ئەیلول 21, 2019

یاد و وەفایەك بۆ ئەو هونەرمەندەی كە دەیگوت ئێمە پێشمەرگەین هەتا ماوین لە ژین

زۆر لە جێگای خۆیدایە وەك وەفادارییەك یادی ئەو هونەرمەندانە بكەینەوە كە ڕۆژێك لە ڕۆژان خزمەتێكی بەرچاویان پێشكەش كردوە بە جۆرێك هەموو توانا و هێزی خۆیان لە پێناو بەرزكردنەوەی هونەر بەسەر بردووە و ناویان بە ڕوو سپیەتی چۆتە نێو لاپەڕە گەشەكانی مێژووە وە، كە یەكێك لەوانەش هونەرمەندی كۆچكردوو (فواد ئەحمەد)ە، كە خاوەن دەنگو سەدایەكی خۆش بووە و لە پاڵ ئەوەشدا هەموو تەمەنی خۆی لە پێناوی هونەردا بەسەر برد و زۆریش دڵسۆز بوو بۆ خاك و وڵات و پێشمەرگەی كوردستان، ئەوەتا زۆر جەسوورانە گۆرانیی بۆ پێشمەرگە گوتووە كە دەڵێ: (ئێمە پێشمەرگەین هەتاكو ماوین لە ژین) ئەوەش ئەوپەڕی دڵسۆزیە بۆ هونەرمەندێكی وا كە بەو شێوە جوانە وەسفی ئەو كەسە گیان لەسەر دەستانە بكات و ناوەكەی بە پیرۆزی ڕابگرێت، ئەو هونەرمەندە كۆچكردووە بە سەلیقە و دەنگ خۆشەی بۆ كورد ژیا و هەر بۆ كوردیش سەری نایەوە، دێتەوە بیرم لە دوا سەفەری بۆ كوردستان هاتە بارەگای گۆڤاری هەرێم و چاوی بە هەموومان كەوت و خۆشحاڵی خۆی دەربڕی و ماوەیەكی چەند كاتژمێرێك لەلامان مایەوە و تێر قسەی خۆشی بۆ كردین، ئێمەش داوامان لێكرد كە دیمانەیەكی تێر و تەسەلی لەگەڵدا بكەین بۆ ئەوەی كەمێك باس لە هونەری گۆرانی و ژیانی تاراوگەمان بكات و دوا پرۆژەی هونەری خۆی ئاشكرا بكات، بەڵام ئەو لەو سەردانەیدا داوای بوردنی كرد و گوتی باری تەندروستیم هێندە لەبار نیە و خوا یاری بێ لەسەفەرێكی دیكەدا جارێكی دیكە دێمەوە لاتان و بە تەواوی خۆم بۆ ئەو دیمانەیە ئامادە دەكەم، هاتنی ئەوجارەم تەنیا سەردانی بینین و بەسەركردنەوەی ئازیزانە، چونكە بە هەقیقەت دیار بوو باری تەندروستی زۆر لەبار نەبوو نەخۆشی بە ڕووخساریەوە دیار بوو، ئێمەش لەسەر قسەی ئەو هێندە زۆریمان لێ نەكرد و گوتمان با بە كەیفی ئەو بێ، بەڵام بەداخەوە مەرگ مەودای نەدا ئەو دیمانەیە بەئەنجام بگات، تەنیا فریای ئەوە كەوتین لە بارەگای گۆڤار وێنەیەكی لەگەڵیدا بگرین و نەمانزانی ئەوە دوا دیدار و دیدەنی نێوانمانە، بۆیە لە ڕۆژی سێشەممە 17-8-2004 بۆ دوا جار هەواڵی مەرگیمان بیست كە لە تاراوگە و دوور لە زێدی باب و باپیران و ئازیزانی چاوە گەشەكانی لێك ناوە و كۆچی دوایی كردوە، ماوەتەوە بڵێین هونەرمەندی كۆچكردوو (فوئاد ئەحمەد سلێمان) لە ساڵی 1932 لە گوندی عەوێنەی سەر بە شارەدێی گوێر لە دایك بووە و لە هۆزی نانەكەلییە و باوكی بە (ئەحمەد تەبیب) ناسراوە، چونكە لەسەردەمی خۆیدا یەكێك بووە لە تەبیب و حەكیمە هەرە دیارەكانی شاری هەولێر كە خەڵكی بەمەبەستی چارەسەری دەرد و نەخۆشیەكانیان لە هەموو لایەكەوە ڕوویان تێدەكرد، هونەرمەندی كۆچكردوو (فوئاد ئەحمەد) لە ساڵی 1940 چۆتە بەر خوێند تا خانەی مامۆستایانی لە دهۆك تەواو كردوە و هەر لە ساڵی 1959 تا ساڵی 1970 بەرپرسی جووڵانەوەی هونەری بووە و ساڵی 1955 چۆتە ئیستگەی كوردی بەغدا و یەكەم سرووی بەناوی (نەورۆز) تۆمار كردوە، هەروەها ساڵی 1963 بۆ یەكەم جار بە ڕەش و سپی یەكەم گۆرانی بەناوی (ئەمیرەكەم) تۆمار كردوە، ئەو هونەرمەندە جگە لەو گۆرانیانە چەندین گۆرانی دیكەی بەناوەكانی (گیانی شیرین، من هەڵە بووم، لە سیلەی قەبران، كوانی وەفا، دڵی بێ چارەم، باوانەكەی بابم، زێنەبێ، بە زولف و ڕووخسار، بووكی تازە، دڵەی زامدار، نامەكەت گەیشت) و چەندانی دیكەی تۆماركردوە، ئەوەی كە زۆر بەرچاویشە ئەو هونەرمەندە كۆچكردووە باوكی كامەران و زرنگ و شوانە، كە شوانیان خاوەن دەنگێكی یەكجار خۆشە و لە نێوەندی هونەریدا ڕێچكەی باوكی گرتووە و گۆرانیی تۆماركراویشی هەیە، بەڵێ ژیانی هونەری ئەو هونەرمەندە مەزنە پڕ بووە لە خەبات و داهێنان و زیاتر لەوە هەڵدەگرێ كە لەسەری بنووسین و مافی خۆی پێ بدەین، بۆیە بەو چەند دێرە كۆتایی پێ دەهێنین و لە كۆتایدا دروود و سڵاو بۆ گیانی پاكی دەنێرین و دەڵێین مەحاڵە كەسێكی وەك فواد ئەحمەد دووبارە بێتەوە.
 

 

محەمەد سەعید كوردە - هه‌ولێر

© 2017 Hawler