تەمموز 18, 2019

بەسەرهاتی كچی كافرۆش لە كتێبێكدا چاپ كرا

ئەگەرچی زۆر لە قەڵەم بەدەستان و نووسەران بە چڕ و پڕی لەسەر (كچی كافرۆش) یان نووسیوە و ڕووداوی ژیانیان بە شێوەیەكی گشتی باسكردوە و پەنجەیان خستۆتە سەر هەموو ئەو ڕێ و شوێنانەی كە پەیوەندیان بەو باسەوە هەیە، بەڵام لەو ڕۆژانەشدا چاپی یەكەمی كتێبی (كچی كافرۆش) بە 114 لاپەڕە و بە تیراژی 500 دانە و بە قەبارەیەكی مام ناوەندی چاپ كرا و كەوتە بەردیدی خوێنەرانەوە، ئەو كتێبە لەلایەن (هێدی سەلیم حوسێن) ساغكراوەتەوە و لێكۆڵینەوەی وردی بۆ كراوە و مومتاز حەیدەری پێشەكیەكی جوانی لەژێر ناونیشانی ( كچی كافرۆش تراژیدیایەكی تاك لایەنە) بۆ نوسیووە و تیایدا هێما بۆ ئەوە دەكات و دەنووسێ ئەو نامیلكەیەی بەردەستت چیرۆكێكی هەمەلایەنی سیاسی، داگیركاری نیشتمان، كۆمەڵایەتی و ڕووداوێكی ڕۆمانسی تاك لایەنی دەگرێتەوە كە دەڵێین تاك لایەنە واتە بە پێچەوانەی ویستی كچەكە بوە، وەك نموونەی مەم و زین، كەریم و پەری، لاس و خەزاڵ و هی دیكە نییە كە ئەوپەڕی پیرۆزی عیشق لێیان دەبارێ كە مێژووەكەی بۆ سەرەتای سەدەی بیست دەگەڕێتەوە و ...تد، دواتر هەردی لە پەرەگرافێكدا نووسیویەتی ئێستاش مشتومڕ لەسەر بەسەرهاتی كچی كافرۆش بەردەوامە و درێژەی هەیە كە ئەو كچە كێیە و ئەو بەسەرهاتە خەیاڵیە یان ڕاستەقینە؟ قسەو باسەكان دەربارەی كچی كافرۆش چین؟ یان ئەو بەسەرهاتە چ پەیوەندییەكی بەنەتەوەی عەرەب و توركمان هەیە، چونكە ئەو بەسەرهاتە بە تێپەڕبوونی كات بەگەلێك شێوە قسە و باسی لێوە كراوە و گێڕدراوەتەوە، بەڵێ ساغ كەرەوەی ئەو كتێبە لەدووتۆی كتێبەكەیدا باسی لە زۆر شت كردوە وەك هۆكاری ناونانی خەدیجە بە كچی كافرۆش، پەیوەندی كچی كافرۆش بە هۆزی كافرۆش و ئەوانەی ناوچەی چەمچەماڵ و بازیان، باسی ڕفاندنی كچی كافرۆش، ئاكار و خەسڵەتەكانی كچی كافرۆش، بەسەرهاتی بنت المعیدی، بەسەرهاتی سامانچی قیزی، فیلمی سینەمایی كچی كافرۆش و زۆر لایەنی دیكە، لە دوا بەشی كتێبەكەشدا كۆمەڵێك وێنەی كچی كافرۆش و هەموو ئەو شوێنانە خراوەتە ڕوو كە ئەو و ماڵپاتەكەی تێیدا ژیاون، ئەوانە و زۆر لایەنی دیكە لە نێو كتێبەكەدا بەرچاو دەكەون، بۆیە دەستخۆشی لەو هەوڵە دەكەین و بەو ئومێدەی بەرهەمی دیكەی بەدوادا بێت، چونكە دەگوترێ ئێستاش مشتومڕ لەسەر بەسەرهاتی كچی كافرۆش بەردەوامە و درێژەی هەیە و هەر كەسە و بە جۆرێك قسە و باسی لەبارەوە دەكات و كتێبی لەسەر چاپ دەكات و نووسین و وتاری لەبارەوە دەنووسێت.

 

محەمەد سەعید كوردە - هه‌ولێر

© 2017 Hawler