نیسان 23, 2019

شانۆی باوك بەبەشداری دەستەیەك لە ئەكتەرە بە ئەزموونەكان!

بەڕێوەبەرایەتی گشتی رۆشنبیری و هونەری سلێمانی، بەشی هونەری شانۆ، كۆمەڵەی هونەرە جوانەكانی یوتۆبۆری، بە هاوكاری كۆمەڵەی هونەرەجوانەكانی كورد لە سلێمانی،شانۆی (باوك) لە نووسینی (ئاوگۆست ستریندبێرگ) وەرگێرانی (دلاوەر قەرەداغی)، دەرهێنانی (سدیق عەزیز)ـە، لە شاری سلێمانی لە هۆڵی كۆمەڵەی هونەرەجوانەكان، لە رۆژانی (10/4 تاوەكو 13/4/ 2019) نمایشی بۆ ئەنجامدرا، بەڵام لەبەر زۆری بینەری شانۆییەكە دوای ئەوەی لە ئێوارەی (13)ـی ئەو مانگە دوایین نمایشیان ئەنجامدا، بڕیاریاندا لە رۆژی (17-4-2019) بۆ ماوەی چەند رۆژێكی دیكە درێژە بە نمایشەكانیان بدەنەوە لە هەمان هۆڵ و لەهەمان كاتدا.

