ئاب 26, 2019

"زام"ـەكەی (شێركۆ بێكەس) لە جەژنی قوربان بڵاو دەكاتەوە!

 دیاری قەرەداغی گۆرانییەك دووبارە تۆمار و كلیپ دەكاتەوە،كە بەر لە (24) ساڵ تۆماری كردووە، ئەو گۆرانییە تێكستی شاعیری كۆچكردوو (شێركۆ بێكەس)ـە، ئاوازی هونەرمەندی میوزیكژەنی بە ئەزموون (سڵاح رەئوف)ـە،  میوزیكی بەرهەمەكە هونەرمەندی میوزیكژەن (بڵند قەرەداغی) ئامادەی كردووە، ئەركی كلیپی ئەو گۆرانییە لەلایەن كۆمپانیای (مەستی فیلم)ـەوە كراوە، لە لێدوانێكدا بۆ خوێنەرانی "هەولێر" (دیاری) ئاماژەی بۆ بەرهەمهێنانی ئەو كلیپەو چەند بەرهەمێكی تازەی خۆی بەم شێوەیە خستەڕوو.
لە دەستپێكی قسەكاندا هونەرمەند (دیاری قەرەداغی) لەبارەی هۆكاری دووبارە تۆمار كردنەوەی ئەو بەرهەمە بەم شێوەیە گوتی : "ئەو گۆرانییە ساڵی (1995) تۆمارم كردووە، بوو بەرهەمێكی جەماوەری و خاوەنی گوێگرێكی زۆر باش و فراون بوو لەو سەردەمەدا، دیارە لە رووی كوالێتی تۆمار كردنی دەنگ و ڕەنگەوە ئەوكات زۆر باش نەبوو!، بۆیە بە راوێژكردنم لەگەڵ كۆمەڵێك هاوڕێم و دەستەیەك لە هونەرمەندانی ئازیز، لەسەر ئەو ڕایە كۆك و هاوڕا بووین، جارێكی دیكەی ئەو بەرهەمە تۆمار بكەمەوە، ئەوە بوو لەلایەن بڵند قەرەداغی خۆشەویست كاری ئامادە كردنی میوزیك و تۆماركردنی بەرهەمەكەی لەرووی دەنگەوە خستە سەر ئەستۆی خۆی، كە ئەوەیان بۆ من پاڵپشتیەكی بەهێز بوو بۆ ئەوەی بەرهەمە جارێكی دیكە بخەمەوە بەر گوێچكەی هونەردۆستان!".
هونەرمەند (دیاری) لەبەشێكی دیكەی قسەكانیدا لەبارەی ئەو بەرهەمەی ئەوەشی خستەروو : "ئەو بەرهەمە لە ژێر ناوی (زام)ـە، ئاوازی هونەرمەندی بە ئەزموونی میوزیكژەن (سەڵاح رەئوف)، تێكستی شاعیری ناوداری كوردستان (شێركۆ بێكەس)ـە، لەم رۆژانە كاری كلیپی بەرهەمەكەمان خستە بواری جێ بەجێكردنەوە، كە لەلایەن دەرهێنەر (ئەمیر غوڵامی) كاری بۆ كراوە، دیارە لەسەر ئەركی كۆمپانیای (مەستی فیلم) ئەو كلیپە چووەتە بواری جێبەجێكردنەوە سوپاس ئەرك و پاڵپشتیان دەكەم".
هونەرمەند (دیاری قەرەداغی) لەبارەی ناوەرۆكی ئەو بەرهەمە، كە بۆ بارودۆخی ئەو سەردەمە گوتراوە ئایا لەگەڵ بارودۆخی ئێستا دەگونجێ ؟ لە وەڵامدا روونی كردەوەو گوتی : "ئەو بەرهەمە ناسنامەیەكی هەڵگرتووە بۆ هەموو سەردەمێك و بارودۆخێك دەگونجێ، چونكە ئەو تێكستە زۆر جوانەو ناوەرۆكێكی پڕ واتاو گشتكیر لەخۆی دەگرێت، سەردەمەكە نەگۆڕاوە ڕاستە ئەو سەردەمەی ئەو گۆرانییەی تێدا تۆمار كراوە سەردەمێك بوو، (برسیەتی، هەژاری،نەهامەتی و شەڕ) هەموو ئەوانە گەمارۆی دابووین، ئێستاش هەموو ئەو چەمكانە بەشی خۆیان هەن لەم دەڤەرەی ئێمەدا، بۆیە پێم وایە ئەو گۆرانییە ناسنامەی نەمری هەڵگرتووەو بۆ هەموو سەردەمێك بۆن و بەرامی خۆی دەبێت و، دوای ئەوەندە ساڵە هەر دڵێی بۆ ئێستاو ئەو سەردەمە گوتراوە!".
 هونەرمەند (دیاری) كە ماوەی (8) ساڵە ئەلبوومی تازەی گۆرانیی بڵاو نەكردۆتەوە، ئایا لەبەرنامەی دانیە ئەلبوومێكی گۆرانی بڵاو بكاتەوە؟ لەمباریەوەش گوتی : "من ڕاستە لە ساڵی (2011) بوو كاتێك ئەلبوومی گۆرانی (رێی باران)ـم بڵاو كردەوەو تا ئێستاكە ئەلبوومی دیكەی گۆرانیم بڵاو نەكردۆتەوە، بەڵام لەو كاتەوە تا ئێستاكە بە قەد ژمارەی گۆرانی ئەلبوومێك بەرهەمی گۆرانییم بڵاوكردۆتەوە، چونكە سەردەمی ئێستاكە وای لێهاتووە، گۆرانی دەبێ بكرێت بە كلیپ ئینجا بە چاكی بڵاو دەبێتەوەو دەچێتە ناو خەڵك و گوێگر، بۆیە من پێم وایە لە ئێستادا بڵاوكردنەوەی ئەلبووم بە شێوەی "سینگل" یا تاك بڵاو بكەیتەوە".

 

عەبدولغەفار عەبدوڵڵا - هه‌ولێر

© 2017 Hawler