تشرینی یەکەم 17, 2019

یاد و وەفایەك بۆ هونەرمەندی كۆچكردوو نەسرین شێروانی

میللەتی كورد هەر لەدێر زەمانەوە لە هەموو پارچەكانی كوردستاندا گەلێك خانمە هونەرمەندی دەنگخۆش و خاوەن سەلیقەی هەبوە و لە ماوەی كاركردنی هونەری خۆشیانەوە توانیویانە ئەرشفێكی دەوڵەمەند بۆ خۆیان پێك بهێنن و جەماوەرێكی زۆریش لە دەورەی خۆیان كۆ بكەنەوە كە یەكێك لەوانە خاتوو (نەسرین شێروانی) یە.

 دیارە ئێمە تەنیا گوێبیستی دەنگە خۆشەكەی بووینە و شتێكی ئەوتۆ لەبارەی ژیان و هاتنە نێو هونەری نەزانین تا ئەو كاتەی لەملا و ئەولا هەندێك سەرچاوەی باوەڕ پێكراومان چنگ دەكەوێ كە ئەو هونەرمەندە و هاوشێوەكانی بەچ ناخۆشی و دەردە سەرییەك خزمەتی هونەریان كردوە و پەیامی خۆیان لە ڕۆژە سەختەكاندا گەیاندوە، خاتوو نەسرین شێروانی كۆچكردوو بە ئەسڵ خەڵكی كوردستانی باكوورە و هەر دوای كۆتایی هاتنی جەنگی جیهانی یەكەم هاتوونە باشووری كوردستان، ئەو خانمە گۆرانی بێژە ناوی تەواوی نەسرین عومەر عوسمانە و لە ساڵی 1922 لە زاخۆ لە دایك بوە و هەر بەهرەی دەنگخۆشی تێدا دەركەوتوە هەواڵی ئەوەیداوە هەموو كۆتە كۆمەڵایەتیەكان بشكێنێ و دەنگ زوڵاڵەكەی خۆی بگەیەنێتە گوێچكەی هەموو كەسێك ئەوەبوو لە ساڵی 1944 بەهۆی هونەرمەندی خوالێخۆشبوو عەلی مەردان چۆتە ئیزگەی بەغدا و بە سنگ فراوانیەوە گۆرانی بۆ جەماوەرەكەی چڕیوە و هەر ئەو كاتە جەماوەرێكی زۆری لەدەوری خۆی كۆكردۆتەوە، چونكە خاوەن ستایلێكی زۆر تایبەت بوو لە گۆرانی گوتن و كەم كەس لە دەنگ و ئەداكردنی گۆرانی هاوشانی بوە هەر بۆیە ناوی بەو شێوەیە دەركەوتوە، ئەو خانمە گۆرانی بێژە دەنگخۆشە لە ماوەی كاری هونەری و گۆرانی گوتندا تا ناوەڕاستی حەفتاكانی سەدەی ڕابردوو توانی پتر لە 420 گۆرانی تۆمار بكات و ڕەنگە لەو ژمارە زیاتریشی هەبێ كە تا ئێستا ئاشكرا نەكرابێ، بەڵام دیاترینیان كە بە گوێی هەموو كوردا ئاشنایە گۆرانی (دەلێ لێ) یە، بۆیە ئەو خانمە هونەرمەندە دەنگخۆشە لەو دەروازەیەوە بچێتە نێو دڵی هەموو لایەوە لە كەشو هەوای ژنی ماڵەوە بێتە دەرەوە و هونەرێك پێشكەش بكات جیاواز لە كەسانی دیكە و بەهۆی قاڵبوونەوەی زیاتر لە هونەرەكەیدا توانی ئاشنایەتیەكی زۆریش لەگەڵ زۆربەی زۆری هونەرمەندانی دیكە پەیدا بكات و شیعری شاعیرانی وەك جگەر خوێن و حافز مائی و شێخ سەلام بكاتە گۆرانی بەیات و حوسێنی، بەڵام بە داخ و پەژارەیەكی زۆرەوە ئەو خانمە هونەرمەندە لە 10-10-1990 لە شاری بە غدا چاوەكانی لێكنا و بۆ دوا جار كۆچی دوایی كرد و هەر لەوێش بەبێ نازی خاك سپێردرا، بەڵام داخەكەم لە نێوەندەكانی هونەری و ڕاگەیاندنەوە زۆر بە كەمی یادی دەكرێتەوە و تیشكی دەخرێتە سەر.

 

محەمەد سەعید كوردە - هه‌ولێر

© 2017 Hawler