاڵپشتیکردنی هونەرمەندان و شاعیر و ئەدیبانە لە داهێنان و بەرهەمەکانیان. لەو چوارچێوەیەدا، بەردەوام و بێ پسانەوە خەریکی فیستیڤاڵ و کۆڕبەند و سمینار و کردنەوەی پێشانگا و کۆنسێرت و هەر چالاکییەکی دیکە بووینە، کە زانیومانە هەنگاوێکە بە ئاراستەی دروست بۆ خزمەتکردن بە گەل و نیشتمانەکەمان، لە ڕێی هونەر و کولتوورەوە.
وەک چۆن ساڵانە کردوومانە بە نەریت، فیستیڤاڵی کوردستان بۆ موزیک و گۆرانی و فیستیڤالی نێودەوڵەتی ھەولێر بۆ شانۆ و فیستیڤاڵی سینەما و کۆمەلێ چالاکی جیدی تر، هەروەها بڕیارمان داوە و ئامادەکاریشمان کردووە، کە لەمەودوا و ساڵانە کۆڕبەند و دیدارێکی ئەدەبی لە هەولێر، بۆ پێشکەشکردنی بەرهەمی شیعری و چیرۆک و رۆمان رێک بخەین و شاعیران و ئەدیبان و چیرۆکنووسانی کوردستان لە هەرێم و لە بەشەکانی دیکەی کوردستان و تەنانەت لە کوردانی تاراوگەش کۆبکەینەوە و بە نوێترین بەرهەم و نووسینەکانیان ئاشنا بین و گفتوگۆ لەسەر بەرهەمی خۆماڵی و وەرگێڕدراو، رەخنە و داهێنان، نووسین و توێژینەوە بکەین و دیدێکی نوێگەرانە و روونتر بۆ ژانرە ئەدەبییەکانمان دەربخەین.
ئەم دیدار و کۆڕبەندەی، کە بڕیار وایە لەم ماوانەدا رێک بخرێ، یەکەم دیداری ئەدەبییە لە کوردستان و ئومێدمان زۆرە لە ساڵانی داهاتوودا بتوانین باشتر و بەرفراوانتر درێژەی پێ بدەین و ببێتە نەریت و دەسکەوتێکی دیکەی گرنگی بەڕێوەبەرایەتییە گشتییەکەمان و وەزارەتی ڕۆشنبیری.
لەو دیدارە ئەدەبییەدا، کە ژمارەیەکی بەرچاو لە ئەدیبان و شاعیران و نووسەران ئامادەی دەبن، بە دید و بەرهەمەکانی خۆیان، وەڵامی ئەو پرسیارانە دەدەنەوە، کە دەمێکە ئەهلی بوارەکە بەدوایەوەن و چاویان لەوەیە بەرهەمی نوێ و کار و داهێنانی نوێی نووسەران و ئەدیبانی کورد ببینن. ئەوەی لەسەر ئێمەیە وەک لایەنی ئامادەکاری کۆڕبەند، سەرەڕای ئەو بارە ناهەموارەی دارایی، کە حکوومەت و وەزارەتمان پێیدا دەڕوا، بەڵام تەواوی ئامادەسازییمان بۆ ئەو بۆنە و کۆڕبەندە گرنگە کردووە و دەکەین، بە شێوەیەک کە زەمینەیەکی گونجا و شیاو بۆ سەرخستنی دیدارەکە فەراهەم بکەین، چاوەڕوانییشمان لە بەشداربووان ئەوەیە، کاری دانسقە و بەرهەم و داهێنانی ناوازەمان پێشکەش بکەن و بیسەلمێنن، کە کوردیش لە دونیای ژانرە ئەدەبییەکان بەجێ نەماوە و قۆناغ بە قۆناغ دەچێتە پێش. با ئەمساڵ هەمووان پێکەوە یەکەم دیداری ئەدەبی لە هەولێر ئەزموون بکەین و ساڵانی داهاتوو گرنگی و دەسکەوتی ئەو کۆڕبەندەمان باشتر بۆ دەردەکەوێ، کەوابوو هەمووتان لەگەڵمان بن و لە کات و ساتی سازکردنی ئەم یەکەم دیدارە ئەدەبییە بەشدار بن، چونکە ئەوەی ئێمە دەیکەین بۆ ئێوەیە و ئێوەش تەواوکەری ئێمەن.

 

فەرهەنگ غەفوور

© 2017 Hawler