ئایار 24, 2019

داستان و هونەر و رەسەنایەتی لە هەگبەی مەجید خۆشناودا

 یەکێك لەو لایەنە گەش و دیارانەی کە گەلی ئێمەی بە تایبەتمەندیی خۆیەوە هێشتۆتەوە، لایەنی کولتوور و فۆلکلۆر و هونەرە، بەتایبەت هونەری موزیک و گۆرانی، چونکە لە سەردەمی زووەوە کە گەلەکەمان بە جۆرەها شێواز، لە لایەن چەندین نەتەوەی سەردەست و رژێمی داگیرکار و ستەمکار، تووشی ماڵوێرانی و کوشتوبڕ هاتووە، ویستوویانە زمان و کولتوور و هونەرەکەیشمان لێ بدزن و کوێری بکەنەوە، بەڵام باب و باپیرانمان، هەموو ئەو مەرگەسات و ستەمکارانەیان پاراستووە و لە شێوەی داستان و بە شێوازی زارەکی لەو نەوە بۆ ئەم نەوە گێڕاویانەتەوە، بەمەش مێژوو و زمان و تایبەتمەندییەکانمان بە کۆڵ هەڵگیراون و لەم بن بەرد بۆ ئەو بن شاخ و ئەشکەوت لە چاوی دوژمنانەوە دوور حەشار دراون، تا گەیشتە ئەو رۆژگارەی زۆر لە دوژمنەکانمان سەریان تێدا چوو، بەڵام گەلەکەمان، بە کەلەپوور و کولتوور و هونەر و زمان و تایبەتمەندییەکانی خۆیەوە هەر ما و پێشیش کەوت و گەیشتە ئەم رۆژگارە، کەوا تروسکایی ئازادیمان لێ دیارە.
زۆر کەس، زۆر وەستکار و خەمخۆر، لەم مەیدانەدا، وەک سەربازی ون و خۆبەخش، بۆ زیندووهێشتنەوەی ئەم لایەنە گرنگەی ژیانی کوردەواری شەونخوونییان کردووە و هەموو ئەو داستان و کارە ناوازانەی سەردەمانی تاریکیان بۆ ئێمە هێناوەتە بەر رووناکی، زۆر کەسی خەمخۆر لەو بوارەدا گەڕاون و تێکۆشاون، تا ئەو رووداوانە، ئەو داستان و ئەو هونەرمەندە میللی و ئەو هونەرمەندە رەسەنانەی لەو رێگەیەوە خزمەتیان کردووە، لە کتێب و ئەرشیفدا کۆ بکەنەوە و بیانکەن بە سەرچاوە و سەرمەشق بۆ نەوەکانی ئەمڕۆ. یەکێ لەو خامە رەنگین و لەخۆبردووانەی، کە لەم بوارەدا شەونخوونی و کاری گەورەی بۆ ساغکردنەوە و زیندووکردنەوە و ئەرشیفکردنی ئەو داستان و رووداو و هونەر و هونەرمەندانە کردووە، مامۆستا و هونەرمەندی خەمخۆر و دڵسۆز (مەجید خۆشناو)ە، کە سەربردە و رووداو و داستانە مێژووییەکانی گەلەکەمانی، کە لە رێی لاوک و مەقام و حەیران و گۆرانیدا دەماو دەم هاتوون، یان لە لایەن هونەرمەندانی رەسەنەوە تۆمار کراون، کۆی کردوونەتەوە و لەم ساڵەدا لە دوو کتێبی ناوازە بە ناوی (سەربردە و رووداوی مێژوویی لە لاوکەکانی کاوێس ئاغادا) و (پەلکە زێڕینە - هەڵچنین و گوڵبژێرێک لە ئاواز و گۆرانی رەسەن و ژیانی هونەرمەندان) بە چاپی گەیاندوون. مامۆستا مەجید، سەرەڕای ئەوەی ساڵانێکە لە هەردوو بواری هونەر و پەروەردەدا خزمەت دەکا و شوێندەستی دیارە، بەم دوو بەرهەمە چاپکراوەیشی، خزمەتێکی گەورەی بە لایەنی هونەری و کولتووری گەلەکەمان و هەمیش بە لایەنی گەشەپێدانی رۆشنبیری دەکات، بۆیە لە دڵەوە، دەستخۆشی لێ دەکەم و ئەم ماندووبوون و شەونخوونییەی زۆر بەرز لێ دەڕوانم و هیوای ئەوەی بۆ دەخوازم، لە دەرخستن و زیندووکردنەوەی ئەو سەربردە و رووداوە مێژووییانە بەردەوام بێ و هەموو ئەو داستانانەش زیندوو بکاتەوە، کە خەریکە بەهۆی خەمساردی و فەرامۆشکردنی کەسان و لایەنی پەیوەنددار بەم کارە و لەولاشەوە بەهۆی تەوژمی ئەو تەکنەلۆجیا و جیهانگیرییە، ئەو لایەنە رەسەنەمان تۆزی لەسەر دەنیشێ. دەستوچاوت ساغ و خۆش بن مامۆستا مەجید خۆشناو بۆ ئەم بەرهەمە دانسقانە و هیوای بەختەوەری و ئاسوودەییت بۆ دەخوام.

 

فەرهەنگ غەفوور

© 2017 Hawler