تشرینی یەکەم 23, 2019

هەناسەكانی ئافرەت لە تابلۆكانی (بەهار شێروانی)دا

مایەی خۆشحاڵی و بەختەوەرییە جار جارە ئافرەتانیش قۆڵ و باسكی مەردانەیان لێ هەڵدەماڵن و جوانترین كاری هونەری پێشكەش بە جەماوەرەكەیان دەكەن، هەر وەك سەرلەبەیانی ڕۆژی دووشەممەی ڕابردوو رێككەوتی 5 ی ئابی 2019 بە چاودێری وەزارەتی ڕۆشنبیری و لاوانی حكومەتی هەرێمی كوردستان،حەوتەمین پێشانگای خاتوو (بەهار شێروانی) بەناونیشانی (هەناسەكانی ئافرەت ) لە گەلەری میدیای شاری هەولێر كرایەوە كە چەندین تابلۆی جوان و ڕازاوە و قەشەنگی لە خۆ گرتبوو، ئەو تابلۆیانەش لە ڕابردوو بە دەست و پەنجەی خودی هونەرمەند بە شێوازێكی تەواو هونەری نەخشابون كە زۆربەیان گوزارشتیان لە ئافرەت و سروشتی كوردستان و ئەو داب و نەریتە باوە دەكرد كە لە نێو ئێمەی كورد دا بوونی هەیە و بە بەرزیوە سەیر دەكرێ وەك گەشتوسەیران و شایی و هەڵپەڕكێ و ئاهەنگ و زۆر شتی دیكەش، لە لایەكی دیكەوەش سیمای ئافرەت بە جۆرەها شێوە نمایش كرابوو كە هەر لە دوورەوە سەرنجی میوانانی ڕادەكێشا و دەیان پرسیاری جۆراو و جۆری لەلای هەمووان دروست دەكرد كە یەكێك لەو پرسیارانەی كە من ئاراستەی بەهار خانی هونەرمەندم كرد ئەوەبوو ئاخۆ (هەناسەكانی ئافرەت) چی دەبەخشێ كە تۆ كردۆتە ناونیشانی پێشانگاكەت؟ دەبێ چ نهێنیەك لە پشت ئەو ناونیشانە خۆی مەڵاس دابێ، ئەویش لەوەڵامدا زۆر بە ڕاشكاویەوە گوتی ئەو ناونیشانەی باست كرد زۆر واتا و مانای قووڵ دەبەخشن و گوزارشت لە زۆر شت دەكەن كە یەكێك لەوانە ئافرەت زۆر شتی لە نێو دڵ و دەروونی دایە و ناتوانی بە ئازادی دەریان ببڕێت و بە سەربەستیەوە گوزارشت لە ناخی خۆیدا بكات بە تایبەتی لە كۆمەڵگای ئێمەدا كە هێشتا ئەو كۆت و زنجیرە بە ڕوونی هەستی پێدەكرێ لە كاتێكدا دەبێ ئافرەت ئازاد بێ لەوەی چۆن ڕای خۆی دەرببڕێت و چۆن بڕیار دەدات، ماوەتەوە بڵێین بەهار شێروانی دەرچووی ئەكادیمیای هونەرە جوانەكانەوە و هەر لە ساڵی 2000 وە خەریكی هونەری شێوەكارییە و پێشتریش شەش پێشانگای شێوەكاری دیكەی كردۆتەوە و بەپەڕی ئەشق و سەلیقەوە تێكەڵ بە هونەرەكەی بوە و هەرگیز لێی جیا نابێتەوە.

 

محەمەد سەعید كوردە - هه‌ولێر

© 2017 Hawler