کانونی یەکەم 12, 2018

به‌ختیار سه‌عید: درووستكردنی ئه‌لبووم بۆ شێوه‌كاران ماندووبوونی زیاتری ویستووە

"بەختیار سەعید" کە یەکێکە لە ناوە دیارەکانی بواری شێوەکاری کە لەو بوارەدا خزمەتی بەرچاوی زۆربەی شێوەکارانی کوردی کردووە، هاوکات وەک چالاکێکی ڕۆشنبیری بەردەوام لە چالاکیدا بووە. لەم دیمانەیەی هەولێردا وەڵامی چەند پرسیارێک دەداتەوە.

*حەوتڕەنگە چۆن دامەزراو ناوەکەی لەچییەوە هاتووە؟
_ ناوەندی 7 رەنگە وەكو ناوەندی هونەری لەرۆژی 16/5/2017 دامەزراوە بەمەبەستی گرنگیدانی زاتر بە هونەری شێوەكاری لەباشووری كوردستاندا، ناوەكەی لەوەوە سەرچاوەی گرتووە كە سەرەتای دامەزراندنی ناوەكە لەوەوە سەرچاوەی گرت كە ئێمە هاوكاری هەموو بوارەكانی هونەر بین، شانۆ، شێوەكاری، سەما، سینەما، میوزیك، بیناسازی، ئەدەب و هونەر، بەم بەشانە دەوترێت هونەرەكانی حەوتەم و بەتایبەت بە سینەما دەوترێت هونەری حەوتەم، سەرەتاكە بەمشێوەیە بەرنامەی بۆ داڕێژرا، بەڵام بەداخەوە ئەو بارە ئابوورییەی كوردستان ئێمەشی ناچاركرد تەنها لە شێوەكاریدا كار بكەین وەكوو قۆناغی یەكەم.
*تا چەند حەوتڕەنگە توانیویەتی لە دامەزراندییەوە تا ئێستا شتێک بخاتە سەر خەرمانی شێوەکاریی کوردی؟
_ بەدڵخۆشییەوە لەماوەی ئەو كەمتر لە دوو ساڵەی كە دامەزراوە توانیوێتی ببیتە هاوكارێكی زۆری شێوەكار لەسەر ئاستی باشووری كوردستان و باكورو رۆژهەڵاتی كوردستانیش هەركاتێك شێوەكارێك هاتبێتە باشوورو بەتایبەت سلێمانی كە پێویستی بەهاوكاری كردنەوەی پیشانگە بووبێت ئەوە 7 رەنگە ئەو هاوكارە بەردەوامە بووە بۆ ئەوان لەو تەمەنەدا زیاتر لە 32 پیشانگەی تایبەت و هاوبەشی بۆ شێوەكاران كردۆتەوەو لەشارو چارۆچكەی جیاوازی كوردستان، لەهەمانكاتدا بۆتە سەنتەرێكی زانیاری بەخشین بۆ خوێندكاران كە پێویستیان بە زانیاری بووبێت لەسەر شێوەكاری، لەهەمانكاتدا ئەمساڵ 7 رەنگە هەنگاوێكی جۆری نا بە درووستكردنی یەكەمین رۆژنامەی تایبەت بە هونەری شێوەكاری بەناوی ( تابلۆ) كە وەكو پاشكۆیەك لەناو رۆژنامەی كوردستانی نوێ مانگانە بە 12 لاپەرە بڵاو دەبێتەوە.
*خۆت جیا لەوەی ڕۆڵی دیارت هەبووە لە چەندان نمایشی شێوەکاری، هاوکات درووستکردنی ئەلبووم بۆ شێوەکارە دیارەکان، لەو دوو بوارەدا واتا پێشانگای شێوەکاری و درووستکردنی ئەلبووم لە کامیاندا زیاتر هەستت بە ماندوێتی کردووە؟
_ دیارە هەردووكیان ماندوو بوونی خۆیی هەیە، بەدڵنیایی ئەلبوومەكان ماندووبوون و كات و تەمەنی زیاتری ویستووە تا درووستبوون، هیچ یەكێك لە ئەلبوومەكان كەمتر لە ساڵێك كارم تێدا نەكردووە تا گەیشتۆتە ئەنجام، بۆ نموونە ئیستا 3 ساڵە كار لەسەر ئەلبوومێك دەكەم كە تایبەتە بە هونەری شێوەكاری كەركوك و هێشتا تەواویش نەبوو، هۆكارەكەش ئەوەیە كە سەرچاوەی پێویست نییەو زۆر كات تۆ دەبیتە سەرچاوە، لەبەر ئەوە زەحمەتە بۆیە ماندووبوونەكەی زیاترە.
*بەپێی بواری ڕۆشنبیری شێوەکاری لەنێو پارێزگاکانی کوردستاندا تۆ لە کام پارێزگادا زیاتر هەڵپەی شێوەکاری دەبینی؟
_ بەبێ لایەنگری بەدڵنیایی شاری سلێمانی پلەی یەكەم وەردەگرێت، چونكە ئەگەر بەراووردی بوونی پیشانگەو چالاكییە هونەرییەكان بكەین لەناو شاری سلێمانی زیاترە، بۆ نموونە لەماوەی مانگی 2 و 3دا حەوت رەنگە بەتەنها خۆی 3 پیشانگەی بۆ پشتگیری لە عەفرین كردۆتەوە، پیشانگەیەكی كاریكاتیر، پیشانگەیەكی پۆرترێت بۆ كەسایەتییەكانی شار بەناوی شانازییەكان دەگەڕێنەوە شار، هەروەها لە رۆژی جیهانی ژناندا لە 8ی مارس دوو پیشانگەمان هەیە، هەروەها لە رۆژی 1/4/2018 دیداری كاریكاتێری كوردیمان هەیە لەسەر ئاستی كوردستانی گەورەیەو هەریەك لە بەڕێوەبەرایەتیی گشتیی رۆشنبیری و هونەری سلێمانی و سەندیكای هونەرمەندانی كوردستان و سەندیكای رۆژنامە نووسان و رۆژنامەی كوردستانی نوێ سپۆنسەری بیرۆكەكەیان كردووە، ئەوە جگە لەكارو چالاكییەكانی تر.
*ئەوەی هەستی پێ دەکەین چالاکییەکان زیاتر دەکەونە ناو شارە گەورکان، ئەی هەوڵەکان بۆ شارۆچکە و شارە دێیەکان چۆن دەبینیت؟
_ بە دڵخۆشییەوە 7 رەنگە كاری لەسەر ئەوە كردووە، شێوەكارانی شارۆچكەكانی هێناوەتە ناو شاری سلێمانی و بە پێچەوانەشەوە، بۆ نموونەكردنەوەی پیشانگەیەكی فراوان بۆ شێوەكارانی كفری، پیشانگەیەكی فراوان بۆ شێوەكارانی كەلار، بردنی پیشانگە بۆ كەلارو هە ڵەبجەو ئەنجامدانی چالاكی لە رانیەو عەربەت و چەندین بیرۆكەی تریش هەیە كە كاری لەسەر بكەین.
*بۆ داهاتوو چاوەرێی چیت لێ بکەین؟
_ گەورەكردنی ناوەندی 7 رەنگە و فراوانبوونی چالاكییەكان و كردنەوەیەكی بەشێكی نوێ كە تایبەت دەبێت بە ئیشی دەست وەكو سامانێكی كلتوری نەتەوەیی و گرنگیدانی زیاتر بەكاری كلتووری گەشتیاری لەباشووری كوردستاندا

 

هاوتا وشیار ئەسوەد - هه‌ولێر
.

© 2017 Hawler