ئەیلول 21, 2019

مقۆمقۆ بە زمانی گوڵ، ڕەخنە لە دیاردە چەوتەكان دەگرێ

دەمێكە ڕاگەیاندنی كوردی بە هەموو بەشەكانیەوە بایەخ و گرینگیی زۆریان بە بایەتی تەنز و ڕەخنە داوە و بەشێوەیەكی تەندروست بابەتەكانیان خستۆتە ڕوو، بەمەبەستی ئەوەی چارەسەری گونجاوی بۆ بدۆزرێتەوە و ڕەخنەكەش جێی خۆی بگرێ بێ ئەوەی كەس و لایەنێك دڵی گەرد بگرێ.

 بەڵام بەداخەوە هەندێ ڕاگەیاندن و دەزگای دیكە بە شێوەیەكی ناتەندروست و بەمەبەست ڕەخنەكانیان ئاراستە دەكەن بێ ئەوەی سنوورێك ڕەچاو بكەن تەنیا مەبەستیان ڕەخنەكەیە و هیچی دیكە، بۆیە بەو كارەیان زۆر جار گرژی و ئاڵۆزی دێننە ئاراوە و هیچ سوودێكیش نابەخشن، بەڵام ئەوەتاماوەیەكە لەكەناڵی سپێدەوە هەموو دوو هەفتە جارێك و لە شەوانی هەینی بەرنامەی (مقۆمقۆ) دەبێتە میوانێكی ئازیزی ماڵەكانمان و لە ڕێگای بڕگە بەتامو چێژەكانیەوە چەندین دیمەنی جوان و ڕەخنەئامێزمان پێشكەش دەكەن كە هونەرمەندە دیار و بە ئەزموونەكانی هەردوو شاری هەولێر و سلێمانی تێدا بەشدارن وەك مستەفا ئەحمەد و زاهیر عەبدوڵڵا و حەمە ڕەشید هەرەش و بەیان مەحموود و هادی مەحموود و مزەفەر محەمەد و سەلاح پەرچەم بلباس و ئومێد كەمال و ڕزگار عەبدولڕەزاق و فەرەیدوون قاسم و سۆما زاهیر، لەبارەی ئەو بەرنامەوە هونەرمەند سەلاح پەرچەم بلباس بۆ لاپەڕەی هونەری ڕۆژنامەی هەولێر ناسنامە و ناوەرۆكی بەرنامەكە ئاشكرا دەكات و دەڵێ: كۆمەڵگەی ئێمە پێویستی زۆری بە بەرنامەیەكی لەو چەشنە هەیە تا كەموكووڕیەكانی خۆی بدۆزێتەوە، دیارە ئەو جۆرە بەرنامانە لە زۆر وڵات بوونیان هەیە و جەماوەری تایبەت بە خۆشیان هەیە، بۆیە ئامانج لەو بەرنامەیەی ئێمە كە دەمێكە بە هاوكاری هەموو لایەك گەڵاڵەمان كردوە ئەوەیە ببێتە سەكۆیەك بۆ گوتنی كارە نەشیاوەكانی كۆمەڵگە و لەنگیەكان و هەموو ڕەخنەكانیش بە زمانی گوڵ ئاراستە دەكەین تا لایەنی بەرامبەر بتوانێ سوودی لێ ببینێ و هەڵە و كەموكووڕیەكانی خۆی چاك بكاتەوە، بۆیە ئێمە وەك هونەرمەندانی هەردوو شاری هەولێر و سلێمانی وەك یەك تیم بۆ سەرخستنی ئەو بەرنامەیە كار دەكەین و پەنجە بۆ هەموو دیارە نەشیاوەكان درێژ دەكەین و بەوپەڕی سنگفرەوانیەوەش سوود لە پێشنیاری خەڵكی وەردەگرین و بڕگەی بەرنامەكانمانی پێ دەوڵەمەند دەكەین، بۆیە لەو ڕووەوە دەكرێ هەموومان هاوكاریی یەكدی بكەین.

 

محەمەد سەعید كوردە - هه‌ولێر

© 2017 Hawler