تشرینی دووەم 22, 2019

خەونی من ئەوەیە بەشداری لە كارێكی سینەمایی بكەم

لەو ساڵانەی ڕابردوودا چەندین هونەرمەندی گەنج هاتنە نێو بواری هونەری و بەهۆی شارەزایی خۆیانەوە توانیان چەندین كاری هونەری باش و بەرچاو پێشكەش بكەن و هەر لە ئێستاوە ئەرشیفێكی دەوڵەمەند بۆ خۆیان پێكەوە بنێن تا كەسانی دیكە بتوانن سوود لە ئەزموونیان وەربگرن.

كە یەكێك لەوانەش هونەرمەندی هەڵكەوتوو (یوسف ئەنوەر)ە كە ساڵانێكی زۆرە بە كاری هونەرییەوە خەریكە و لە چەندین كوورتە تەمسیلی بەشداریكردوە و ئەوەی جێگای سەرنجە وەك هونەرمەندێكی بزێو و ئەكتیف لە زۆربەی زۆری كۆڕە هونەری و ڕۆشنبیری و فۆلكلۆری و جەماوەرییەكان ئامادەیی هەیە و بە زەقی دیارە و بە زەوق و سەلیقەیەكی زۆرەوە بەشداری دەكات و زۆری حەز لەو بوارەیە. كاكە یوسف كەسێكی قسەخۆش و دەم بەخەندەیە هەر بەو هۆیەوەش پەیوەندییەكی كۆمەڵایەتی باشی لەگەڵ خەڵكێكی زۆر لە هەموو توێژەكاندا هەیە، لە دەرفەتێكی كوورتدا سەبارەت بەو كوورتە تەمسلیانەی كە وەك ئەكتەر بەشداریی تێدا كردوون دەڵێ: من بە هاوكاری لەگەڵ هونەرمەندی خۆشەویست خالید كۆیی هاتمە نێو بوارەكە و تا ئێستا بەشداریم لە چەندین چیرۆكی تەمسیلی كوردیدا كردوە، وەك گەندەڵستان و هەنگوینی تاڵ و ئەمانەت پارێزی و سۆزی باوك و چەندین كاری دیكە كە ناتوانین لێرەدا هێما بۆ هەر هەموویان بكەین، پاشان لەگەڵ هونەرمەندی خۆشەویست سەلاح پەرچەم بڵباس درێژەم بە كارەكەمدا و بە یارمەتی و هاوكاری ئەوەوە زیاتر چوومە پێشەوە و كاری دیكەم كرد. ئێستاش لەگەڵ هونەرمەندی خۆشەویست ساڵح بێكەس كار دەكەم و درێژە بە كاری هونەری دەدەم و حەز ناكەم بۆ ساتێكیش لەو بوارە دوور بكەومەوە بۆ ئەوەی بتوانم خزمەتێكی بچووكی هونەری نواندن و تەمسیل بكەم كە ئەوەیان پەیامێكی خێرایە و بە زوویی دەگاتە خەڵك و سوود و قازانج بە تێكڕای كۆمەڵگە دەبەخشێت. لە هەمووشی بەرچاوتر ئەو هونەرمەندە دەڵێ: هەموو ئەو كارە هونەرییانەی كە بەشداریم تێدا كردوە بە بڕوا و قەناعەتی خۆم بووە و لە هیچیان پەشیمان نیم، چونكە ئەگەر كاری هونەری قەناعەتی لەگەڵدا نەبێ هەرگیز سەركەوتوو نابێ و ئامانجەكانی خۆی ناپێكێ، بۆیە هەموو كارێك هونەری دەبێ ئەشقی لەگەڵدا بێ تا بتوانی داهێنانی تێدا بكەی و جەماوەریش لە خۆت ڕازی بكەی، سەبارەت بە كاری سینەمایی و ئەشقی لە ئەندازە بەدەری بۆ ئەو بوارە یوسفی هونەرمەند دەڵێ: خەونی من ئەوەیە ڕۆژێك لە ڕۆژان بەشداری لە كارێكی سینەمایی بكەم، چونكە سینەما لای من هونەرێكی زۆر بەرز و پیرۆزە و كاركردن تێیدا كەمێك قوورسە، بەڵام شەرەفێكی گەورەیە بۆ هونەرمەند بتوانێ كاری سینەمایی ئەنجام بدات، بۆیە هەوڵ دەدەم لە داهاتوو كاری بۆ بكەم تا ئەو خەونەم بێتە دی.

 

محەمەد سەعید كوردە - هه‌ولێر

© 2017 Hawler