کانونی یەکەم 07, 2019

مەجید خۆشناو باسی موزیكی دوێنێ و ئەمڕۆ دەكات

ڕۆژی پێنجشەممەی ڕابردوو، هونەرمەند و نووسەری كورد مەجید خۆشناو وەك كەسێكی خاوەن ئەزموون لە بوارەكەدا كە ساڵانێكی زۆر وەك هونەرمەندێكی موزیك لە شار و شاخ خزمەتی كردوە، لە بارەگای لقی هەولێری یەكێتی نووسەرانی كورد، كورێكی بەناونیشانی(موزیكی كوردی لە نێوان دوێنێ و ئەمڕۆدا) پێشكەشكرد.

سەرەتا هێمای بەوە كرد كە ناوەڕۆكی كۆڕەكە دەبێتە دوو بەش كە یەكێكیان بەراوردێكە لە نێوان موزیكی دوێنێ و ئەمڕۆدا، چونكە موزیك خۆراكی گیانە و هەموو مرۆڤێك حەزی لێدەكات و پێی خۆشە لەگەڵیدا ئاشنا و ئاوێتە بێت، ئەوەی دیكەشیان ناساندن و خستنە ڕووی دوو كتێب و سەبارەت بە ژیان و لاوكەكانی كاوێس ئاغا و ئەوەی دیكەیان كتیبێك بوو سەبارەت بە ژیانی هونەرمەندانی كورد ئەوانەی خزمەتێكی زۆریان لەو بوارەدا پێشكەش كردوە، بۆیە سەرەتا بە تێر و تەسەلی باسی لە موزیكی دوێنێ كرد كە هونەرمەندانی ئەوسا بە چ گیان و ڕووحیەتێكی بەرزەوە موزیكی خۆیان دەژەنێ و بەرهەمەكانیان چ ڕەسەنایەتیەكی بەرزی تێدا بەدی دەكرا بە شێوەیەك هەموو كەسێك بەوپەڕی خۆشەویستیەوە وەریدەگرت و دڵی پێ خۆش بوو، كەچی بە داخێكی زۆرە ئەو ڕەسەنایەتیە لە ئەمڕۆی موزیكی كوردیدا بەدی ناكرێ و بوونی نیە، هەوەها لەگەڵ باسەكەیدا چەندین تێكستی جیهانی بە نموونە هێنایەوە، دواتر بەدەم لێدانی قەوان و لاوكەكانی كاوێس ئاغا وەك دەخالۆ و ئەانی دیكە و باسكردنی كتیب و كورتەیەك لە ژیانی ئەو كەڵە مرۆڤە بابەتی كۆڕەكە گەرم و گوڕتر بوو كە جەماوەرێكی زۆریش تێدا ئامادە بوون و لەلایەن بێكەس حەمەد قادری شاعیریش كوڕەكە بەڕێوە برا كە زۆربەی ئامادەبوان بە سەرنج و تێبینیەكانیان بابەتی كۆڕەكەیان دەوڵەمەند كرد كە پتر لە كاتژمێرێكی خایاند.

 

محەمەد سەعید كوردە - هه‌ولێر

© 2017 Hawler