ئاب 19, 2019

پەرواس:ئەنگوستیلە و گوارەی بووكێنیم فرۆشت بۆ بەشداریكردن لە عەرەب ئایدڵ

خانمە هونەرمەند"پەرواس حوسێن" لە دیمانەیەكی تایبەتی ڕۆژنامەی "هەولێر"ـدا وەڵامی 13 پرسیار دەداتەوە و، مژدەی ئەلبوومێك گۆرانیش دەداتە هەوادارنی، هاوكات باس لە ژیانی خۆی دەكات، پێش چوونی بۆ پڕۆگرامی "عەرەب ئایدڵ" و ئاخ بۆ بوون بۆ دەوڵەتی كوردیش هەڵدەكێشێت.

*سەرەتا پێمان بڵێ بەدەر لە گۆرانی و میوزیك خولیای چ شتێكی دیكەت هەیە؟
- تا ئێستا گۆرانی و میوزیك تاكە خواست و ئارەزووی منە.
*تا چەندی بڕوات بە تێگەیشتنی ئافرەت هەیە، بۆ چارەسەركردنی كیشە و گرفتەكان؟
- ئافرەت ئەقڵ و تێگەشتنێكی باشی هەیە و هاوشانی پیاو توانای چارەسەركردنی دۆخە ئاڵۆزەكانی ژیانی هەیە.
*لە قسەكردن و لەبەردەم كامێرا زۆر نەرم و نیانی، بەڵام كەسانێك دەڵێن:" لەماڵەوە وێنەیەكی دیكەت هەیە، ئەوە تا چەند ڕاستە؟
- ڕوخسارم ئاوێنەی دڵمە، ئەو كاسانەی كە لێشمەوە نزیكن دەزانن كە ئەو وێنەیەی لەبەردەم كامێراكان هەمە لە ماڵەوەش هەمان شتە، بۆیە نیشاندانی دوو دەموچاو دوورە لە لە كەسایەتیی من.
*زۆر حەز دەكەم بزانم ئایا "پەرواس حوسێن" حەزی لە دنیایی ڕۆمانسیەتە؟ ئەگەر حەزت لێیە ئەو ڕۆمانسیەتە چۆن بۆ هاوسەرەكەت دروست دەكەیت؟
- ئەوەندە زۆر ئاشقی هاوسەرەكەمم هەمیشە لە ناو دونیایەكی جوان و خۆشبەختیدا لەگەڵیدا دەژیم.
* ئەگەر یەك خولەكت مابوو بۆ ئەوەی ژیان جێبهێڵی، لەو كاتەدا حەز دەكەی كێ ببینیت و دەستت لەناو دەستی كێدا بێ؟
- دەمەوێت هەموو ئەو كەسانە ببینم كە خۆشم دەوێن و خۆشیان دەوێم.
* چیرۆكێكی تایبەت هەیە كە ژیانی تۆی تەواو گۆڕیبێت؟
- ڕۆشتنم بۆ عەرەب ئایدڵ گۆڕانكاریی لە ژیانی مندا دروست كرد و لەم ڕێگەیەوەش متمانە و خۆشەویستیی خەڵكم بە دەست هێنا.
* هەموو مرۆڤێك لە ژیاندا بۆشاییەكی هەیە، یاخود شتێك لە دڵیدا هەیەو نەیتوانیوە پێی بگات، تۆ هیچ شتێك هەیە كە ئاخی بۆ هەڵكێشیت و تا ئێستا نەتكردبێت؟
- ئاخ بۆ بوون بە دەوڵەت هەڵدەكێشم وەك تاكێكی كورد.
* بە هیچ شتێكی خۆت سەرسامیت؟
- بە سادەیی و بووێریەكەم شانازی دەكەم.
* بەڕاشكاوانە وەڵامم بدەرەوە پارە شتێكی خۆشە؟
- من پارە بە دوایین شت دەبینم، كاتێك كە ڕۆشتم بۆ "عەرەب ئایدڵ" هیچ پارەیەكم نەبوو، تەنها خاوەنی ئەنگوستیلەو گوارەیەكی كاتی بووكێنیم بووم، ئەویش فرۆشتم بۆ خەرجی سەفەرەكەم و نیشاندانی بەهرەكەم وەك ئافرەتێكی كوردی بەهرەمەند، بە كورتی خۆشبەختی لەسەروی هەموو شتێكە.
* سەیری ئەو فیلم و دراما توركیانە دەكەیت كە ئێستا لە هەندێ كەناڵە كوردیەكان بە دۆبڵاژی كوردی پەخش دەكرێ؟
- نەخێر سەیری هیچ درامایەكی بیانی ناكەم.
* بەو پێیەی لەدایكبووی شاری "قەڵادزێ"ـی بیرت لە چڕینی گۆرانیەك نەكردەەتەوە كە تایبەتی بكەی بەو شارە؟
- ماوەیەك بەر لە ئێستا لەگەڵ ڕێكخراوێك دەستمان كرد بە بۆیە كردنی قوتابخانەیەكی دوورەدەست لەو دەڤەرە و هەروەها پێداویستیی خوێندمان بۆ دابین كردن، وەك گۆرانیش بیرۆكەم هەیە بەڵام تا ئێستا ڕێك نەكەوتووە، هەركاتێكیش دەرفەت بێتە پێشەوە حەز دەكەم بەبێ جیاوازی بۆ هەموو شارەكانی كوردستان كار بكەم.
* كەسانێك بە ئوم كەلسوم"ـی كوردت دەچوێنن، بۆ ئەوە چی دەڵێی؟
- مایەی دڵخۆشیە كەسانێك كە بەم شێوەیە دەمبینن، بەڵام لە لە ڕوانینی منەوە من تەنها هونەرمەندێكم و خزمەت بە هونەری كوردی و وڵاتەكەم دەكەم..
* دوا پڕۆژەی هونەریت چییە؟
- دروستكردنی ئەلبوومێك گۆرانیی جۆراوجۆر.

 

كارۆخ مەلا ئەسعەد-هه‌ولێر

© 2017 Hawler