ئەم پەڕەیە چاپ بکە

لەیلا فرووهەر تازەترین كلیپی خۆی بڵاو كردەوە

گۆرانیبێژ و ئەكتەری فارسی لەیلا فرووهەر تازەترین كلیپی خۆی بەناوی جهانم بڵاو كردەوە و جارێكی دیكە بە دەنگە خۆشەكەیەوە ئاشقان و خۆشەویستانی سەرمەست كرد.

 هەر بۆ زانیاری ئەو خانمە هونەرمەندە گۆرانیبێژە ساڵی 1959 لە شاری ئیسفەهان لەدایك بووە و لە تەمەنی 14 ساڵی هاتۆتە نێو دنیای هونەری گۆرانیگوتن. ساڵی 1964 وەك ئەكتەر ڕۆڵی بینیوە و بەهۆی هاندانی باوك و دایكیەوە بەشداری لە چەندین فیلمی سینەمایی و شانۆگەریی وەك موراد و لالە، كەلەشێر جەنگەری و چەندین كاری درامی دیكە كردوە،هەر بۆیە نازناوی منداڵی سینەمای ئێران ی پێ بەخشراوە، زیرەكی و بلیمەتی ئەو خانمە هونەرمەندە زیاتر لەوەدایە كە دەتوانێ جگە لە زمانی فارسی بە هەموو زمانێكی زیندووی وەك كوردی و عەرەبی و توركی و ئەفغانی و ئیتاڵی و ئەرمەنی و یونانی گۆرانی بچڕێ، گۆرانیە كوردییەكانیشی كە لە ماوەی ڕابردوو پێشكەشی كردوون بریتی بوون لە گیان گیان، باران بارانە، كابوكێ و چەندین گۆرانیی دیكە بوون، هەر بۆ وەبیرهێنانەوە لەیلا فروهەر ساڵی 2009 بە هاوكاریی كۆمپانیای بابیلۆن هاتە كوردستان و لە شاری هەولێر ئاهەنگێكی گەورە و قەشەنگی ساز كرد و تێیدا چەندین گۆرانیی بەجۆش و خرۆشی پێشكەش بە میوانانی ئامادەبوو كرد، جێی ئاماژە بۆ كردنە باوكی ئەو خانمە هونەرمەندە ناوی جەهانگیر ە و لەسەردەمی خۆیدا یەكێك بوە لە ئەكتەرە سینەماییە هەرە دیارەكانی ئێران و تا كۆچی دوایی بەشداری زیاتر لە 80 فیلمی سینەمایی كرد، بەڵام لە دوای ڕووخانی شای ئێران وەك هەزاران هونەرمەندی دیكە لەگەڵ ماڵ و خێزانەكەی وڵاتی ئێرانی جێهێشت و لە ولایەتی لۆس ئەنجەلوسی وڵاتە یەكگرتووەكانی ئەمریكا گیرسایەوە و ئێستا لەوێ ژیان بەسەر دەبات.

 

محەمەد سەعید كوردە - هه‌ولێر