ئایار 24, 2019

ئەمڕۆ، چوارەمین فێستیڤاڵی نێودەوڵەتیی هەولێر بۆ شانۆ مۆنۆدراما دەست پێدەكات

سەعات (10:30) خولەكی سەر لە بەیانی ئەمڕۆ یەكشەممە 21/4/2019، لە هۆڵی (ڕۆشنبیری)، ڕێوڕەسمی كردنەوەی چوارەمین فێستیڤاڵی نێودەوڵەتیی هەولێر بۆ شانۆی مۆنۆدراما بەڕێوەدەچێت.

فێستیڤاڵەكە، لە لایەن بەڕێوەبەرایەتیی هونەری شانۆی هەولێر و بە هاوكاریی لقی هەولێری سەندیكای هونەرمەندانی كوردستان ساز دەكرێت.
شایەنی ئاماژەپێدانە: تیپە بـەشداربووەكان پێك هاتوون لە: (میسر، لوبنان، مەغریب، ورمێ، بەغداد، بابل، مەهاباد، سلێمانی، دهۆك، هەولێر).
ئەوەی ماوەتەوە بڵێین: لە فێستیڤاڵەكەدا ڕۆژانە دوو نمایش لە دوو كاتی جیاوازدا بەڕێوە دەچێت، بەیانیان كاتژمێر 11ی پێش نیوەڕۆ، ئێواران كاتژمێر 7ی شەو، سەرجەم نمایشەكانیش لە هۆڵی بەڕێوەبەرایەتیی هونەری شانۆی هەولێر دەبێت و دوای هەر نمایشێك گفتوگۆی ڕەخنەیی بە ئامادەبوونی ستافی نمایشی مۆنۆدراماكان بەڕێوە دەچێت .
كاتژمێر 11 ی هەمان ڕۆژیش، یەكەمین نمایشی فێستیڤاڵەكە بە شانۆی (لە چەشنی ئاو دەڕژێم)ـە، كە لە نووسین و دەرهێنانی (مەهدی حەسەن)، لە نواندنی (چاوان خەلیل) دەست پێدەكات.
لە بارەی ناوەڕۆكی شانۆگەرییەكەوە (مەهدی حەسەن)ـی دەرهێنەر بۆ (هەولێر) دەڵێت: دەقەكە قسەكردنە لەسەر دروستبوونی ئافرەت لەو كاتەی كە لە بەهەشت دەردەكرێت، لەسەر زەوی چاوی بە پیاو دەكەوێتەوە، چاوەڕوانی خۆشەویستی و میهرەبانیی لێدەكات، كەچی پیاو بەتوندوتیژی لەگەڵی دەست پێدەكات، بۆیە دەڵێت: لەگەڵ هاتنم یان فڕێدرانم بو سەر زەوی شەڕم بینی توندوتیژیم لە تۆ بینی.. لەوە دەچێت تۆڵەی ئەوەم لێ بكەیتەوە، كە بەهۆی منەوە تۆ لە بەهەشت دەركراویت.

 

سەرهەنگ غەریب

© 2017 Hawler