تشرینی یەکەم 17, 2019

گۆرانییەكانی مامۆستا "خالقی" هێزێكی گەورەی پێ بەخشیوم و بەدەنگی و هەستی ئەو گەشەم كردووە!

هونەرمەندی گۆرانیبێژ شوان قەرەداغی بەنیازە چەند بەرهەمێكی لە گۆرانییەكانی هونەرمەندی گەورە مەزهەری خاڵقی تۆمار بكات و لە دوو توێی ئەلبوومێكی گۆرانیی دا بڵاوی بكاتەوە، هەروەك خۆی ئاماژەی بۆ دەكات، گۆرانییەكانی مامۆستا "خالقی" هێزێكی گەورەی پێ بەخشیووە، بۆ ئەوەی بتوانی گۆرانی بچڕێت، لە لێدوانێكدا بۆ خوێنەرانی "هەولێر" هونەرمەند شوان قەرەداغی لە بارەی چەند كارێكی دیكەی داهاتووی بەم شێوەیە تیشكی خستە سەر چەند لایەنێك لەكارە هونەرییەكانی.

لە دەستپێكی قسەكانیدا هونەرمەند شوان قەرەداغی باس لەوە دەكات، بەنیازە ئەلبوومێكی گۆرانی بەرهەم بهێنێت، كە سەرجەم گۆرانییەكان پێكهاتەی بەرهەمەكانی مامۆستا مەزهەری خالقی بێت و لەمبارەیەوە دەڵێت : "من لەماوەی ژیانی هونەریمدا بەدەنگ و هەستی ئەو هونەرمەندە بە توانایە گەشەم كردووە، گۆرانییەكانی مامۆستا مەزهەری خالقی هێزێكی گەورەی پێ بەخشیووم، بۆیە هیوادارم بتوانم لە داهاتوودا پڕۆژەیەكم هەبێت، ئەلبوومێكی گۆرانی تۆمار بكەم، كە سەرجەم بەرهەمەكانی مامۆستا خالقی لە خۆی گرتبێت، دیارە بۆ ئەو پرۆژەیە پێویستم بە هاوكاری و پاڵپشتییەكی باشە، كە تا ئێستاكە نازانم چۆن و بەچ شێوەیەك بەدەستی دەهێنم، ئومێدم وایە بتوانم ئەو كارە بە زووترین كات بخەمە بواری جێبەجێكردنەوە".
لە بارەی بڵاوكرنەوەی گۆرانییەكی مامۆستا "خالقی" بەر لەماوەیەك هونەرمەند شوان قەرەداغی گوتی : "ئەو گۆرانییە لە ژێر ناوی كیژی لادێ بوو، بەرهەمەكە ئاوازی مامۆستا "خالقی" خۆی دایناوە، هۆنراوەكەی مامۆستا گۆران ـی شاعیر نووسیویەتی، دیارە من ئەوە 3 گۆرانیی ئەو هونەرمەندە گەورەیە دەیڵێمەوە، هیودارم كارێكی باشم كردبێت، گۆرانییەكە میوزیكی لەلایەن هونەرمەندی میوزیكژەن نزار زێوەیی و لە ستۆدیۆی گرووپی میوزیكی  لوڕ تۆمار كرابوو، بەشێوەیەكی باش پێشوازییەكی جوان لە بەرهەمەكە كرا".
 شوان قەرەداغی لەبارەی ئاستی بەرهەم هێنانی گۆرانیی كوردی ئێستا لە چ ئاستێكدایە لەمبارەیەوە گوتی : "ئاستی بەرهەم هێنانی گۆرانی بۆ هەندێك لەو گەنجە هونەرمەندانەی تازە هاتونەتە ناو بوارەكە زۆر باشەو، وەك دەبینین رۆژانە بەرهەمی تازەی گۆرانی دەبینین، بەرهەمەكانیش لەرووی كوالێتیەوە باشن، بەڵام لە رووی ناوەرۆكەوە لە ئاستێكی لاوازدایە، ئەوەشیان دیارە بۆ هەموویان وانیە، چونكە بەشێكیان دەنگیان خۆشە و دەتوانن كاری باش بهێننە بوون، بۆیە ئاستی بەرهەم هێنانی گۆرانی بۆ گەنجەكان زۆر باشە و هەموو شتێك بەردەستە بۆیان، بەڵام بۆ هونەرمەندە بە ئەزموونەكان هێشتا قەیڕانەكە بەردەوامە!".
 قەرەداغی هونەرمەند لە بەشێكی دیكەی قسەكانیدا ئەوەشی خستەڕوو : "بەشێكی دیكەی تێكچوونی ئەو ڕەوشە!، راگەیاندنەكان بەرپرسیاری یەكەمن، چونكە بایەخێكی زۆر بە هەندێك گۆرانیبێژ و گۆرانی دەدەن بەبێ ئەوەی بزانن ناوەرۆكی گۆرانییەكە لە چ ئاستێكدایە!، لەكاتێكدا گۆرانی ئاوامان هەیە پڕەیەتی لە نەشان و دەرچوون لە ئیقاع، ناتەواوی لە تۆن تا دەگاتە كلیپ، ئینجا ئەگەر باسی ئاواز و تێكستی گۆرانییەكەش بكەین، ئەوا دەبێ زۆرتر و زیاتر هەڵوەستەی لەسەر بكەین، ڕەنگە شرۆڤەیەكی زۆر تایبەتی پێویست بێت!، بەشێوەیەكی گشتی گۆرانیی كوردی بە هۆی نادیاری كۆمەڵێك هونەرمەندی باش و لێهاتوو لە قەیڕاندایە، دەتوانین بڵێین جار جارە لێرەو لەوێ بە دەگمەن گوێمان لە گۆرانییەكی باش دەبێت!".
ئەو هونەرمەندە یەكێكە لە ئەندامە دیارەكانی گرووپی میوزیكی "نالی" دیارە ئەو گرووپە كار و چالاكییەكانیان دوای چەند ساڵێك دابڕان، ئەو ساڵ جارێكی دیكە گرووپەكەیان خستەوە سەرپێ، لەبارەی هەبوونی چالاك و جموجۆڵەكانیان گوتی : "گرووپەكەمان بەرهەم چالاكی ئامادەكراوی زۆرە، بەڵام پێویستی بە پاڵپشتی هەیە، دیارە سەردەمی ئێستاش بەبێ هەبوونی پاڵپشتی هیچ كار و بەرهەمێك نایەتە بوون، ئێمەش وەكو گرووپی میوزیكی "نالی" بەرهەمی زۆرباشمان ئامادەیە، پلان و بەرنامەی زۆر چاكمان داڕشتووە، لە هەوڵی ئەوەشداین لە ئایندەیەكی نزیكدا بە چەند چالاكییەك دەست پێ بكەینەوە".

 

عەبدولغەفار عەبدوڵڵا - هه‌ولێر

© 2017 Hawler