تشرینی دووەم 19, 2019

فەیروز لە ڕێگەی وێنەیەكەوە دەردەكەوێتەوە

وێنەیەكی خانمە هونەرمەندی ناوداری لوبنانی فەیروز بڵاو كرایەوە كە لە تەمەنی 18 ساڵیدا گرتوویەتی.

وێنەكەی فەیروز لە ماڵەكەی خۆی لە گەڕەكی ئەلبلات لە وڵاتی لوبنان گیراو، لەو كاتەش گیراوە كە ئەم خانمە خەریكی قاپ شووشتنەوە لە گەڵ دایكیشی قسە دەكات.
چالاكوان لە تۆڕە كۆمەڵایەتییەكان زانیارییان لەسەر خانووەكە باس كردووە كە فەیرۆز ئەو وێنەیەی لێ گرتووە، نووسیویانە: "فەیرۆز پێشتر ناوێكی دیكەی لێ بووە، بەڵام هەر لەناو ئەو خانووە بووە كە ناویان لێناوە فەیرۆز، ەۆكاری ئەو ناوەش ئەوەبووە كە دەنگی ئەو خانمە هونەرمەندە دەگمەنە وەكو بەردی  فەیروزە بۆیە ئەوە ناوەی لێنرا
لە عێراق وكوردستانیشدا، كە گۆرانییەكانی فەیروز دەبنە دەستپێكی پرۆگرامەكانی هەندێك لە رادیۆكان، دەشێت بوترێت كەم نین ئەو كەسانەی بەجیاوازیی تەمەن و رەگەزیانوە بەڵام بە لەیەكچوونی مەزاجی هونەرییانەوە ساڵەهای ساڵ گوێیان بۆ گۆرانییەكانی ئەو خانمە رادێراوە و هاوشێوەی گوێگرانی عەرەب و غەیرە عەرەب لە " جیهانی عەرەب"دا پەیوەندییەكی توندوتۆڵیان لەگەڵ دەیان و سەدان گۆرانیی فەیروزدا پەیداكردووە و ئەو گۆرانیانە بوونەتە بەشێك لە یادهوەریی دەستەجەمعییان.
هەرچەندە فەیروز، وەك زۆرینەی هەرە زۆری ناوداران و خاوەن پلە و پایە هونەرییەكانی تری ناوچەكە و جیهان لەمەڕ كێشەی رەوای گەلی كوردستان و گەلانی تری ستەملێكراو لە جیهانی عەرەبدا خاوەن هەڵوێستێكی شایستە بەناو و ناوبانگیان نەبوون بە هەر هۆیەك بووبێت، بەڵام ناوازەیی هونەرەكەی و كاریگەریی گۆرانییەكانی هەموو بەربەستێكیان راماڵیوە لەبەردەم ئاشنابوون بە فەیروز و گۆرانییەكانی و وەلانانی هەموو هەستێكی دوور لە كایە و چێژبینینی بەرزی هونەریی.".
فەیروز ناوی تەواوی نوهاد رزق وەدیع حەدادە. لە خێزانێكی سریانی كاسۆلیكی لەدایك بووە، باوكی ناوی وەدیع حەدادە و لە چاپخانەی ڕۆژنامەی لوریون كاری كردووە.
دایكیی ناوی لیزا ئەلبوستانی بووە مەسیحیی بووە و ئەو ڕۆژەی فەیروزی گۆرانی یا جارە الوادی تۆماركردووە ئەم كۆچی دوایی كردووە. لە رۆژی 21ی تشرینی دووەمی ساڵی 1935 دا لە بەیروتی پایتەختی لوبنان لە دایك بوو.
فەیروز، ناوی یەكێكە لە بەردە گرانبهاكان و رەنگەكەی پیرۆزەییە.
یەكێك لە هەرە دیارترین ئایكۆن سیمبوڵە ناسراوەكانی موزیكی هاوچەرخی عەرەبە زیاتر لە 150 ملیۆن دانە لە ئەلبومە هونەرییەكانی فرۆشراوە. یەكەمین منداڵی خانەوادەكەی بووە.
لە تەمەنی 6 ساڵیدا لە ئاهەنگێكی خوێندنگەكەیدا بەشداریی دەكات و گۆرانی دەڵێت.یەكێك لە مامۆستاكانی بە ناوی ” محەمەد فلیفل”ەوە كە ئاوازدانەری مارشی نیشتمانیی سوریایە بە ناوازەیی دەنگی فەیروز سەرسام دەبێت و بەو هۆیەشەوە لەگەڵ باوكی فەیروز قسە دەكات كە ڕێگەی پێ بدات گۆرانیی بڵێت، بەڵام باوكی بە مەرجێك ڕازی دەبێت كە تەنها گۆرانیی نیشتمانیی بڵێت.
ئەوكاتەی فەیروز پەیوەندیی دەكات بە كۆڕالی ڕادیۆی لوبنانەوە حەلیم ڕومیی باوكی ماجدە رومیی نازناوی فەیروزی پێدەبەخشێت.
سەرەتاكانی بە دەستهێنانی نازناو و دەركەوتنی فەیروز دەگەڕێتەوە بۆ سەرەتای ساڵی 1952ئەو كاتەی بە ئاوازەكانی عاسی ڕەحبانیی گۆرانیی گوت. هەر لەگەڵ ئەو ئاوازدانەرەش هاوبەشی پێك هێنا.
دوو كوڕ و دوو كچ بە ناوەكانی زیاد و لەیال و ڕیما و هالیی یان هەبوو. زیاتر لە 800بەرهەمی هونەری لە شانۆ و و گۆرانی تۆمار كراوی هەبوو. دوای مردنی عاسی ڕەحبانی هاوسەری لە ساڵی1986دا، زیاد ڕەحبانی كوڕە گەورەی فەیروز، سەرپەرشتی كارە هونەرییەكانی دایكی كردووە و ژمارەیەكی زۆر ئاوازی بۆ گۆرانییەكانی داناوە و شێوازێكی نوێی لە موزیكی لوبنانیی و عەرەبیی و شەرقیی جیهانیدا خوڵقاند. فەیروز هەرگیز گۆرانیی بۆ هیچ سەرۆك و سەركردەیەكی عەرەبی بە چاك و خراپیانەوە نەوتووە.
لە ماوەی كاروانی هونەریدا بووەتە خاوەنی 65 ئەلبومی گۆرانیی جگە لە فێستیڤاڵ و كۆنسێرتەكانی كردوونی.فەیروز كەسێكی كەمدوو و دورەپەرێز بووە لە چاوی كامێرا و میدیا و لێدوانە تەلەفزیۆنییەكان.لەكاتی شەڕی لوبناندا بەهۆی ئەوەی ئامادە نەبووە وڵاتەكەی بەجێ بهێڵێت ماڵەكەیدا لیالی كچی بەهۆی بۆردومانەوە دەكوژرێت.

 

ئاریان دەرگەڵەیی- هه‌ولێر

© 2017 Hawler