ئاب 23, 2019

ئەلبوومێكی تازەم ئامادەیە بەڵام گۆرانیی باوكمی تێدا نیە!

هونەرمەندی بە ئەزموونی گۆرانیبێژ (خوسرەوی ماملێ) ناوێكی دیاری نێو كۆڕی گۆرانی كوردییە، ئەگەرچی ئەو لە بڵاوكردنەوەی ئەلبووم یا ڤیدیۆ كلیپی گۆرانی زۆر ئەكتیڤ نیە، بەڵام لە بەشداریی لە بۆنە نیشتمانییەكاندا كەسێكی كارایە لەگوتنی چەندیین گۆرانی دا، لە میانەی پەیوەندییەكی تەلەفۆنی دا بۆ خوێنەرانی "هەولێر" ئاماژەی بە دوایین كاری هونەریی خۆی كرد، كە بریتیە لە هەبوونی ئەلبوومێكی گۆرانی، هەروەها ئەوەشی خستەروو بەنیازە لە ئایندەیەكی نزیكدا بگەڕێتەوە بۆ كوردستان.

لە دەستپێكی قسەكانی دا هونەرمەند (خوسرەوی ماملێ) لەبارەی هۆكاری بێدەنگی لە هەبوونی بەرهەمی تازەی گۆرانی رایگەیاند : "بەرهەمم زۆرن بەڵام دیارە بۆ بڵاو بوونەوەی زەمینە سازییەكی باشی پێویستە، چونكە بەداخەوە تا ئێستاكەش هونەرمەندی كورد لەسەر ئەرك و گیرفانی خۆی كارە هونەرییەكانی دەهێنێتە بوون، ئینجا ئەگەر ژیانی هونەرمەند لە هەندەران بێت، ئاوا دووجار زەحمەتی دەوێت، بەڵام لەگەڵ هەموو ئەوانەشدا من لە بۆنە نیشتمانیەكان و نەتەوەییەكاندا یا بۆ هەر كۆڕێك و كۆبوونەوەیەك، كە بۆ بەرگری بێت لە خاكی كوردستان من بەشداریی كارام هەبووەو، گۆرانیشم گوتووە، واتە ئەگەر بەشێوەی ئەلبووم یا ڤیدیۆ كلیپ نەبووبێت بەڵام دەنگم هەر هەبووە!".
لەبارەی هەبوونی بەرهەمی تازەی گۆرانی (ماملێ) ئەوەی ئاشكرا كرد : "ئەلبوومێكی تازەی گۆرانییم ئامادەیە، كە خۆی لە (8) گۆرانی تازە دەبنێتەوە، ئەو بەرهەمانە هەمووی گۆرانیی تازەن، بەنیازم لە ئایندەیەكی نزیكدا بڵاوی بكەمەوە، بەشێوازێكی تازەو سەردەمیانە كاری میوزیك و تۆماركردنی بۆ كراوە، پێم وایە كاری زۆر باشن و، ئومێدم وایە لای گوێگرانیش هەر وابێت"
لەبارەی ئەوەی ئایا گۆرانی هونەرمەندی مەزن (محەمەدی ماملێ) لەنێو ئەو ئەلبوومەدا بوونی هەیە؟ لەوەڵامدا (خەسرەو) گوتی : "نەخێر بەرهەمی باوكی ئازیزم (ماملێ) تێدا نیە، سڵاو لە رۆح و گلكۆی جوانی، ئەگەرچی ئێمە هەموومان پەروەردەی قوتابخانەی ئەوین، هەموومان لەكانیاوەكەی (ماملێ)ـمان خواردۆتەوەو فێری گۆرانیگوتن بووین، بەڵام ئەو سیدیەم سەرجەمیان گۆرانی تازەن لە رووی تێكست و ئاوازەوە بەرهەمی تازەن، سیدیەكەم بەناوی (ئاواتی بەرز)ـە، كە یەكێكە لە هۆنراوە نایبەكانی مامۆستا (هێمن)، بۆیە پێم خۆشبوو، ئەو بەرهەمە لەژێر ئەو ناوە بێتە بەردەستی گوێگران".
لەبارەی سەردانی كردنی بۆ باشووری كوردستان، كە ئێستاكە ئەو هونەرمەندە لەوڵاتی نەوریج ژیان بەسەردەبات، گوتی : "لە ئایندەیەكی نزیكدا بەنیازم سەردانێكی كوردستان بكەمەوە، بۆ ئەو مەبەستەش پلانی باشم هەیە، بەتایبەتی بۆ چۆنیەتی بڵاوكردنەوەی ئەو سیدیە تازەیەم پێم باشە بگەڕێمەوە بۆ كوردستان ئەو كارە بخەمە بواری جێبەجێكردنەوە، هەروەها ئەنجامدانی چەند كارێكی دیكەی هونەری دیكەش".

 

عەبدولغەفار عەبدوڵڵا - هه‌ولێر

© 2017 Hawler