حوزەیران 17, 2019

حەمید عوسمان: ئەو سیدیە تازەیەم لە (16) گۆرانی پێك هاتووە، بەشێكیان پێشتر بڵاوم كردۆتەوە!

هونەرمەندی گۆرانیبێژ (حەمید عوسمان) یەكێكە لەو گەنجە دەنگخۆشانەی، كە بەشێوەیەكی خێرا لە رێگەی چەند تراكێكی گۆرانی و ڤیدیۆ كلیپێك لەنێو كۆڕی گۆرانیی كوردیدا خۆی ناساند، ئەو گۆرانیبێژە لاوە لەسەر تاوە ئەگەرچی لەژێر كاریگەریی چەند هونەرمەندێكی كورد هاتە نێو گۆرانیگوتنەوە، بەڵام هەر زوو رێچكەیەكی بۆ خۆی دیاری كرد بۆ ئەوەی كاری هونەریی تێدا بكات، لەمیانەی دیدارێكدا بۆ خوێنەرانی "هەولێر" تیشك دەخاتە سەر چەند لایەنێك لە كارە هونەرییە تازەكان بەتایبەتی بەرهەمهێنانی ئەلبوومێكی تازەی گۆرانی، لەگەڵ گوتنی (2) گۆرانیی تازە بەشێوەی دوێت لەگەڵ دوو هونەرمەندی ناوداری كورد تۆمار كردووە.

لە دەستپێكی قسەكانیدا هونەرمەند (حەمید عوسمان) لەبارەی ئامادەبوونی ئەلبوومێكی تازەی گۆرانی خۆی بەم شێوەیە گوتی : "ئەو سیدیە تازەیەم دەتوانم بڵێم بەرهەمی چوار بۆ پێنج ساڵی منە، دەمێكە خەریكی كۆكردنەوەی ئەو كۆمەڵە گۆرانییەم، بەتایبەتی شێواز و ستایلەكان و تێكستی گۆرانییەكان هەوڵی زۆرم دا، بۆ ئەوەی كارێكی جوانی لێ بهێنمە بوون، بەشێوەیەكی گشتی توانیم ئەلبوومێكی هەمجۆر لەگۆرانی میلۆدی سەرنجڕاكێش تازە بهێنمە بەرهەم".
هەروەها لەبارەی ناوەرۆكی ئەو سیدیە تازەیەی ئەوەشی گوت : "ئەو سیدیە تازەیەم لە (16) گۆرانی پێك هاتووە، ناوم لێناوە (ئاوێنە) چونكە گۆرانی ئاوێنە دەستپێكی باش بوو بۆ ناساندنی من لەكاتی دەستپێكی كاری هونەریمدا، هەروەها چەند گۆرانییەكم بەشێوەی "دوێت" لەگەڵ چەند هونەرمەندێكی ئازیز تۆمار كردووە، بەشێوەیەكی گشتی ئەلبوومەكەم هەوڵێكی زۆرمداوە لە ئایندەیەكی زوو بڵاوی بكەمەوە، بەتایبەتی پلانی ئەوەم هەیە تا ناوەڕاستی ئەم ساڵ ئەو ئەلبوومە بڵاو بكەمەوە، چونكە ئەو بەرهەمە یەكەم ئەلبوومی گۆرانی منە و ئومێدی ئەوەم هەیە، بەشێوەیەكی باش بگاتە دەستی هونەردۆستان و گوێگران".
(حەمید عوسمان)ـی گۆرانیبێژ ئەوەشی نەشاردەوە، كە بیرۆكەی دیكەی لەبەردەستە گۆرانی دیكە بەشێوەی دوێت تۆمار بكات و لەمبارەیەوەش دەڵێت: "جگە لەو چەند گۆرانییەی بەشێوەی دوێت تۆمارم كردوون، بەتایبەی (2) گۆرانی لەگەڵ هونەرمەند (پەیوەند جاف) و گۆرانیەكیش لەگەڵ خاتوونی هونەرمەند (چنار)، لە داهاتووشدا پلانی ئەوەم هەیە لەگەڵ هەریەك لەهونەرمەندان (ناسری رەزازی و كەمال محەمەد) بەنیازم دوو گۆرانی بەشێوەی دوێت تۆمار و كلیپ بكەین، چونكە من پێم وایە گۆرانی دووانە یا دوێت تاموچێژی تایبەتی خۆی هەیە لای گوێگران و هەروها بۆ نزیك بوونەوەش لە هونەرمەندان و ستایلەكانیش كارێكی پێویستە!".
(حەمید) لە بەشێكی دیكەی قسەكانیدا ئەوەشی باس كرد : "جگە لەو كارو بەرهەمانەی باسم كردن، بەنیازم كۆنسێرتێكی جەماوەری ساز بكەم، بۆ ئەو مەبەستەش بەنیازم دوای بڵاوكردنەوەی سیدیە تازەكەم ئەو كارە بخەمە بواری جێ بەجێكردنەوە، بەڵام ئەنجامدانی كۆنسێرتەكەم بەشێوەیەك دەمەوێت بە ئەنجامی بگەینم، لە هەردوو شارەكانی هەولێر و سلێمانی كۆنسێرتەكان ساز بكەم".
هونەرمەند (حەمید عوسمان) لەبارەی ناوەرۆكی بەرهەمەكانی دیكەی هەروەها رایگەیاند : "یەكێك لەكارەكانی دیكەم بریتیە، لە تۆمار كردنی چەند گۆرانییەك بەشێوەی گەشت، كە من وەك گوڵچنین ناوم لێناوە، دیارە لە گۆڵچنینی یەكەم سەركەوتنێكی باشم بەدەست هێنا، ئێستاش گوڵچنینی دووەم كارم لەسەر چەند گۆرانییەكی شاری هەولێر و دەوروبەری كردووە، دەمەوێ ئەمجارەیان گوڵچنینەكەم بۆن و بەرامی ئەو دەڤەرە جوانەی لێبێت، هەروەها گۆرانیەكیشم بە شانازیەوە لە هونەرمەندی گەورە (زیاد ئەسعەد) وەرگرتووە، كارم لەسەر ئەو گۆرانییەش بەشێوەیەكی باش كردووە".

 

عەبدولغەفار عەبدوڵڵا - هه‌ولێر

© 2017 Hawler