ئەو بەرهەمە شانۆییە، كە ماوەی (4) نمایش كرا، رۆژانی نمایشەكە ئامادەبوونێكی گەرم و گوڕ هەبوو، لەلایەن شانۆكاران و شانۆ دۆستانەوە،ماوەی (1:30) یەك كاتژمێر و سی خولەك، بینەر بەدیار حیوار و نمایشی بەرهەمی شانۆیی (باوك) بێدەنگیان دەنواندو، بە تاسەوە بۆ بەرهەمەكەیان دەڕوانی، هەر بۆیە بەرهەمەكە جەماوەرێكی باشی بەلای خۆیی دا راكێشابوو!.
 (خەرمان هیرانی) كە یەكێك بوو لە ئەكتەرە سەرەكییەكانی نێو كارە شانۆییەكە، لە لێدوانێكی دا بۆ خوێنەرانی "هەولێر" گوتی : "بەرهەمی شانۆیی (باوك)، كە یەكێكە لە دەقە شانۆییە جوانەكانی (ئاوگۆست ستریندبێرگ)، بۆ یەكەمیین جارە لەنێو بەرهەمە شانۆییەكاندا دەبیندرێت و كاری نمایشی بۆ دەكرێت، بەشێوەیەكی زۆر باش ئامادەكارییمان بۆ كردووە، سوپاس بۆ بینەرانمان، كە زۆر بە تاسەوە ئامادەییەكی بێوێنەیان هەبوو لە رۆژانی نمایشەكەدا".
(خەرمان هیرانی)، كە ماوەی (28) ساڵە بەشداری لەكاری شانۆیی كوردی نەكردووە، جگە لەچەند بەرهەمێكی بیانی، لەبارەی بەشداریی كردنی لەو بەرهەمە شانۆییە بەم شێوەیە گوتی : "راستە من ماوەی (28) ساڵە بەشداریی هیچ بەرهەمێكی شانۆیی كوردییم نەكردووە، دیارە ئەوەشیان تەنیا پەیوەندیی بەوەوە هەبووە، بەرهەمەكان نەیانتوانی بوو، من رازی بكەن بۆ ئەوەی بەشدارییەكی باشم هەبێت، چونكە ئەكتەری شانۆكار ناتوانێ بچێتە نێو بەرهەمێكەوە، كە نەتوانێت خۆی بێت، یاخوود دەبێ بەتەواوی ئاوێتەی بەرهەمەكە بێت، ئینجا دەتوانێت ئەكتەرێكی باش بێت بۆ بەرهەمەكە!، بۆیە منیش لەدوای ئەو هەموو ساڵە بەرهەمی شانۆیی (باوك) جارێكی دیكە ئەو قەناعەتەی بۆ من دروست كردەوە، بۆ ئەوەی لەگەڵ بەرهەمێكی شانۆیی یەك بگرینەوەو لەسەر تەختەی شانۆ نمایشی كار ئەكتەرێك بكەمەوە!".
لەبارەی ئەوەی ئایا ماوەی (4) رۆژ كەم نەبوو، نمایشی ئەو بەرهەمە شانۆییە؟ لەوەڵامدا (هیرانی) رایگەیاند: "بێگومان ئەو چەند رۆژە كەم بوو بۆ نمایشی شانۆییەكی ئاوا لە هۆڵێكی ئاوا بچووك، بەڵام ئێمە گرفتی ئەوەمان هەبوو یەكێك لە ئەكتەرەكانمان هونەرمەند (دڵشاد ئەحمەد) و دەرهێنەری شانۆگەرییەكە هونەرمەند (سدیق عەزیز) دەبوایە بگەڕێنەوە بۆ دەرەوەی وڵات، هەر ئەوەندە دەیان دەتوانی لەگەڵمان بن، بەڵام لەسەر داواكاری جەماوەر و بینەرێكی زۆری بەرهەمەكەیان نەبینی بوو، دیارە هەموومان بڕیاڕماندا ئەكتەرێكی دیكە دەستنیشان بكەین بۆ جێگەی رۆڵەكەی (دڵشاد)، كە رۆڵی كەسایەتی (قەشە)ـی بەرجەستە دەكرد، ئەویش هونەرمەندی شانۆكار (ئامانج ئیبراهیم)ـە، سوپاسی دەكەین هاوكارمان بوو، بۆ ئەوەی رۆڵەكە بەرجەستە بكات، بۆ ئەو مەبەستە لە ماوەی (3) رۆژدا پرۆڤەی لەگەڵ دەكەین، بۆ ئەوەی بتوانێت بەچاكی لەگەڵمان رۆڵی ئەو كەسایەتیە بنوێنێت و، پاشان ئێمە لە رۆژی چوارشەممە لەو هەفتەیەدا (17-4) لە هەمان هۆڵی (كۆمەڵەی هونەرە جوانەكان) لەكاتژمێر (4:30) درێژە بە نمایشەكانمان بدەین".
لەبارەی نمایشكردنی ئەو بەرهەمە شانۆییە ئایا بەنیازن لەدوای سلێمانی لەكوێ نمایشی بكەن؟ لەوەڵامدا (خەرمان هیرانی) هونەرمەندی شانۆكار ئەوەی راگەیاند : "لەدوای ئەوەی ئەو بەرهەمە شانۆییە ئامادەكارییەكانی لە وڵاتی سوید بۆ كراو، بۆ یەكەمین جار لە سلێمانی نمایشمان كرد، پلانی ئەوەمان داناوە لەوڵاتەكانی (سوید، بەریتانیا، ئەڵمانیا و هۆڵەندا) نمایشی بۆ بكەین، پێم وایە پلانی ئەوەش هەیە بۆ چەند وڵاتێكی دیكەش نمایشەكان درێژ بكرێنەوە، بەشێوەیەكی گشتی ئەو بەرهەمە كارێكی نایابە پێویستە بینەرێكی باشی هەبێت، چونكە ئەو جۆرە بەرهەمانە هەموو كات و زەمەنێك بە ئاسانی نایەتە بوون!".
جێگەی ئاماژە بۆ كردنە بەرهەمی شانۆیی (باوك) ئەو ئەكتەرانەی بەشداریی كاری نواندنیان كردبوو پێك هاتبوون لە (شەماڵی عەبە رەش، خەرمان هیرانی، سیروان جەمال، شادان فوئاد، دلشاد ئەحمەد، دییە عەلی، كاروان عەلی مەجۆل، كاڵێ سەباح).

© 2017 Hawler