تەمموز 15, 2020

یاد و وەفایەك بۆ هونەرمەندی موزیكژەن ولیەم یۆحەننا

یادكردنەوەی هونەرمەندان و خاوەن بەهرە گەشەكان كارێكی پێویستە و ئەركی سەرشانی هەموو لایەكە، بە تایبەتی ئەوانەی هەموو تەمەنی خۆیان لەو پێناوەدا بەخشیوە و چەشنی مۆمێك تواونەتەوە بۆ ئەوەی دەور و بەریان ڕۆشن بكەنەوە هەر وەك هونەرمەندی موزیكژەن ولیەم یوحەننا كە ئەمڕۆ 19 ساڵە كۆچی دوایی كردوە و دڵە گەورەكەی لە لێدان كەوتوە و بە جەستە لەلامان نەماوە، بەڵام كار و چالاكی و شاكارە مەزنەكانی هەمیشە خۆیمان پێ ئاشنا دەكەنەوە، ولیەم یەحەننای كۆچكردوو ساڵی 1934 لە شاری سلێمانی لە دایك بوە و هەر زوو حەز و خولیای چۆتە موسیقا ئەویش دوای ئەوەی گوێی لە باوكی گرتوە كە ئامێری نای بەجوانترین شێوە ژەنیوە، هەر بۆیە خوێندنی سەرەتایی و ناوەندی و ئامادەیی تەواو دەكات و ساڵی 1951 دەچێتە پەیمانگای هونەرە جوانەكانی بەغدا و لەبەشی موسیقا وەردەگیرێ و ساڵی 1954 ئەو قۆناغە بەسەركەوتوویی تەواوی دەكات و بە شێوەی ئەكادیمی فێری هەر سێ ئامێری عود و كەمان و چەلۆ دەبێت، پاشان دەگەڕێتەوە شاری سلێمانی و دەبێتە مامۆستای مۆسیقا لە قوتابخانەی فەیسەڵیە و لە بواری موسیقا دەبێتە كەسێكی یەكجار دیار و بەرچاو لە شارەكە و یەكێك دەبێ لە دامەزرێنەری تیپی موسیقای مەولەوی كە یەكەمین تیپی موسیقای مۆڵەت پێدراو دەبێت لە سلێمانی، ئەو تیپە لەو سەردەمەدا بەشداری لە هەموو كار و چالاكیە هونەرییە دیار و بەرچاوەكان كردوە و تا سەرەتای شەستەكان لە چالاكی بەردەوام بوە، دواتر تیپی موسیقای سلێمانی دێتە مەیدان و خزمەت دەكات، ئەو هونەرمەندە تا ئەو كاتەی سەری نایەوە و ماڵئاوایی كرد هەموو ژیانی خۆی پێشكەش بە موسیقا و میللەتەكەی كرد و خاوەنی دەیان و سەدان چالاكی جۆرا و جۆر بوو وەك لە ژەنینی موسیقا و ئاواز دانان بۆ زۆرێك لە هونەرمەندە ناودارەكان و شان بە شانی هونەرمەند فرەنسیس داود و هونەرمەندانی دیكە زۆر كاری كردوە لەوانەش بە ئاوازی مۆسیقا لە ساڵی 1986 لە كەركوك لەگەڵ هەردوو هونەرمەند فرەنسیس داود و خالد سەركار بەشداری كردوە لە ئۆپەرێتی (دارستان) و ئۆپەرێتی (پردی دەلال) و (بەیتی ئاگر) ی شێركۆ بێكەس و ئۆپەرێتی (كەژاوەی مێژوو) و زۆری كاری هونەری دیكە كردوە وەك كردنەوەی خولی مۆسیقا بۆ قوتابیان و دانانی ئاوازی موسیقا بۆ كاری شانۆیی و زۆر چالاكی دیكە، بۆیە دوای ئەو هەموو كار و بەخششە هونەرییانە لە ڕۆژی 14 ی ئەیلوولی ساڵی 2005چاوەكانی لێكنا و كۆچی دوایی كرد، بەڵام ئەرشیف و یادگاری زۆر بەنرخی بۆ ئێمە جێهێشت.

 

محەمەد سەعید كوردە - هە‌ولێر

© 2017 Hawler