ئاب 22, 2019

ئەو هونەرمەندەی چوار ساڵ لەوەپێش، ماڵئاوایی كرد

بەر لە چوار ساڵ و لە ڕۆژی 4 ی حوزەیرانی ساڵی 2015 ساتەوەختێكی تەواو ناخۆش و پڕ لە ئازار بوو لە مێژووی شاری هەولێر و بزووتنەوەی شانۆی كوردیدا، چونكە لەو ئان و ساتەدا دڵە گەورەكەی هونەرمەندی خۆشەویست و داهێنەر (مەحموود ئەحمەد حەمەد) ی ناسراو بە (مەحموود بێوەیی) لە لێدان كەوت و لە چركە ساتێكی
زۆر خێرادا هەموومانی بەجێ هێشت ئەویش دوای ململانێیەكی زۆر لەگەڵ ئەو نەخۆشیە سەختەی كە ماوەیەك بوو بەرۆكی گرتبوو هەمیشە بەدەستیەوە دەیناڵاند، هونەرمەندی
كۆچكردوو لە سێ لایەنی بەرچاو بەهرەی گەش و پرشنگداری هەبوو وەك نواندن و نووسین و هونەری شێوەكاریدا، بەڵام پتر لە بواری شانۆ و نواندندا دیار بوو خەڵكەكە لە نزیكەوە دەیانناسی و خۆشیان دەویست و باوەشی پڕ سۆز و میهرەبانین بۆ دەكردەوە و بە تاسەوەش بە دیار بەرهەمە جوانەكانیەوە دادەنیشتن و چێژیان لە ڕۆڵەكانی وەردەگرت، بە تایبەتیش لە تەمسیلیەكانی هەبوو نەبوو و لاس و خەزاڵ و ئاسكە و كەوەكانی قەرەچووغ و سوورمەخان و دەیان و سەدان كاری دیكە جێ پەنجەی دیار بوو، ئەوەی زۆر جێی سەرنج بوو لە تەمسیلی هەبوو نەبوو توانیی ڕۆڵی كاراكتەری پینەدۆز زۆر بە سەركەوتوویی ببینێ و شان بە شانی هەر یەك لە هونەرمەندانی وەك سەعدون یونس و عەلی ئەحمەد و جەلال بەیاری كۆچكردوو و سیروان عوسمان و نەهرۆ سەلیم و چەندین ئەكتەری دیكەی ئەو بەرهەمە ڕۆڵێكی دیار و بەرچاو مامەڵ بكات و سەرنجی هەموو لایەك بۆ لای خۆی ڕابكێشێت، ئەوا لە هونەری شێوەكاری و تابلۆ كێشانیشدا هونەرمەندێكی بێ هاوتا بوو، چونكە هەموو تابلۆكانی ئەوپەڕی داهێنانیان پێوە دیار بوو، ئەو تا لە ژیاندا بوو دەیویست لە چەندین ڕێگاوە بچێتە پێشەوە و خزمەت بكات و ئەرشیفێكی دەوڵەمەند لە دوای خۆی جێ بهێڵێ كە نەوەی دوای خۆی سوودی لێ ببینێ، بەڵام داخەكەم دوای ئەو هەموو خزمەتە بەرچاوە ئەویش وەك زۆربەی هونەرمەند و داهێنەرانی دیكە بەبێ نازی و بەدەم ئازاری نەخۆشیەكی سەختەوە كۆچی دوایی كرد و سەری نایەوە، بەو كۆچەش بۆشاییەكی گەورە كەوتە نێو هونەری كوردیەوە و هەر سێ لایەنی نووسین و نواندن و شێوەكاری بێ ناز مانەوە.

 

محەمەد سەعید كوردە-هه‌‌ولێر

© 2017 Hawler