کانونی یەکەم 13, 2019

حەمید عوسمان ئـەلبوومە تازەكەی بڵاو دەكاتەوە

حەمید عوسمان یەكێكە لەو گەنجە دەنگخۆشانەی، كە هەر بە چەند تراكێكی گۆرانی و كلیپێك لەنێو كۆڕی گۆرانیی كوردیدا خۆی ناساند. ئەو گۆرانیبێژە لاوە لەسەر تاوە ئەگەرچی لەژێر كاریگەریی چەند هونەرمەندێكی كورد هاتە نێو گۆرانیگوتنەوە، بەڵام هەر زوو رێچكەیەكی بۆ خۆی دیاری كرد بۆ ئەوەی

كاری هونەریی تێدا بكات، لە دیدارێكدا بۆ خوێنەرانی "هەولێر" تیشك دەخاتە سەر چەند لایەنێك لە كارە هونەرییە تازەكان بەتایبەتی بەرهەمهێنانی ئەلبوومێكی تازەی گۆرانی و ئامادەكاری بۆ چەند كارێكی هونەریی تازەی خۆی.
لە دەستپێكی قسەكانیدا هونەرمەند حەمید عوسمان لەبارەی ئەو سەردانەی بۆ دەرەوەی وڵات و، ئەو دەنگ و دەنگۆیانەی باس لەوە دەكەن، بە ئایا بەیەكجاری كوردستانی بەجێهشتووە، لەوەڵامدا روونی دەكاتەوەو دەڵێت : "سەردانەكەم بۆ دەرەوەی كوردستان تەنیا سەردانێكی ئاساییە، بۆ گەشتێكی هونەری بووە و هیچ پلانێكم
نەبووە بە یەكجاری بڕۆم، هەروەها بەنیازم بەشداریی چەند ئاهەنگێك بكەم لە ستۆكهۆڵمی پایتەختی سوید بۆ سەری ساڵی تازەی 2020 بۆ ئەو مەبەستە و چەند كارێكی تایبەتی خۆمە، دوای سەردانەكەشم ئێستا من لە كوردستانم، بەڵام بۆ ئەو ئاهەنگەو چەند ئاهەنگێكی دیكەش دەگەڕێمەوە بۆ دەرەوەی وڵات، بە گشتی دەمەوێ ئەوە بڵێم ژیانی من و كارە هونەرییەكانیشم هەر لە كوردستان و وڵاتی خۆم باشتر و جوانتر دەچێتە پێشەوە!".
 حەمید لەبارەی ئامادەبوونی ئەلبوومێكی تازەی گۆرانی و دواكەوتنی بڵاوكردنەوەی روونی كردەوە و گوتی: "ئەو سیدیە تازەیەم دەتوانم بڵێم بەرهەمی سێ تا چوار ساڵی منە، دەمێكە خەریكی كۆكردنەوەی ئەو كۆمەڵە گۆرانییەم، بەتایبەتی شێواز و ستایلەكان و تێكستی گۆرانییەكان هەوڵی زۆرم دا، بۆ ئەوەی كارێكی جوانی لێ بهێنمە بوون، بەشێوەیەكی گشتی توانیم ئەلبوومێكی هەمجۆر لەگۆرانی میلۆدی سەرنج راكێش تازە بهێنمە بەرهەم، پلانی ئەوەم هەیە لەساڵی تازە بڵاوی بكەمەوە!".
هەروەها لەبارەی ناوەرۆكی ئەو سیدیە تازەیەی ئەوەشی گوت : "ئەو سیدیە تازەیەم لە 16 گۆرانی پێك هاتووە، ناوم لێناوە ئاوێنە چونكە گۆرانیی ئاوێنە دەستپێكی باش بوو بۆ ناساندنی من لەكاتی دەستپێكی كاری هونەریمدا، هەروەها چەند گۆرانییەكم بە "دوێت"لەگەڵ چەند هونەرمەندێكی ئازیز تۆمار كردووە، بە گشتی ئەلبوومەكەم هەوڵێكی باشی ژیانی هونەریی منە،لە هەمان كاتدا ئەو بەرهەمە یەكەم ئەلبوومی گۆرانیی منە و ئومێدی ئەوەم هەیەبەشێوەیەكی باش بگاتە دەستی هونەردۆستان و گوێگرانم!".
حەمید عوسمان ئەوەشی نەشاردەوە، كە بیرۆكەی دیكەی لەبەردەستە گۆرانیی دیكە بەشێوەی دوێت تۆمار بكات و لەمبارەیەوەش دەڵێت : "جگە لەو چەند گۆرانییەی بەشێوەی دوێت تۆمارم كردوون، بەتایبەی لە ماوەی رابردوو توانیم 2 گۆرانی لەگەڵ هەریەك لە هونەرمەندان پەیوەند جاف و خانمە هونەرمەند چنار تۆمار بكەم و بە شێوەی ڤیدیۆ كلیپ بڵاویان بكەمەوە، لە داهاتووشدا پلانی ئەوەم هەیە لەگەڵ هەریەك لەهونەرمەندان ناسری رەزازی و كەمال محەمەد بەنیازم دوو گۆرانی بە دوێت تۆمار و كلیپ بكەین، چونكە من پێم وایە گۆرانیی دووقۆڵی یا دوێت تاموچێژی تایبەتی خۆی هەیە لای گوێگران و هەروها بۆ نزیكبوونەوەش لەهونەرمەندان و ستایلەكانیش كارێكی پێویستە!".
حەمید لە بەشێكی دیكەی قسەكانیدا ئەوەشی باس كرد : "جگە لەو كارو
بەرهەمانەی باسم كردن، بەنیازم كۆنسێرتێكی جەماوەری ساز بكەم، بۆ ئەو مەبەستەش بەنیازم دوای بڵاوكردنەوەی سیدیە تازەكەم ئەو كارە بخەمە بواری جێ بەجێكردنەوە، بەڵام دەمەوێت كۆنسێرتەكەم، لە هەردوو شارەكانی هەولێر و سلێمانی
كۆنسێرتەكان ساز بكەم".
هونەرمەند حەمید عوسمان لەبارەی ناوەرۆكی
بەرهەمەكانی دیكەی هەروەها رایگەیاند : "یەكێك لەكارەكانی دیكەم بریتیە، لە
تۆماركردنی چەند گۆرانییەك بەشێوەی

گەشت، كە من وەك گوڵچنین ناوم لێناوە، دیارە لە گۆڵچنینی یەكەم سەركەوتنێكی باشم بەدەست هێنا، ئێستاش گوڵچنینی دووەمم لەمانگی رابردوو بڵاو كردەوە،
هەروەها بەنیازم كارم لەسەر چەند گۆرانییەكی شاری هەولێر و دەوروبەری بكەم، دەمەوێ ئەمجارەیان گوڵچنینی سێهەمم بۆن و بەرامی ئەو دەڤەرە جوانەی لێبێت، هەروەها گۆرانیەكیشم بە شانازیەوە لە هونەرمەندی گەورە زیاد ئەسعەد وەرگرتووە، كارم لەسەر ئەو گۆرانییەش بەشێوەیەكی باش كردووە".

 

عەبدولغەفار عەبدوڵڵا - هەولێر

© 2017 Hawler